Ezekiele 2 - BIBELE Mahungu Lamanene

Ta ku vitaniwa ka Ezekiele

¹ Loyi a vulavulaka na mina a ku: “Wena munhu, suka u yima, hikuva ndzi ni rito eka wena!”

² Loko a ri karhi a vulavula na mina, Moya wa Xikwembu wu nghena eka mina, wu ndzi yimisa, kutani muvulavuri wa kona, ndzi n'wi twa swinene.

³ Kutani a ku ka mina: “Wena munhu, ndzi ku rhuma eka Vaisraele, va nga vanhu lava tiarisaka, lava lwaka na mina; vanhu lava va ndzi dyoherile ku fana ni vatata wa vona, kutani ni namuntlha swa ha ri tano.

⁴ A va na xichavo, va ome tinhloko, hambiswiritano ndzi ku rhuma eka vona; u ta va byela leswaku mina HOSI N'wini wa vona ndzi ni rito eka vona.

⁵ Vatiarisi lava, hambi va yingisa hambi a va yingisi, va ta swi tiva leswaku ku ni muprofeta exikarhi ka vona.

⁶ U nga chavi we Ezekiele, u nga chavisiwi hi ku vulavula ka vona, hambiloko va ku rhendzerile kukota mitwa kumbe mahlwehlwe, va ku luma ku fana ni swipame. U nga chavisiwi hi marito ya vona kumbe ndlela leyi va ku langutaka ha yona, hikuva i vatiarisi.

⁷ Vanhu lava vo tiarisa, hambi va pfumela ku yingisa kumbe va nga pfumeli, u ta va tivisa leswi ndzi swi vulaka.

⁸ Kambe wena u nga ali ku ndzi yingisa, u nga tshuki u fana ni vatiarisi lava, kambe u amukela leswi ndzi lavaka ku ku byela swona. Pfula nomo wa wena, u dya leswi ndzi ku nyikaka swona!”

⁹ Loko ndzi languta, ndzi vona voko leri tshambulutiweke ri kongoma eka mina, ri tamele buku.

¹⁰ Kavaloko voko leri ri pfula buku emahlweni ka mina; a yi ri ni marito ya minkosi ni swirilo ni mahlomulo, yi tsariwile endzeni ni le handle.