Esaya 64 - BIBELE Mahungu Lamanene

¹ “Hikwalaho ka yini u nga handzuli mapapa, u rhelela emisaveni xana? Tintshava a ti ta ninginika loko ti ku vona.

² Tana kukota ritshwa leri hlaselaka xihlahla, kumbe ndzilo lowu virisaka mati, kutani valala va ta swi tiva leswaku hi we mani, ni vamatiko va ta rhurhumela loko va ku vona.

³ Eminkarhini leyi u endleke swilo leswo chavisa leswi a hi nga swi langutelanga, u rhelerile emisaveni, kutani tintshava ti ninginika loko ti ku vona.

⁴ Ku sukela khale, a ku si tshama ku va na munhu loyi a tweke kumbe ku vona Xikwembu xo fana na wena, hikuva u tikarhatela vanhu lava va ku tshembaka.

⁵ Wena u amukela vanhu lava tsakelaka ku endla leswo lulama, lava nga rivaliki tindlela ta wena. U hi hlundzukerile, kambe hi yile emahlweni hi ku dyohela; i khale hi ri karhi hi dyoha; xana ha ha ta pona ke?

⁶ Hinkwerhu hi fana ni munhu loyi a nga tengangiki, hambi yi ri mintirho ya hina leyo lulama yi fana ni xiambalo lexi nyamisiweke. Hi fana ni matluka lama vuneke, swidyoho swa hina i moya lowu hungaka, wu hi rhwala wu famba na hina.

⁷ Ku pfumala na munhu na un'we loyi a ku khongelaka, ku hava loyi a sukaka a yima a tshinela kusuhi na wena, hikuva u sukile exikarhi ka hina, u hi siyile ni swidyoho swa hina.

⁸ “Hambiswiritano, we HOSI, u tata wa hina; hina hi vumba, muvumbi hi wena, hinkwerhu hi endliwile hi wena.

⁹ We HOSI, u nga hi kariheli ku tlula mpimo, u nga tsundzuki ku homboloka ka hina hilaha ku nga heriki; hi kombela leswaku u tsundzuka leswi: Hina hinkwerhu, hi vanhu va wena.

¹⁰ Miti ya wena leyo hlawuleka yi hundzukile mananga, muti wa Siyoni i rhumbi, a ka ha tshami munhu eYerusalema.

¹¹ Yindlu ya hina yo saseka leyo hlawuleka, leyi vatata wa hina a va ku gandzelela eka yona, yi herisiwile hi ndzilo; tindhawu hinkwato leti a hi ti tsakela ngopfu, namuntlha i marhumbi ntsena.

¹² We HOSI, xana swilo leswi hinkwaswo a swi ku khumbi xana? Xana wa ha ta miyela, u hi tshika hi tsongahatiwa hi ndlela leyi xana?”