Esaya 53 - BIBELE Mahungu Lamanene

¹ Xana i mani loyi a kholweke leswi hi byeriweke swona xana? Xana ú kona loyi a voneke matimba ya HOSI Xikwembu emhakeni leyi, xana?

² Nandza wa HOSI Xikwembu ú kurile emahlweni ka xona tanihi ximilana, a kota rimitsu ra murhi wa le misaveni leyi omeke; xivumbeko xa yena a xi nga hi tsakisi, a xi nga hi koki mahlo, naswona a hi nga n'wi naveli, hikuva a a nga sasekanga.

³ Vanhu a va n'wi langutela hansi, va nga n'wi amukeli. A a ri munhu wa mahlomulo, loyi a kombiwaka maxangu; vanhu a va nga lavi na ku n'wi vona, kutani hina a hi n'wi sola, hi nga ri na mhaka na yena.

⁴ Hambileswi a a rhwele maxangu ya hina, ni ku titekela mahlomulo ya hina, hina a hi ku, Xikwembu xa n'wi ba, xi n'wi twisa ku vava, xa n'wi khawurisa.

⁵ Kasi a a boxiwa timbanga hikwalaho ka milandzu ya hina, a xanisiwa hikwalaho ka swidyoho swa hina. Ku biwa ka yena ku hi tisele ku rhula, hi hanyisiwile hi mafelangati ya yena.

⁶ Hinkwerhu a hi fana ni tinyimpfu leti lahlekeke, un'wana ni un'wana a a tifambela hi ndlela ya yena; hambiswiritano, HOSI Xikwembu xi tekile swidyoho swa hina hinkwerhu, xi swi rhwexa munhu loyi.

⁷ A a xanisiwa, a twisiwa ku vava, kambe a nga pfuli nomo; a a fana ni xinyimpfana lexi yisiwaka eku tlhaviweni, kumbe nyimpfu leyi nga riliki loko va yi tsemeta voya.

⁸ Ú khomiwile hi tihanyi, a avanyisiwa, a susiwa misaveni, vanhu va nga ri na mhaka na yena, kasi a a biwa, a susiwa emisaveni ya lava hanyaka, hikwalaho ka swidyoho swa vanhu va ka hina.

⁹ Kutani va n'wi lahle exikarhi ka vadyohi, a celeriwa kun'we ni lavo homboloka, hambileswi yena a a nga endlanga nchumu xo biha, naswona a nga kanganyisanga munhu.

¹⁰ A ku ri ku rhandza ka HOSI Xikwembu leswaku a twisiwa ku vava, a kombiwa maxangu. Leswi a tinyiketeke ku va mhamba yo riha swidyoho, ú ta vona vatukulu va yena, a hanya malembe layo tala; hi yena la nga ta yisa mahlweni ntirho wa HOSI Xikwembu.

¹¹ Ú ta vona mihandzu ya maxangu ya yena layo chavisa, kutani a tsaka. HOSI Xikwembu xi ri: “Nandza wa mina ú tiva ku rhandza ka mina; leswi a nga riki na nandzu, ú ta ntshunxa lavo tala emilandzwini ya vona hikuva ú biwile ematshan'wini ya vona.

¹² Hikokwalaho, ndzi ta n'wi nyika ndhawu exikarhi ka lavo chaviseka, a avelana leswi phanghiweke ni vanhu va matimba, hikuva ú tinyiketile ku fela van'wana, a hlayiwa exikarhi ka vadyohi. Ú tirhwexile milandzu ya lavo tala, a khongela Xikwembu leswaku xi tsetselela vadyohi.”