Esaya 27 - BIBELE Mahungu Lamanene

¹ Enkarhini wolowo, HOSI Xikwembu xi ta teka fumu ra xona lero nonon'hwa, rona lerikulu ra matimba, xi ba Levhiyatani nyoka leya rivilo, leyo tshombonyoka-tshombonyoka; xi ta dlaya na dragona nyoka ya le lwandle.

Xikwembu xi ta hlayisa nsimu ya xona ya vhinya

² Enkarhini wolowo, HOSI Xikwembu xi ta ku: “Ndzi ni nsimu leyinene ya vhinya, yimbelelani, mi yi dzunisa!

³ Mina HOSI, ndzi muhlayisi wa yona, nkarhi wun'wana ni wun'wana, ndza yi cheleta; ndzi yi rindza vusiku ni nhlekanhi, leswaku ku nga vi na munhu loyi a yi onhaka.

⁴ A ndza ha yi kariheli. Loko ko va ni mitwa ni swigatlu eka yona, ndzi ta lwa na swona, ndzi swi hlengeleta ndhawu yin'we, ndzi swi hisa,

⁵ kambe loko swi tsakela leswaku ndzi swi sirhelela, a swi twanane na mina, swi endla xinakulobye na mina.”

⁶ Eminkarhini leyi taka, va ka Yakobo va ta va ni timitsu, Vaisraele va ta hluka, va phaka marhavi; misava hinkwayo yi ta tala hi mihandzu ya vona.

⁷ Xana HOSI Xikwembu xi bile Vaisraele ku fana ni leswi xi biseke swona lava va va beke xana? Xana xi dlayile Vaisraele ku fana ni leswi xi dlayiseke swona lava va va dlayeke xana?

⁸ HOSI Xikwembu a xi va banga ku tlula mpimo, xi lo va yisa evukhumbini, xi va rhwarile hi moya wa xona wa matimba wo fana ni xidzedze xo huma evuxeni.

⁹ Ku hela ka nandzu wa va ka Yakobo ni ku susiwa ka vudyoho bya vona, swi ta tikomba hi loko va mbundzumuxa tialitari hinkwato, va fayetela maribye ya tona ma va mapa, va wisetela timhandze ta Axera xikwembukazi, ni tialitari ta mirhi ya risuna.

¹⁰ Muti lowu a wu biyeriwile, wu ta hundzuka rhumbi, a ku nga ha tshami munhu eka wona, wu ta sala wu fana ni mananga; marhole ma ta dya eka wona, ma tlhela ma vundza kona, ma dya ni matluka ya mirhi.

¹¹ Loko marhavi ya kona ma ta va ma omile, ma ta tshoveka ma wa, kutani vavasati va ta tshivela ndzilo ha wona. Vanhu lava a va twisisi, hikokwalaho muendli wa vona a nge va tweli vusiwana, a nga ka a nga va tsetseleli, muvumbi wa vona.

¹² Enkarhini wolowo, n'wina Vaisraele, HOSI Xikwembu xi ta mi hlengeleta hinkwenu, ku sukela enambyeni wa Yufrata ku ya fika endzilekaneni wa Egipta; swi ta fana ni loko va hula koroni, va hlengeleta tindzhoho ta yona.

¹³ Enkarhini wolowo ku ta biwa mhalamhala, kutani lava nga lahleka va ya etikweni ra Asiriya, ni lava hlongoriweke va ya le Egipta, va ta vuya, va ta gandzela HOSI Xikwembu va ri entshaveni leyo hlawuleka ya le Yerusalema.