Esaya 26 - BIBELE Mahungu Lamanene

Risimu ro dzunisa muti wa Yerusalema

¹ Enkarhini wolowo, va le Yuda va ta yimbelela risimu leri nge: “Hi ni muti lowu tiyeke swinene, rirhangu ra wona ni makhokholo ya wona i HOSI Xikwembu, hikuva hi xona xi hi ponisaka.

² Pfulani tinyangwa, leswaku vanhu lavo lulama, lava tshembekaka, va ta nghena.

³ We HOSI, vanhu lava va langutaka eka wena, lava va ku tshembaka, u va nyika ku rhula loku hetisekeke.

⁴ Tshembani HOSI Xikwembu hilaha ku nga heriki, hikuva hi xona Ribye ra vutumbelo, leri nga ta va kona hilaha ku nga heriki.

⁵ HOSI Xikwembu xi tsongahatile vaaki va muti lowu akiweke ehenhla ka xintshabyana, wa tindlu leto leha, xi mbundzumuxa muti wa vona, xi wu herisa, wu wela ehansi;

⁶ kutani vanhu lava nga swisiwana, lava pfumalaka swa le mandleni, va famba ehenhla ka muti lowu, va wu kandziyela.”

Xikwembu xi hlayisa vanhu va xona

⁷ We HOSI, munhu wo lulama, u n'wi khulelela ndlela leyinene, budula leri a fambaka ha rona, ri basile.

⁸ Hambiloko u hi ba, we HOSI, a hi tshiki ku ku tshemba; ku navela ka hina lokukulu i ku anakanya vito ra wena.

⁹ Moya wanga wu lava wena, hambi byi ri vusiku, exihundleni xa mbilu yanga, ndzi navela wena; loko u ba vanhu lava nga misaveni, va dyondza ku endla leswi lulameke.

¹⁰ Loko lowo homboloka a tweriwa vusiwana, a nga dyondzi leswi lulameke; hambi a tshama tikweni ra lavo lulama, yena ú endla leswo homboloka, a nga voni ku dzuneka ka wena, we HOSI.

¹¹ U tlakusile voko ra wena, we HOSI, kambe a va ri voni. Va kombe leswaku u hisekela vanhu va wena, va ta khoma hi tingana, va herise hi ndzilo lowu a wu wu lunghisele valala va wena!

¹² We HOSI, u ta hi tisela ku rhula, hikuva hinkwaswo leswi hi koteke ku swi endla, hi swi endlile hi matimba ya wena.

¹³ HOSI, Xikwembu xa hina, ku vile ni vanhu van'wana lava tiendleke tihosi ta hina, kambe hina hi tiva wena ntsena.

¹⁴ Vanhu volavo sweswi va file, va nga ka va nga ha pfuki; va celeriwile emasirheni, va nga ka va nga ha humi; hi wena HOSI u va yeleke, u va ba u va herisa, ku nga sali na un'we loyi vanhu va nga ta va tsundzuka ha yena.

¹⁵ Kambe we HOSI, u engetelerile vanhu va Israele, u va engetelerile va tala, hikokwalaho, va ku dzunisa; tlhandlakambirhi, u tlhengusile mindzilekana, u kurisa tiko ra vona.

¹⁶ We HOSI, Vaisraele va ku tsundzukile loko va ri eku vavisekeni; loko u va tshinya, va tile va ta rila ka wena.

¹⁷ Hikwalaho ka leswi u hi endleke swona, we HOSI, hi tshombonyokile hi rila, ku fana ni wansati loyi a nga kusuhi ni ku tintshunxa, loko a twa switlhavi.

¹⁸ A hi endla wonge hi tikile, hi tshombonyoka-tshombonyoka, kambe a hi humesanga nchumu. Tiko ra hina a hi ri ponisanga, naswona a ku velekiwanga vanhu van'wana lava nga ta tshama emisaveni.

¹⁹ Va ka hina lava feke, va ta tlhela va hanya, va ta huma emasirheni ya vona; hinkwavo lava nga hansi emisaveni, va ta yima va yimbelela hi ntsako, hikuva we HOSI Xikwembu, u fana ni mberha leyi hanyisaka swimilana: U ta endla leswaku lava feke khale, va tlhela va hanya.

Xikwembu xi ta avanyisa matiko

²⁰ N'we vanhu va ka hina, nghenani tindlwini, mi tipfalela kona, mi tumbela kona nkarhinyana, ku kondza vukari bya HOSI Xikwembu byi rhelela.

²¹ Vonani, HOSI Xikwembu xa ta, xi suka lomu xi tshamaka kona; xi tela ku ta ba vanhu va matiko hinkwawo hikwalaho ka swidyoho swa vona. Misava yi ta paluxa ngati leyi halateriweke eka yona, vanhu hinkwavo lava dlayiweke, yi ta va humesela erivaleni.