Esaya 52 - BIBELE Mahungu Lamanene

Xikwembu xi ta humesa vaaki va Yerusalema evuhlongeni

¹ We muti wa Siyoni, suka u yima, yima u komba leswaku u ni matimba; we Yerusalema, muti lowo hlawuleka, ambala swiambalo swa wena leswo saseka, hikuva lava nga yimbangiki ni lava nga tengangiki va nga ka va nga ha ngheni eka wena.

² We Yerusalema, phumunha ritshuri, pfuka u ya tshama exiluvelweni xa wena. Tsemani tintambhu leti mi bohiweke tinhamu ha tona, n'wina vaaki va muti wa Siyoni lava nga vukhumbini.

³ HOSI Xikwembu xi vurisa sweswo, xi ri: “Loko mi nyiketiwa evuhlongeni, a ku humesiwanga mali, hikokwalaho a ku nga hakeriwi nchumu loko mi kutsuriwa.”

⁴ HOSI N'wini wa hinkwaswo ú engeta a ku: “Vanhu va mina va rhange va ya etikweni ra Egipta, va ya luvela kona; endzhaku ka sweswo, Vaasiriya va va yisile evukhumbini, va nga va humeselanga nchumu.

⁵ Xana i swilo muni leswi ndzi swi vonaka laha Babilona xana? Vanhu va mina va le vukhumbini, kambe a va hakeleriwanga nchumu. Lava va va fumaka va tibumabuma, va le ku sandzeni ka vito ra mina siku rin'wana ni rin'wana.

⁶ Hikokwalaho, mina HOSI, ndzi ri: Vanhu va mina va ta tiva vito ra mina. Hi siku ra kona, va ta tiva leswaku hi mina ndzi vulavuleke na vona, mina yoloyi!”

⁷ A hi ku tsakisa ka swona ku vona munhu loyi a taka hi le tintshaveni, a tisa mahungu lamanene; a tivisa vanhu leswaku ku rhula ni minkateko swi le ndleleni, a va vikela ta ku hlula loku taka, a byela vaaki va Yerusalema, a ku: “Hakunene Xikwembu xa n'wina, hi xona xi fumaka.”

⁸ Twanani huwa ya varindzi va muti, hinkwavo va yimbelela va tsakile, hikuva va swi vona hi voxe loko HOSI Xikwembu xi vuya emutini wa Yerusalema.

⁹ N'wina marhumbi ya Yerusalema, sumani tinsimu mi yimbelela, hikuva HOSI Xikwembu xi kutsurile muti wa Yerusalema, xi tiyisa vanhu va xona.

¹⁰ HOSI Xikwembu xi ta kombisa matimba ya xona layo hlawuleka, vanhu va matiko hinkwawo va ta ma vona; misava hinkwayo yi ta swi vona loko Xikwembu xa hina xi ponisa vanhu va xona.

¹¹ Sukani! Sukani! Humani eBabilona mi famba, mi nga tshuki mi khumba swilo leswi nga tengangiki. Humani etikweni rero! N'wina mi rhwalaka swibya swa HOSI Xikwembu, mi fanele ku tibasisa.

¹² Loko mi huma, a mi nga humi hi xihatla, a mi nga tsutsumi, hikuva HOSI Xikwembu hi xona xi nga ta mi rhangela emahlweni, mi ta sirheleriwa matlhelo hinkwawo hi Xikwembu xa Israele.

Ku xaniseka ni ku tlakusiwa ka nandza wa Xikwembu

¹³ HOSI Xikwembu xi ri: “Vonani, nandza wa mina ú ta kateka; ú ta tlakusiwa, a va munhu wo chaviseka swinene.

¹⁴ Vanhu vo tala va tsemekile nhlana loko va n'wi vona, hikuva nghohe ya yena a yi nga languteki; a a nga fani na vanhu van'wana.

¹⁵ Kambe sweswi, ú ta hlamarisa vanhu lavo tala, tihosi ti ta pfumala lexi ti nga xi vulaka. Vanhu va ta vona leswi va nga si tshamaka va swi vona, va ta tiva ni leswi a va nga swi tivi.”