Ezekiele 10 - BIBELE Mahungu Lamanene

Ku dzuneka ka Xikwembu ku suka eTempeleni

¹ Kutani ndzi languta ehenhla ka lwangu leri ungamelaka tikerubu, ndzi vona leswi fanaka ni ribye ra nkoka ra “safiri”; ribye ra kona a ri vonaka ri ri ni xiyimo xa xiluvelo.

² Kutani Xikwembu xi lerisa wanuna loyi a ambaleke swiambalo swa ntsembyani, xi ku: “Nghena exikarhi ka mavhilwa lama rhendzelekaka ehansi ka tikerubu, kutani u nusa makala lama vuvumelaka exikarhi ka tikerubu leti, u tata swandla swa wena ha wona u ya ma haxa emutini.” Kutani wanuna loyi a nghena kona ndzi ri karhi ndzi n'wi vona.

³ Loko wanuna a nghena exikarhi ka mavhilwa, tikerubu a ti yimile hi tlhelo ra le dzongeni ra Tempele, xivava xa Tempele xa le ndzeni xona xi funengetiwile hi papa.

⁴ Kutani ku dzuneka ka HOSI Xikwembu ku suka endhawini ya kona ehenhla ka tikerubu, ku ya fika enyangweni ya Tempele. Yindlu ya kona yi khubumetiwa hi papa, kasi xivava xa Tempele xona xi tala hi ku dzuneka loku vangamaka ka HOSI Xikwembu.

⁵ Mpfumawulo wa timpapa ta tikerubu a wu twala ni le xivaveni xa le handle, wu fana ni rito ra Xikwembu-xa-matimba-hinkwawo loko xi vulavula.

⁶ Loko HOSI Xikwembu xi lerisile wanuna la ambaleke swa ntsembyani leswaku a ya oka ndzilo exikarhi ka mavhilwa lama rhendzelekaka, yena a nghena ehansi ka tikerubu, a ya yima kusuhi ni vhilwa rin'wana.

⁷ Kutani yin'wana ya tikerubu yi tshambuluta voko ra yona exikarhi ka tikerubu letin'wana, yi oka ndzilo yi wu chela eswandleni swa wanuna la ambaleke swa ntsembyani, kutani yena a wu amukela, a famba na wona.

⁸ Mavoko lama nga hansi ka timpapa ta tikerubu, a ma fana ni mavoko ya munhu.

⁹ Ndzi engeta ndzi languta, kutani ndzi vona mavhilwa ya mune, rin'wana ni rin'wana ri yimile kusuhi ni kerubu yin'we; mavhilwa lawa a ma vangama kukota ribye ra nkoka;

¹⁰ a ma vonaka ma ri ni xivumbeko xin'we xo fana, kutani endzeni ka vhilwa rin'wana ni rin'wana a ku vonaka vhilwa ra vumbirhi leri hingakanyaka.

¹¹ Hi mukhuva lowu mavhilwa ya kona a ma kota ku suka xikan'we hinkwawo ma kongoma tlhelo rin'we, ma nga rhanganga hi ku hundzuluka. Mavhilwa laman'wana a ma landzelela lera le mahlweni, ma suka ma nga hundzulukanga.

¹² Miri hinkwawo wa tikerubu, nhlana ni mavoko ni timpapa, a swi tele hi mahlo; na xona xirhendzevutana xa mavhilwa ya kona ya mune a xi tele hi mahlo.

¹³ Kutani ndzi twa leswaku mavhilwa lawa ma vuriwa “mavhilwa-yo-rhendzeleka”.

¹⁴ Kerubu yin'wana ni yin'wana a yi ri ni swikandza swa mune; xikandza xo sungula a xi ri xa yona kerubu hi yoxe; xikandza xa vumbirhi a xi ri xa munhu, xa vunharhu a xi ri xa nghala, xa vumune xona a xi ri xa gama;

¹⁵ tikerubu, a swi ri swona swivumbiwa leswi hanyaka leswi ndzi swi voneke kusuhi ni nambu wa Kebara. A ti swi kota ku tlakuka ti ya henhla,

¹⁶ kutani ti suka ti ya kun'wana, mavhilwa ma famba na tona, ni loko ti tlharamula timpapa ta tona ti sungula ku haha ti ya henhla, mavhilwa ma ya henhla ma ti namarhela.

¹⁷ Loko tikerubu ti yima, na wona mavhilwa a ma yima; loko ti tlakuka, na wona a ma tlakuka, hikuva moya wa swivumbiwa leswi hanyaka a wu fambisa na wona mavhilwa.

¹⁸ Kutani ndzi vona ku dzuneka ka HOSI Xikwembu ku suka enyangweni ya Tempele ku ya ungamela tikerubu.

¹⁹ Hiloko tikerubu ti tlharamula timpapa ta tona, kutani ndzi ti vona loko ti sungula ku haha ti ya henhla, mavhilwa ma ti namarhele. Kutani ti ya yima emahlweni ka nyangwa ya Tempele ya le vuxeni, ti ungameriwile hi ku dzuneka ka Xikwembu xa Israele.

²⁰ Kutani ndzi twisisile leswaku swivumbiwa leswi hanyaka leswi ndzi rhangeke ndzi swi vona eribuweni ra nambu wa Kebara swi ri hansi ka Xikwembu xa Israele, a ti ri tona tikerubu hakunene.

²¹ Kerubu yin'wana ni yin'wana a yi ri ni swikandza swa mune, ni timpapa ta mune, kutani ehansi ka timpapa leti, a ku ri ni leswi fanaka ni mavoko ya munhu.

²² Swikandza swa tikerubu a swi ri ni xivumbeko xa swikandza leswi ndzi nga rhanga ndzi swi vona eribuweni ra nambu wa Kebara; a swi vonaka swi ri swona hakunene. Loko tikerubu ti suka, a ti famba xikan'we ti kongoma tlhelo rin'we hinkwato.