Esaya 22 - BIBELE Mahungu Lamanene

Muti wa Yerusalema wu ta wela ekhombyeni

¹ Lawa i mahungu hi tlhelo ra Nkova wa Swivono: Xana swi lo yini ke, leswi mi khandziyeke eswihlungwanini swa tindlu hinkwenu ke?

² Xana i huwa ya yini, mi bela yini pongo ni minkulungwana emutini, hikuva vanhu va ka n'wina lava feke, a va dlayiwanga hi fumu, naswona a va felanga enyimpini!

³ Varhangeri va n'wina hinkwavo lava a va baleke swin'we, va lo khomiwa kunene, a va copiwanga hi nseve; hinkwavo va ka n'wina lava kumiweke, va khomiwile, hambileswi a va tsutsumele kule.

⁴ Hikokwalaho, ndzi kombela leswaku mi nga ndzi languti, ndzi tshikeni ndzi rila hi xiviti, va ka hina va herile, mi nga tikarhati hi ku ndzi khongotela.

⁵ HOSI ya matimba hinkwawo, n'wini wa hinkwaswo, hi yena la vekeke siku leri ra huwa ni mpfilumpfilu, eka Nkova wa Swivono, vanhu va kandziyeriwe ehansi; rirhangu ra muti ri wisiwile, nkalanga wu fikile etintshaveni.

⁶ Vanhu va tiko ra Elamu va tile va hlomile matlhari, va ri ni tigolonyi ta nyimpi ni vagadi va tihanci, va le Kiri va tile va khomile switlhangu.

⁷ Tindhawu ta n'wina leto saseka ta le minkoveni, a ti tele hi tigolonyi ta nyimpi, vagadi va tihanci va yile va ya yima etinyangweni.

⁸ Xisirhelelo xa va ka Yuda xi ta va xi susiwile! Enkarhini wolowo, mi lavile matlhari ya n'wina endlwini leyi vuriwaka “Yindlu-ya-Xihlahla”.

⁹ Mi valangile muti wa Davhida, kutani mi kuma leswaku rirhangu ra wona ri handzukerile ngopfu; mi hlengeletile mati eka Xihlovo-xa-le-Hansi,

¹⁰ kutani mi hlaya tindlu ta muti wa Yerusalema, mi faya tin'wana leswaku mi kota ku pfuxa rirhangu hi maribye ya tona.

¹¹ Exikarhi ka makhumbi mambirhi ya rirhangu, mi cerile khele ro hlayisa mati lama humaka eka Xihlovo-xa-Khale. Kambe a mi vulanga nchumu hi Xikwembu lexi endleke leswaku swilo leswi hinkwaswo swi va kona; a mi tsundzukanga leswaku makungu ya kona xi ma endlile khale.

¹² Enkarhini wolowo, HOSI ya matimba hinkwawo, N'wini wa hinkwaswo, a a langutela leswaku mi ta rila nkosi, mi byewula tinhloko, mi ambala swiambalo leswo khwaxa.

¹³ Kambe ematshan'wini ya sweswo, ku vile ni ntsako, ku biwa minkulungwana, ku tlhaviwa tihomu ni tinyimpfu, ku dyiwa tinyama, ku nwiwa ni vhinyo, vanhu va ku: “A hi dyeni, hi nwa, ha ha hanya!”

¹⁴ Kambe HOSI ya matimba hinkwawo yi ndzi byerile, yi ku: “Ndzi nga ka ndzi nga va rivaleli vudyoho lebyo tano, va kondza va fa!” HOSI ya matimba hinkwawo, N'wini wa hinkwaswo, ú vurisa sweswo.

Xebina ú ta susiwa entirhweni, ku nghenisiwa Eliyakimi

¹⁵ HOSI ya matimba hinkwawo N'wini wa hinkwaswo, a ndzi lerisa ku ya eka Xebina mulanguteri wa le ntsindza, ndzi fika ndzi ku ka yena:

¹⁶ “Xana wena u tivona u ri mani, naswona u nyikiwile hi mani mpfumelelo wo tilunghisela sirha; hikwalaho ka yini u ya kovotla ribye exintshabyanini, u tilulamisela ndhawu leyi u nga ta lahliwa eka yona, xana?

¹⁷ Sweswi, we wanuna wa matimba, HOSI Xikwembu xi ta ku cukumeta u ya ku nsá, ehansi, xi ta ku khoma xi ku manya swinene,

¹⁸ xi ku ndziwilita u sala u fana ni ribye ra xirhendzevutana, kutani xi ku cukumeta u ya wela etikweni lero anama swinene, laha u nga ta fela kona, u ri ni makalichi lawa u tinyungubyisaka ha wona. Wena, u khomisa n'wini wa wena tingana.”

¹⁹ HOSI Xikwembu xi vurisa sweswo, xi ri: “Ndzi ta ku hlongola entirhweni wa wena, ndzi ku susa exitulwini xa wena.

²⁰ Esikwini rero, ndzi ta vitana nandza wa mina Eliyakimi n'wana Hilkiya,

²¹ ndzi ta n'wi ambexa xiambalo xa wena xa ntirho, ndzi n'wi khama hi vamba ra kona, ndzi veka emavokweni ya yena hinkwaswo leswi wena a wu swi tirha. Eliyakimi ú ta va tata wa vaaki hinkwavo va muti wa Yerusalema ni vanhu hinkwavo va Yuda.

²² Ndzi ta n'wi tamerisa ni swilotlelo swa mfumo wa ka Davhida; loko yena a pfula, ku hava loyi a nga ta pfala, ni loko a pfarile, ku hava loyi a nga ta pfula.

²³ Ndzi ta n'wi belela a tiya, ku fana ni mhingu leyi beleriweke yi tiya swinene. Va ka vona va ta tidzunisa hi yena.

²⁴ Vona ni vana va vona hinkwavo va ta tiseketela hi yena, va n'wi teka a ri mhingu yo hayeka eka yona swilo hinkwaswo, hambi leswikulu, kumbe leswitsongo.

²⁵ Siku rero, mina HOSI ya matimba hinkwawo ndzi vula ndzi tiyisile leswaku mhingu leyi a yi beleriwile yi tiya swinene, yi ta hlomuka yi wela hansi, ni swingolongondzwana leswi a swi hayekiwile eka yona, swi ta wa swi fayeka. Mina HOSI, ndzi vula sweswo!”