Esaya 34 - BIBELE Mahungu Lamanene

Ta ku herisiwa ka tiko ra Edomu

¹ N'wina vanhu va matiko hinkwawo, tshinelani kusuhi, rhiyani ndleve, mi yingisa! We misava yingisa, ni hinkwaswo leswi nga ka wena, rhiya ndleve we ntumbuluko, ni hinkwaswo leswi hanyaka eka wena.

² HOSI Xikwembu xi hlundzukela matiko hinkwawo, vukari bya xona byi pfurhela vaaki va wona hinkwavo; xi lava ku va nyiketa, va dlayiwa hinkwavo va hela.

³ Loko va ta va va dlayiwile, a va nga lahliwi, mintsumbu ya vona yi ta bola, risema ri twala hinkwako, tintshava ti ta khuluka hi ngati ya vona.

⁴ Dyambu ni tinyeleti hinkwato swi ta phemeleleka, matilo ma ta songiwa kukota dzovo; tinyeleti hinkwato ti ta dzudzeka kukota matluka ya vhinya kumbe ya nkuwa.

⁵ HOSI Xikwembu xi hlomurile fumu ra xona ematilweni, xi lava ku xika xi tlhava Vaedomu, va nga vanhu lava xi tiyimiseleke ku va herisela makumu.

⁶ Fumu ra HOSI Xikwembu ri ta xurha hi ngati, ri ntonta ni mafurha, wonge ri lo tlhava tinyimpfu ni timbuti, ri endla magandzelo hi ngati ni mafurha ya kona. HOSI Xikwembu xi lava ku endla magandzelo eBosira, xi dlayetela vanhu etikweni ra Edomu.

⁷ Tinyarhi na tona ti ta tlhaviwa, ku ta wa ni swinkuzana ni tinkuzi, misava yi ta nwa ngati ya swona yi xurha, masimu ma ta nonisiwa hi mafurha ya swona.

⁸ HOSI Xikwembu xi na rona siku ro tirihisela, ra ta lembe leri xi nga ta rihiseta valala va muti wa Siyoni.

⁹ Mati ya milambu ya tiko ra Edomu ma ta hundzuka ntita, misava ya rona yi hundzuka xivavula, tiko hinkwaro ri ta pfurha kukota ntita.

¹⁰ Vusiku ni nhlekanhi ndzilo wu ta pfurha wu nga timeki, musi wu ta tshama wu ri karhi wu tuvika. Tiko ra Edomu ri ta va mananga hilaha ku nga heriki, ku nge tsemakanyi munhu etikweni leri ni siku ni rin'we.

¹¹ Ri ta hundzuka kaya ra makhuhunu ni tinungu, swinkhovha ni mawukuwuku swi ta tshama kona. HOSI Xikwembu xi ta endla leswaku tiko leri ri nga ha vi na xivumbeko, ri sala ri nga ri na nchumu.

¹² A ku nga ha vi na loyi a nga ta vekiwa ku va hosi etikweni leri, varhangeri hinkwavo va ta nyamalala.

¹³ Makhokholo ma ta tlhuma hi mitwa, miti leyi biyeleriweke yi ta tala hi mahlwehlwe ni swigatlu, mahlolwa ma ta rhendzeleka-rhendzeleka kona, ni tiyimbhu ti ta tshama kona.

¹⁴ Timhisi ni swiharhi swin'wana swa nhova swi ta hlanganela kona, kona ku ta twala swiphongho leswi vitananaka; miswoono yi ta phatsama kona, yi ta va yi kume ndhawu yo wisela eka yona.

¹⁵ Swinkhovha swi ta aka swisaka emarhumbini lawa, swi tshikela mandza, swi ta tlhotlhorha swi tlhela swi kurisa mavondlo eka wona, van'warikapanyana va ta hlanganela kona, un'wana ni un'wana a ta ni munghana wa yena.

¹⁶ Tekani buku ya HOSI Xikwembu mi hlaya hi ku xiyaxiya: A ku na xin'we xa leswi vuriweke lexi nga ta pfumaleka, a ku na xin'we xa swona lexi nga ta pfumala munghana. HOSI Xikwembu hi xona xi swi leriseke, hinkwaswo swi hlengeletiwile hi Moya wa xona.

¹⁷ HOSI Xikwembu xi swi avela tindhawu, xi swi bela ni mindzilekana; tiko ra Edomu ri ta va kaya ra swona hilaha ku nga heriki, swi ta tshama eka rona minkarhi hinkwayo.