Esaya 56 - BIBELE Mahungu Lamanene

Xiyenge xa vunharhu Xikwembu xi amukela vanhu va matiko hinkwawo

¹ HOSI Xikwembu xi vurisa sweswo xi ri: “Hlayisani milawu, mi endla leswi lulameke, hikuva ndzi le kusuhi ni ku mi ponisa, ndzi komba matimba ya mina ya ku mi ntshunxa.

² Ku katekile munhu loyi a chivirikelaka ku hanya hi milawu ya mina, loyi a hlayisaka siku ra Savata, a nga ri nyamisi, loyi a tikhomaka, a nga endli nchumu xo biha.”

³ Munhu loyi a humaka etikweni rin'wana, loyi a tinyiketeke eka HOSI Xikwembu, a nga tshuki a vilela a ku: “HOSI Xikwembu xi nga ka xi nga ndzi amukeli exikarhi ka vanhu va xona.” Hambi a ri mutsheniwa a nga tshuki a ku: “Ndzo va murhi lowu omeke!”

⁴ hikuva HOSI Xikwembu xi ri: “Loko vatsheniwa va hlayisa masiku ya mina ya Savata, ni loko va tsakela ku endla leswi ndzi swi lavaka, va chivirikela ni ntwanano wa mina,

⁵ ndzi ta va nyika leswo saseka ku tlula ku va ni vana va xinuna ni va xisati, ri nga ribye ra xitsundzuxo leri tsariweke mavito ya vona, ri vekiwa endzeni ka Tempele ya mina, kutani va nga ka va nga rivariwi ni siku ni rin'we.

⁶ “Na vona vanhu vo huma ematikweni man'wana, loko va tinyiketa eka mina HOSI, va tsakela ku ndzi tirhela, va ndzi rhandza, va va malandza ya mina, ni loko va hlayisa siku ra Savata va nga ri nyamisi, va chivirikela ni ntwanano wa mina,

⁷ vanhu volavo, ndzi ta va pfumelela ku ta entshaveni ya mina leyo hlawuleka, ndzi ta va nyika ku tsaka endlwini ya mina yo khongelela ka yona; magandzelo ya vona lama hisiwaka ni lama dyiwaka, ndzi ta ma amukela alitarini ya mina, hikuva yindlu ya mina yi ta vuriwa ‘yindlu ya xihongelo eka vanhu va matiko hinkwawo’.”

⁸ HOSI N'wini wa hinkwaswo la hlengeletaka vanhu hinkwavo lava susiweke etikweni ra Israele, ú vurisa sweswo, ú ri: “Ehandle ka lava va hlengeletiweke, ndza ha ta tisa van'wana!”

Ku tsandzeka ka varhangeri va Israele

⁹ N'wina swiharhi swa nhova, humani hinkwenu eswihlahleni, mi ta mi ta herisa vanhu va tiko leri.

¹⁰ Valanguteri va tiko va fe mahlo, hinkwavo a va twisisi nchumu, va fana ni timbyana to rhula leti nga vukuriki; va tsakela ngopfu vurhongo, va tshama va etlele, minkarhi hinkwayo va le ku lorheni.

¹¹ Varhangeri lava va fana ni timbyana to rhandza ngopfu swakudya, a va xurhi! I varisi lava nga ehleketiki, hinkwavo va endla leswi va tsakelaka swona, un'wana ni un'wana ú tirha leswi swi nga ta vuyerisa yena ntsena.

¹² Va byelana va ku: “A hi yeni hi ya lava vhinyo, a hi nweni byalwa, hi xurha! Siku ra mundzuku ri ta fana ni lera namuntlha ri va lerinene ngopfu.”