Esaya 33 - BIBELE Mahungu Lamanene

Muhlaseri ú ta hlaseriwa

¹ U ni khombo, wena la hlaselaka van'wana, kambe u nga hlaseriwi hi munhu, wena la kanganyisaka van'wana, kambe u nga kanganyisiwi hi munhu! Loko u hetile ku hlasela van'wana, va ta ku hlasela na wena, ni loko u hetile ku kanganyisa van'wana, va ta ku kanganyisa na wena.

² We HOSI Xikwembu, hi twele vusiwana; hi langutela ku pfuniwa hi wena. Hi nyike matimba siku rin'wana ni rin'wana, u hi ponisa eku xanisekeni ka hina.

³ Loko vamatiko va twa mpfumawulo wa rito ra wena, va suka va tsutsuma, loko u tlakuka, va hangalaka,

⁴ kutani swilo swa vona swi phanghiwa wonge swi lo nghenela hi switsotso, vanhu va swi tlulela, wonge vo va tinjiya.

⁵ HOSI Xikwembu xa dzunisiwa, hikuva xi le henhla ka hinkwaswo, xi ta funengeta muti wa Siyoni hi milawu leyinene, leyi lulameke.

⁶ N'wina va le Yerusalema, hi xona lexi nga ta mi tiyisa emasikwini ya ku hanya ka n'wina, xi ta mi ponisa minkarhi hinkwayo, xi mi nyika vutlhari ni vutivi, ku chava HOSI Xikwembu ri ta va rifuwo ra n'wina lerikulu.

Xikwembu xi ta herisa valala va xona

⁷ Twanani, tinhenha ti le ku cemeni emagondzweni, lava rhumiweke ku ya kombela leswaku matlhari ma vekiwa hansi, va rila hi xiviti.

⁸ Magondzo lamakulu ma hundzuke mananga, vahundzi va ndlela va nyamalarile. Mintwanano ya tshoviwa, timbhoni ta soriwa, vanhu a va ha vuriwi nchumu.

⁹ Tiko ri omile, a ra ha ri na nchumu, mirhi ya Lebanoni ya nyumisa, yi vunile; rivala ra Xaroni ri hundzuke rikhwarha, eBaxani ni le Karmele, mirhi a ya ha ri na matluka.

¹⁰ HOSI Xikwembu xi ri: “Sweswi ndzi ta suka ndzi yima, ndzi ta tlakuka ndzi komba ku dzuneka ka mina.

¹¹ Makungu ya n'wina i byanyi lebyi omeke, leswi mi swi endlaka i mavivi ntsena; vukari bya n'wina i ndzilo lowu nga ta tlhela wu hisa n'wina.

¹² N'wina vanhu va matiko, mi ta tshwa ku sala nkuma, mi ta fana ni mitwa leyi tsemiweke, yi hisiwa.

¹³ N'wina mi nga ematikweni ya le kule, rhiyani ndleve mi twa leswi ndzi swi endleke; n'wina mi nga kusuhi, pfumelani leswaku hakunene ndzi ni matimba.”

¹⁴ Vadyohi lava nga kona emutini wa Siyoni va tela hi rhumbu, lava nga vuliki nchumu hi Xikwembu va rhurhumela hi ku chava, va vutisana va ku: “Exikarhi ka hina, xana ú kona loyi a nga tshamaka ni ndzilo lowu hisisaka leswi, xana? Xana ú kona loyi a nga tiyiselaka malangavi yo ka ya nga timeki, xana?”

¹⁵ Leswi swi kota hi lava hanyaka vutomi lebyinene, lava vulavulaka ntiyiso, lava nyenyaka ku kuma rifuwo hi ku xanisa van'wana, vanhu lava nga pfumeriki ku fumbarherisiwa swo va xava, lava nga laviki ku twa nchumu hi ku halata ngati, lava nga tihlanganisiki ni lava endlaka leswo homboloka.

¹⁶ Vanhu vo tano, va ta tshama etinhlohlorhini ta tintshava, maribye ma ta hundzuka makhokholo yo va biyelela eka valala, va ta kuma swakudya, ni mati a va nga ma pfumali.

¹⁷ Ra ta siku leri mi nga ta vona hosi ni ku dzuneka ka yona, mi ta vona ni tiko leri andlaleke ri nava ri ya kule.

¹⁸ Swilo leswi a mi swi chava khale, swi to sala emiehleketweni ntsena; mi ta vutisana mi ku: “Xana vanhu lava a va hlaya leswi phanghiweke, ni mindzuvo, ni swihondzo, va helele kwihi xana?”

¹⁹ Vanhu va tihanyi lava a va vulavula ririmi rimbe, leri a mi nga koti ni ku ri twisisa, a mi nga ha va voni!

²⁰ Langutani muti wa Siyoni, laha hi endlaka kona minkhuvo leyi vekiweke, vonani Yerusalema, muti wo rhula lowu fanaka ni ntsonga lowu nga ha rhurhisiwiki! Timhingu ta wona ti nga ka ti nga ha simuriwi ni siku ni rin'we, hambi ti ri tintambhu ta wona ti nga ka ti nga ha tsemiwi.

²¹ Emutini lowu, HOSI Xikwembu xi ta hi komba ku dzuneka ka xona, eka wona ku ta khuluka milambu leyikulu ni swinambyana, kambe a ku nga fambi swikwekwetsu emilambyeni leyi, hambi ti ri tingalava ta matiko a ti nga hundzi hi kona.

^22-23 Tintambhu ta tingalava leti nga tshukaka ti hundza hi kona, ti ta debya, timhandze ta tona a ti nga tiyi, maseyila ma ta va ma nga vambekanga. Kutani hi ta phangha swilo swa vona hinkwaswo hi avelana swona, hambi swi ri swilema, swi ta ya eku phangheni. HOSI Xikwembu hi xona xi nga ta va mulweri ni mufumi wa hina, xi ta va hosi ya hina leyi nga ta hi ponisa.

²⁴ Emutini lowu, a ku nga vi na muvabyi na un'we, vanhu hinkwavo lava tshamaka etikweni leri, va ta va va rivaleriwile swidyoho swa vona.