Esaya 16 - BIBELE Mahungu Lamanene

¹ Rhumelani vanhu n'wina Vamowabu, va suka emutini wa Sela emananga, va yisa swinyimpfana entshaveni ya Siyoni, va ya swi humesela hosi ya tiko ra Yuda,

² hikuva le mahlalukweni ya nambu wa Arinoni, vavasati va Mowabu va tsutsuma va ya hala ni hala, va fana ni tinyanyana leti hlongoriweke eswisakeni swa tona.

³ Khongelani va le Yuda, mi ku: “Hi tsundzuxeni, mi hi pfuna. Hi amukeleni, hi wisa ku fana ni vanhu lava wisaka endzhutini wa murhi ninhlekanhi. Tumbetani lava tsutsumeleke eka n'wina; lava balekeleke kwaleyo, va sirheleleni.

⁴ Lava hlongoriweke etikweni ra Mowabu, va tshikeni va luvela eka n'wina, va lweleni eka lava ringetaka ku va herisa.” Siku ra ta, leri lava va hi xanisaka ni ku hi dlaya, va nga ta nyamalala, ni lava va hi kandziyelaka va nga ta fambela makumu.

⁵ Enkarhini wolowo, ku ta vekiwa hosi exiluvelweni xa Davhida, leyi nga ta fuma hi tintswalo ni ku tshembeka; yi ta avanyisa hi ndlela leyinene, yi nge tshiki ku endla leswi lulameke.

⁶ Hi ti twile ta manyunyu ya Vamowabu, ni ku tikurisa ka vona; i vanhu vo titshemba ngopfu, lava tikukumuxaka, va nga vuli nchumu hi vanhu van'wana; kambe vo tibumabumela mahala!

⁷ N'wina Vamowabu, banani nkalanga hinkwenu, mi rilela tiko ra n'wina; bikulani swinene, mi rilela swimbhundzwa swa mihandzu ya vhinya leyi omisiweke swa le Kiri-Harasete.

⁸ Masimu ya le Hexiboni ma vunile, na yona mirhi ya vhinya ya le Sibima yi omile; tihosi ta matiko man'wana ti tsemelele marhavi ya yona ma wela hansi, ma nga marhavi lawa a ma lehile ma ya fika eYazere, ma nava ma ya ba emananga; a ma hluka ma andlala ma ya fika ematikweni, ma tsemakanya hi le lwandle.

⁹ Mirhi ya vhinya ya le Sibima ya ndzi ririsa, yi ndzi twisa mbilu ku vava ku fana ni muti wa Yazere; we Hexiboni, na we Eleyale, ndzi ta mi tsakamisa hi mihloti, hikuva emasin'wini ya n'wina ya mihandzu ni ya mavele, tinsimu ta ntsako a ta ha twali.

¹⁰ Emasin'wini layo nona, huwa ya ntsako yi nyamalarile, tinsimu ni swikhiyana a swa ha twali emasin'wini ya vhinya; lomu vhinya yi pyanyeriwaka kona, a ka ha ri na munhu, tinsimu ta ntsako ti herile.

¹¹ Ndzi rhurhumela kukota tingoti ta xipendana hikwalaho ka tiko ra Mowabu, muti wa Kiri-Herexe wu ndzi twisa mbilu ku vava.

¹² Vamowabu vo tikarhata ntsena, loko va tlhandlukela eswitsungeni leswo hlawuleka va ya khongela etitempeleni ta vona, hikuva a swi nga va pfuni nchumu.

¹³ Marito lawa, HOSI Xikwembu xi ma vurile khale hi tlhelo ra Mowabu;

¹⁴ kambe sweswi HOSI Xikwembu xi ri: “Loko ku nga si hundza malembe manharhu, ma nga malembe yo ringana ni lawa muthoriwa a tirhaka wona, leswi Vamowabu va tidzunisaka ha swona a swi nga ha vi nchumu. Tiko ra Mowabu ri ni vanhu vo tala swinene, kambe ri ta sala ni vanhu va nga ri vangani ntsena, naswona va ta va va tsanile swinene.”