Esaya 23 - BIBELE Mahungu Lamanene

Ku hlaseriwa ka muti wa Tiri ni wa Sidoni

¹ Lawa i mahungu hi tlhelo ra Tiri: Tlhavani mukhosi, n'we mi nga tingalaveni ta Tarxixi, hikuva le Tiri, ku lo sala marhumbi ntsena, a ka ha ri na yindlu; loko mi fika mi huma exihlaleni xa Kipra, mi ta swi kuma swi ri tano.

² N'wina mi akeke eribuweni ra lwandle, n'we van'wamabindzu va le Sidoni, miyelani mi ku whíí! Lava mi va rhumeke, va tsemakanyile malwandle,

³ va perile milambu yo tala; mavele ya le Xihoro lama tshoveriwaka eribuweni ra Nilo, mi endlile bindzu ha wona, mi famba mi xavisa ematikweni.

⁴ We Sidoni khokholo ra le lwandle, nyuma, hikuva lwandle ri vulavula ri ku: “Mina a ndzi si tshama ndzi veleka, a ndzi na n'wana wa mufana, hambi wa nhwanyana, ndzi hava!”

⁵ Vaegipta va ta hela matimba, loko va twa ta ku herisiwa ka Tiri.

⁶ Banani nkalanga, n'wina vaaki va le ribuweni ra lwandle, balekelani eTarxixi.

⁷ Xana muti lowu, a hi wona lowu a mi tinyungubyisa ha wona, mi ku wu ve kona ku sukela khale ka khale, xana? Xana a hi wona lowu humeseke vanhu, lava nga ya aka ematikweni ya le kule xana?

⁸ Xana i mani la endleke makungu ya ku herisa muti lowu wa Tiri, lowu a wu veka vanhu va wona va va tihosi, lowu van'wamabindzu va wona a va ri varhangeri, va xiximiwa ematikweni hinkwawo, xana?

⁹ Makungu ya kona ma endliwe hi HOSI ya matimba hinkwawo leswaku hinkwavo lava titshembaka, va lahlekeriwa hi ku saseka ka vona, ni leswaku lava xiximiwaka ematikweni hinkwawo va yisiwa ehansi.

¹⁰ N'wina vaaki va le Tarxixi, rimani masimu ku fana ni lava nga ribuweni ra Nilo, hikuva eTiri a ka ha ri na hlaluko.

¹¹ HOSI Xikwembu xi tlakusile voko ra xona ri fika entsungeni wa lwandle, xi tsekatsekisa matiko; xi lerisile leswaku makhokholo ya Vakanana ma mbundzumuxiwa.

¹² Xi vurile xi ku: “N'wina vaaki va Sidoni, a mi nga ha bi minkulungwana, mi ta fana ni nhwanyana la pfinyiweke; sukani mi yima, mi balekela exihlaleni xa Kipra; na kwale, a mi nga kumi ku wisa.”

¹³ Vanhu lava endleke leswaku muti wa Tiri wu hundzuka kaya ra swiharhi swa nhova, a hi Vaasiriya; i Vakalediya: Va akile swihondzo, va rhendzela muti ha swona, kutani va wu nghenela, va wisetela makhokholo, va wu siya wu ri rhumbi.

¹⁴ Tlhavani mukhosi, n'we mi nga tingalaveni ta Tarxixi, hikuva muti lowu a mi tshemba wona, wu hundzuke rhumbi.

¹⁵ Eminkarhini yoleyo, muti wa Tiri wu ta rivariwa, ku kondza ku hela malembe ya 70, wu nga nkarhi wo ringana ni lowu hosi yin'we yi hanyaka wona. Loko malembe ya 70 ma ta va ma hundzile, muti wa Tiri wu ta fana ni nghwavava leyi hlekiwaka hi risimu leri nge:

¹⁶ “We nghwavava leyi rivariweke, teka haripa, u rhendzeleka na muti! Chaya swi tsokombela swinene, u yimbelela tinsimu leto tala, leswaku vavanuna va ta ku tsundzuka!”

¹⁷ Endzhaku ka malembe ya 70, HOSI Xikwembu xi ta endla leswaku muti wa Tiri wu tlhelela entirhweni wa wona wa khale, wu ta tlhela wu tinyiketela ku endla bindzu ni matiko hinkwawo lama nga kona emisaveni.

¹⁸ Mali leyi vaaki va Tiri va nga ta yi kuma emabindzwini ya vona, va ta yi nyiketa eka HOSI Xikwembu; a yi nga hlengeletiwi yi vekiwa, kambe yi ta tirha ku xava swakudya leswo tala ni swiambalo leswo saseka, swi nyikiwa lava tirhelaka HOSI Xikwembu.