Esaya 3 - BIBELE Mahungu Lamanene

Mpfilumpfilu emutini wa Yerusalema

¹ Vonani, HOSI ya matimba hinkwawo N'wini wa hinkwaswo, ú lava ku tekela va ka Yuda ni muti wa Yerusalema leswi swi va seketelaka ni ku va hanyisa; ú ta va tekela swakudya hinkwaswo ni mati hinkwawo,

² a teka tinhenha ni masocha, vaavanyisi ni vaprofeta, vangoma ni vakulukumba;

³ ú ta va tekela vafambisi va mavuthu ni tindhuna ta tiko, a teka vatsundzuxi va hosi ni vangoma lavo tiveka, ni lava kotaka ku endla swihlamariso.

⁴ HOSI Xikwembu xi ri: “Ndzi ta veka vafana va va tihosi ta vona, va ta fumiwa hi swihlangi;

⁵ vanhu hinkwavo va ta xanisana, hambi va ri vaakelani va ta tshikelelana, lavatsongo a va nga vi na xichavo eka lavakulu, ni swikamba a swi nga ha xiximi lavo chaviseka.”

⁶ Enkarhini wolowo, vanhu va ta ya eka un'wana wa ka vona, va fika va ku ka yena: “Wena u ni xiambalo; u ta va murhangeri wa hina, marhumbi lawa ma ta va ehansi ka wena.”

⁷ Kutani yena ú ta hlamula a ku: “Ndzi nge swi koti ku va n'anga; emutini wa mina, swakudya kumbe swiambalo ku hava; mi nga ndzi endli murhangeri wa tiko!”

⁸ Muti wa Yerusalema ni tiko ra Yuda swi khugukile swi wa, hikuva marito ni swiendlo swa vanhu va kona swi landzula HOSI Xikwembu, swi sola ku kwetsima ka xona.

⁹ Tinghohe ta vona ta va mangalela, swidyoho swa vona va swi paluxa ku fana ni va le Sodoma, a va swi tumbeti. Va le khombyeni! va lo tivangela rona hi voxe.

¹⁰ Lava lulameke va katekile, va ta dya mihandzu ya mintirho ya vona.

¹¹ Lavo homboloka va le khombyeni! Vutomi byi ta va tikela, va ta tshovela leswi va swi byaleke.

¹² Vanhu va mina va fambisiwa hi vana, va fumiwa hi vavasati. N'we vanhu va mina, varhangeri va n'wina va mi lahla, va mi hambukisa endleleni leyinene.

Xikwembu xi tshinya varhangeri va tiko

¹³ HOSI Xikwembu xi lava ku tengisa vanhu milandzu, xi tilulamisela ku avanyisa vanhu va xona.

¹⁴ HOSI Xikwembu xi boxa nandzu wa varhangeri ni vakulukumba va tiko ra xona, xi ri: “Hi n'wina mi onheke nsimu ya mina ya vhinya, mi tate tindlu ta n'wina hi leswi mi swi phangheke eka swisiwana.

¹⁵ Xana mi xanisela yini vanhu va mina, mi kandziyelela yini swisiwana ehansi xana?” N'wini wa hinkwaswo ú vurisa sweswo, yona HOSI ya matimba hinkwawo.

Vavasati va Yerusalema va ta wela ekhombyeni

¹⁶ HOSI Xikwembu xi ri: “Vavasati va Yerusalema, a hi manyunyu ya vona! va famba va yimisele tinhamu ehenhla, va ni vutlhoma-mahlo ngopfu. Va famba wonge matsolo ya lo bohiwa, va chakayila hi masindza ya milenge.

¹⁷ Hikokwalaho, vavasati va Siyoni, mina HOSI N'wini wa hinkwaswo ndzi ta va guvula misisi hi mantshasi, va sala ni mimpandla.”

¹⁸ Esikwini ra kona, HOSI Xikwembu xi ta tekela vavasati lava swilo swo tibombisa ha swona: Masindza ya le milengeni, ni swo boha ha swona misisi, ni masindza ya le nhan'wini,

¹⁹ ni swingwavila swa le tindleveni, ni vuhlalu, ni maduku ya le nhan'wini,

²⁰ ni ya le tinhlokweni, ni vusenga bya le mavokweni, ni swo tikhama ha swona, ni swifukwana swa mafurha layo nun'hwela, ni timbamba,

²¹ ni swingwavila swa le tintihweni ni swa le tinhompfini,

²² ni minceka leyo leha ya minkhuvo, ni leyo rhangisa, ni leyo tlhandlekela ehenhla, ni tifuneko,

²³ ni minceka leyo vonikela, ni leyi lukiweke hi ntsembyani, ni swihuku, ni minturhu.

²⁴ Ematshan'wini ya mafurha layo nun'hwela, ku ta twala ku nun'hwa ka leswo bola ntsena; va ta tikhama hi ntambhu ematshan'wini ya nkhamo; ematshan'wini ya misisi leyi lukiweke, ku ta vonaka mpandla ntsena; va ta tikhumbarheta hi masaka, ematshan'wini ya minceka leyinene; vumbhurhi bya vona byi ta hundzuka tingana.

²⁵ We Yerusalema, vavanuna va wena va ta hela hi fumu, tinhenha ta wena ti ta fela enyimpini.

²⁶ Etinyangweni ta wena ku to twala swirilo ni minkosi ntsena; u ta tekeriwa hinkwaswo, u sala u lo gòò!