Esaya 9 - BIBELE Mahungu Lamanene

¹ Vanhu lava rhendzeriweke hi makhombo layo tano, va nga ka va nga baleki. Eminkarhini leyi hundzeke, HOSI Xikwembu xi tsongahatile matiko ya va ka Zebuloni ni va ka Neftali; kambe eminkarhini leyi taka, tiko ra Galeliya leri vamatiko va tshameke eka rona, leri nga ntsungeni wa nambu wa Yordani endleleni leyi yaka elwandle, HOSI Xikwembu xi ta endla leswaku ri dzunisiwa.

Ta hosi leyi tisaka ku rhula

² Vanhu lava a va gugurhuteka emunyameni, sweswi va vona ku vonakala lokukulu; lava a va tshama exinyamini lexo chavisa va fikeriwe hi ku vonakala.

³ We HOSI, u andzisile ntsako wa vona, u wu kurisa, va tsaka emahlweni ka wena va ba minkulungwana, wonge va le ku tshoveleni, kumbe eku avelaneni ka leswi va swi phangheke;

⁴ hikuva joko leri a va rhwexiwile rona, ni nhonga leyi vaxanisi va vona a va va ba ha yona, wena HOSI u swi tshovelerile kukota loko u tshovile matimba ya Vamidiyani.

⁵ Tintanghu hinkwato leti masocha ma nga ya enyimpini ha tona, ni swiambalo hinkwaswo leswi tlhambukeleke hi ngati, swi ta hoxiwa endzilweni swi tshwa.

⁶ Hi velekeriwile n'wana, hi nyikiwile n'wana wa mufana, vuhosi i bya yena; vito ra yena i “Mutsundzuxi, munhu wo hlamarisa, Xikwembu xa matimba, Tatana la nga riki na ku hela, Hosi ya ku rhula”.

⁷ Ku ndlandlamuka ka mfumo wa yena, ni ku rhula loku nga ta va kona etikweni, a swi nga vi na makumu; ú ta tshama exiluvelweni xa Davhida, a fuma tiko ra yena, a ri hlayisa ni ku ri lwela, a avanyisa timhaka hi ku lulama; ú ta sungula sweswi, a fuma hilaha ku nga heriki. Hinkwaswo leswi, HOSI Xikwembu xi tiyimiserile ku swi endla.

Xikwembu xi ta ba tiko ra Israele

⁸ N'wini wa hinkwaswo ú rhumerile rito hi tlhelo ra ku biwa ka va ka Yakobo, rito ra kona ri ta fika etindleveni ta vona Vaisraele.

⁹ Hinkwavo va ka Efrayimi, ku katsa ni vaaki va muti wa Samariya, va ta swi twa, vona lava tikurisaka ni ku tiarisa, va ku:

¹⁰ “Switina swi mbundzumukile, kambe sweswi hi ta aka hi maribye lama vatliweke; timhandze ta nkuwa ti tsemeleriwile, kambe hi ta aka hi timhandze ta kedari.”

¹¹ Hikokwalaho, HOSI Xikwembu xi rhumela vanhu va ya lwa na vona, xi va pfuxela valala.

¹² Vasiriya va ta hi le vuxeni, Vafilista va ta hi le vupeladyambu, hinkwavo va nghena va mita tiko ra Israele; hambiswiritano, vukari bya HOSI Xikwembu a byi tlheli, xa ha ta tlakusa voko ra xona, xi va ba.

¹³ Vaisraele a va tlhelelanga eka HOSI Xikwembu xa matimba hinkwawo lexi xi nga va ba, a va vutisanga leswaku xi tsakela yini.

¹⁴ Hikokwalaho HOSI Xikwembu xi ta tsema tiko ra Israele enhloko ni ncila, xi tsema matluka ya ncindzu ni tinhlanga hi siku rin'we.

¹⁵ Nhloko, i nkulukumba kumbe munhu wo chaviseka; muprofeta loyi a dyondzisaka mavunwa, hi yena ncila;

¹⁶ Varhangeri va tiko leri, va lahlekisa vanhu, kutani vaaki va rona va mitiwa.

¹⁷ Hikokwalaho majaha ya tiko leri, N'wini wa hinkwaswo a nga ha ma tsetseleli; lava pfumalaka vatswari, ni tinoni, a nga ha va tweli vusiwana, hikuva hinkwavo a va na mhaka na Xikwembu, hinkwavo va endla leswo biha, va vulavula leswo ka swi nga pfuni nchumu; hikokwalaho vukari bya HOSI Xikwembu a byi nga tlheli, xa ha ta tlakusa voko ra xona, xi va ba.

¹⁸ Lavo homboloka va le ku pfurheni, ku fana ni mitwa ni swigatlu leswi herisiwaka hi ndzilo; va kota xihlahla xo tlhuma lexi tshwaka, musi wu tuvika wu ya henhla.

¹⁹ Vukari bya HOSI ya matimba hinkwawo byi le ku hiseni ka tiko, vanhu va fana ni tihunyi leti hlanganyetiwaka! A ku na munhu la tsetselelaka makwavo,

²⁰ va lava swakudya matlhelo hinkwawo, kambe a va kumi xo va xurhisa, kutani un'wana ni un'wana ú dya munhu-kulobye.

²¹ Va ka Manase va hlasela va ka Efrayimi, ni va ka Efrayimi va hlasela va ka Manase, kutani va tlhela va yima swin'we va hlasela va le Yuda; hikokwalaho, vukari bya Hosi Xikwembu a byi nga tlheli, xa ha ta tlakusa voko ra xona, xi va ba.