Ezekiele 1 - BIBELE Mahungu Lamanene

Muprofeta Ezekiele a kombiwa ku dzuneka ka Xikwembu

¹ Hi lembe ra vu-30, esikwini ra vuntlhanu ra n'hweti ya vumune, a ndzi tshamile eribuweni ra nambu wa Kebara exikarhi ka va ka Yuda lava yisiweke evukhumbini, kutani ndzi vona matilo ma pfuleka, Xikwembu xi ndzi komba ni xivono.

² Lembe ra kona a ri ri ra vuntlhanu, ku sukela loko hosi Yoyakini a yisiwile evukhumbini.

³ Kutani kwale ribuweni ra nambu wa Kebara etikweni ra Vakalediya, HOSI Xikwembu xi vulavula na mina muprista Ezekiele n'wana Buzi, xi ndzi khoma hi matimba ya xona.

⁴ Ndzi languta, kutani ndzi vona xihuhuri lexi humaka en'walungwini, xi ta ni papa lerikulu leri rhendzeriweke hi ku vonakala, ndzi vona ni ndzilo lowu vuvumelaka; exikarhi ka wona a ku vonaka xilo lexi vangamaka kukota koporo,

⁵ kutani endzilweni wolowo ku huma swivumbiwa leswi hanyaka swa mune, swi vonaka swi fana ni vanhu.

⁶ Xin'wana ni xin'wana xa swivumbiwa leswi a xi ri ni swikandza swa mune ni timpapa ta mune.

⁷ Milenge ya swona a yi lehile, yi ri ni minkondzo yo fana ni swinyondzwana swa rhole, yi hatima kukota koporo leyi vangamisiweke.

⁸ Ehansi ka timpapa ta swona, swivumbiwa leswi swa mune a swi ri ni mavoko ya vanhu, ma languta ematlhelweni ya mune ku fana ni swikandza swa swona ni timpapa ta swona.

⁹ Swivumbiwa a swi tlharamurile timpapa timbirhi swi khumbana ha tona swi ba xikwere. Loko swi suka swi ya kun'wana, a swi nga rhangi hi ku hundzuluka, kambe a swi famba xikan'we, hinkwaswo swi kongoma tlhelo rin'we.

¹⁰ Xin'wana ni xin'wana xa swivumbiwa leswi a xi ri ni swikandza swa mune: Xikandza lexi langutaka emahlweni a xi ri xa munhu, xa le vokweni ra xinene a xi ri xa nghala, xa le ximatsini a xi ri xa homu, xa le xikosini a xi ri xa gama.

¹¹ [Swikandza swa kona a swi ri swona sweswo.] Swivumbiwa a swi phurumurile timpapa, swi kongomisa timbirhi ehenhla swi khumbana ha tona; hi timpapa timbirhi letin'wana, a swi tifunengeta miri.

¹² Loko swivumbiwa swi suka swi ya lomu moya wa swona wu swi susumetelaka kona, a swi nga sunguli hi ku hundzuluka, kambe a swi famba xikan'we, hinkwaswo swi kongoma tlhelo rin'we.

¹³ Exikarhi ka swivumbiwa leswi hanyaka, a ku vonaka swilo leswi fanaka ni makala lama vuvumelaka kumbe swisana swa ndzilo, swi rhendzeleka-rhendzeleka, ndzilo wa kona wu vangama swinene wu hatima-hatima.

¹⁴ Kutani swivumbiwa a swi tsutsuma swi ya hala ni hala, ku fana ni rihati.

¹⁵ Ndzi tlhela ndzi languta swivumbiwa leswa mune, kutani etlhelweni ra xin'wana ni xin'wana xa swona, ndzi vona vhilwa leri khumbaka ehansi.

¹⁶ Mavhilwa lawa ya mune a ma fana, ma vangama kukota ribye ra nkoka; naswona a ma ri ni xivumbeko xin'we: Endzeni ka rin'wana ni rin'wana ra wona, a ku vonaka vhilwa ra vumbirhi leri hingakanyaka.

¹⁷ Hi mukhuva lowu, mavhilwa ya kona a ma kota ku suka xikan'we hinkwawo, ma kongoma tlhelo rin'we, ma nga rhanganga hi ku hundzuluka.

¹⁸ Xivumbeko xa wona a xi chavisa: A ma lehile swinene ku ya henhla, naswona xirhendzevutana xa wona a xi tele hi mahlo!

¹⁹ Loko swivumbiwa leswi hanyaka swi suka swi ya kun'wana, mavhilwa a ma famba na swona; loko swi sungula ku haha swi ya henhla, na wona mavhilwa a ma ya henhla.

²⁰ Mavhilwa a ma namarhela swivumbiwa, ma tlakuka na swona, ma ya na swona hinkwako laha moya wa swona wu swi susumetelaka ku ya kona, hikuva moya lowu wa swivumbiwa a wu fambisa na wona mavhilwa.

²¹ Mavhilwa a ma famba swin'we ni swivumbiwa leswi hanyaka; loko swi yima, na wona a ma yima; loko swi haha swi ya henhla, na wona a ma ya henhla; mavhilwa a ma namarhela swivumbiwa, hikuva na wona a ma fambisiwa hi moya wa swona.

²² Ehenhla ka swivumbiwa leswi hanyaka, a ku vonaka xilo lexi fanaka ni lwangu xi basile kukota gamboko, xi vambiwile ehenhla ka swivumbiwa, xi swi ungamela.

²³ Swona a swi phurumurile timpapa ta swona timbirhi hala ni hala ehansi ka lwangu swi khumbana ha tona; kutani hi timpapa timbirhi letin'wana swivumbiwa a swi tifunengeta miri.

²⁴ Loko swi haha swi ya henhla, mpfumawulo wa timpapa ta swona a wu fana ni mpfumawulo wa lwandle, kumbe wa rito ra Xikwembu-xa-matimba-hinkwawo, kumbe huwa ya mavuthu layo tala. Kavaloko swivumbiwa swi jitamela hansi, swi phutsa timpapa ta swona.

²⁵ Kutani loko swi ri karhi swi endlisa sweswo, ku twakala wun'wana mpfumawulo, ehenhla ka xilo lexi fanaka ni lwangu.

²⁶ Ehenhla ka lwangu ra kona, leri ungamelaka swivumbiwa, a ku ri ni leswi fanaka ni ribye ra nkoka ra “safiri”; ribye ra kona a ri ri ni xiyimo xa xiluvelo, kutani exiluvelweni xexo, ehenhla swinene, a ku vonaka xilo lexi nga ni xivumbeko xa munhu,

²⁷ ndzi xi vona xi vangama kukota koporo, xi vonaka xi rhendzeriwile hi ndzilo; ehenhla ni le hansi ka leswi fanaka ni xisuti xa xona, a ku ri ni leswi fanaka ni ndzilo, swi voninga matlhelo hinkwawo.

²⁸ Ku voninga ka kona a ku sasekile ku fana ni nkwangulatilo, loko wu vonaka emapapeni esikwini ra mpfula. Xilo lexi vangamaka lexi, a ku ri kona ku dzuneka ka HOSI Xikwembu. Loko ndzi xi vona, ndzi wela hansi hi mombo, kutani ndzi twa un'wana a ri karhi a vulavula na mina.