Ezekiele 15 - BIBELE Mahungu Lamanene

Yerusalema i murhi wa vhinya lowu nga ta hisiwa

¹ HOSI Xikwembu xi vulavula na mina xi ku:

² “Ndzi byele we Ezekiele, xana murhi wa vhinya ni marhavi ya wona wu nga pfuna ku tlula mirhi yin'wana hinkwayo ya le xihlahleni xana?

³ Xana munhu a nga vatla xin'wana hi murhi wolowo, xo fana ni mhingu yo hayeka swibya eka yona xana?

⁴ E-e! Murhi wa kona, va nga wu tirhisa ntsena ku tshivela ndzilo; kutani loko wu tshwile hala ni hala, ku sala kala ntsena, xana ku nga ha endliwa yini ha wona xana?

⁵ Hambiloko wu nga si simuriwa, a wu nga ri na ntirho eka muvatli! Xana sweswi wu tshweke ni ku punyala, wa ha ta tirha yini ke?

⁶ “Kutani mina HOSI N'wini wa hinkwaswo ndzi vurisa sweswo ndzi ri: Loko vanhu va lava ku tshivela ndzilo, va teka murhi wa vhinya, va tshika mirhi leyin'wana exihlahleni; hi mukhuva wolowo, na mina ndzi ta hoxa vaaki va Yerusalema endzilweni.

⁷ Ndzi ta tshinya vanhu lava: Hambileswi va poneke ku tshwa, va ha ta hoxiwa endzilweni, kutani loko ndzi ta va ndzi va tshinyile, hi kona mi nga ta tiva leswaku HOSI Xikwembu hi mina.

⁸ Leswi va nga tshembekangiki, tiko ra vona ndzi ta ri hundzula mananga. Ndzi vula sweswo mina HOSI N'wini wa hinkwaswo.”