Esaya 38 - BIBELE Mahungu Lamanene

Ta ku vabya ni ku hola ka Hezekiya

¹ Enkarhini wolowo, Hezekiya a khomiwa hi vuvabyi lebyi nga lava ku n'wi yisa eku feni. Muprofeta Esaya n'wana Amotsi a ya n'wi pfuxela, kutani a ku ka yena: “HOSI Xikwembu xi vurisa sweswo, xi ri: ‘Lulamisa swa muti wa wena, hikuva u le kusuhi ni ku fa, a wu nga hanyi.’ ”

² Hiloko Hezekiya a hundzulukela ekhumbini, a khongela HOSI Xikwembu,

³ a ku: “We HOSI, ndza ku khongela, tsundzuka hilaha ndzi hanyeke hakona emahlweni ka wena, hi ku tshembeka ni mbilu yo basa, ndzi ri karhi ndzi endla leswi lulameke emahlweni ka wena.” Kutani Hezekiya a rila swinene.

⁴ Kutani HOSI Xikwembu xi lerisa Esaya, xi ku:

⁵ “Famba u ya byela Hezekiya leswaku HOSI Xikwembu xa Davhida kokwa wa yena xi vurisa sweswo xi ri: ‘Xikhongelo xa wena ndzi xi twile, ndzi vonile ni mihloti ya wena. Hikokwalaho, ndzi ta engetela vutomi bya wena hi malembe ya 15.

⁶ Ndzi ta ku lamulela emavokweni ya hosi ya le Asiriya, wena swin'we ni muti lowu; naswona, muti lowu ndzi ta wu lwela.

⁷ “ ‘Xikombiso lexi humaka eka mina HOSI xa leswaku ndzi ta endla hilaha ndzi tshembiseke hakona, hi lexi:

⁸ Ndzi ta tlherisa ndzhuti hi khume ra magoza, laha a wu hundzile kona eswikhandziyeni swa Akazi.’ ” Hiloko ndzhuti wu tlhelela ndzhaku hi khume ra magoza.

Hosi Hezekiya a nkhensa ku hanyisiwa ka yena

⁹ Loko Hezekiya hosi ya le Yuda a hanyisiwile eku vabyeni ka yena, ú tsarile risimu leri:

¹⁰ “A ndzi anakanya leswaku ndzi ya eku feni nkarhi wa mina wu nga si fika, ndzi ya nghena exivandleni xa vafi ndzi nga si hanya malembe layo tala.

¹¹ A ndzi ku ndzi nge he voni HOSI Xikwembu ndzi ri emisaveni ya lava hanyaka, ni leswaku a ndzi nga ha vonani na vanhu, hi ku ya tshama laha swilo hinkwaswo swi helelaka kona.

¹² Ndzi tekeriwa vutomi bya mina, ku fana ni loko varisi va simula mintsonga, va rhurha; ndzi fana ni muluki, loko a dlayiseta ntirho wa yena, a tsema tingoti lomu makumu: Vutomi bya mina byi tsemisiwa sweswo, siku hinkwaro, we HOSI, u le ku ndzi hetiseni.

¹³ “Ndzi konyile, ri ko ri xa, hikuva a wu tshova marhambu ya mina, wonge u nghala; siku hinkwaro, we HOSI, u le ku ndzi hetiseni.

¹⁴ “A ndzi rila kukota mbewulani, ndzi gomela ku fana ni tuva, mahlo ya mina ma karhala hi ku languta etilweni. We n'wini wanga, ndzi biyelele ekhombyeni leri ndzi nga ka rona.

¹⁵ Xana xi kona lexi ndzi nga ha xi vulaka xana? HOSI Xikwembu xi ndzi byerile leswaku hi xona xi vangeke swilo leswi. Vurhongo a bya ha phahi niswitsongo, hikuva ndzi khunguvanyekile emoyeni.

¹⁶ “We n'wini wanga, swilo swo fana ni leswi swi endla leswaku vanhu va hanya. Hambi wu ri moya wa mina, wu kume vutomi loko swi ndzi humelerile; sweswi ndzi kombela leswaku u ndzi horisa, ndzi tlhela ndzi hanya.

¹⁷ Ku xaniseka loku ndzi veke na kona ku ndzi pfunile swinene; hi wena u endleke leswaku vutomi bya mina byi nga ngheni ekheleni lera tihanyi; u ndzi rivalerile ni swidyoho swa mina hinkwaswo.

¹⁸ Xivandla xa vafi xi nga ka xi nga ku nkhensi, ni rifu ri nge ku dzunisi! Vanhu lava nga emasirheni, a va ha voni ku tshembeka ka wena.

¹⁹ Vanhu lava hanyaka, hi vona ntsena lava kotaka ku ku nkhensa, ku fana na mina ndzi ku nkhensaka sweswi; vatswari a va dyondzise vana va vona leswaku u Xikwembu xo tshembeka.

²⁰ “HOSI Xikwembu xi ta ndzi hanyisa! A hi chayeni tiharipa, hi xi dzunisa; hi ta hamba hi xi dzunisa endlwini ya xona vutomi bya hina hinkwabyo.”

²¹ Kutani Esaya a ku: “Tisani ximbhundzwa xa makuwa, mi xi bohelela laha Hezekiya a twaka ku vava kona, leswaku a ta hola.”

²² Kavaloko Hezekiya a ku: “Xana hi swihi leswi nga ta komba leswaku ndzi ta swi kota ku tlhandlukela endlwini ya HOSI Xikwembu xana?”