Esaya 10 - BIBELE Mahungu Lamanene

Lava xanisaka swisiwana va ta biwa

¹ Va ni khombo lava vekaka ni ku humesa milawu yo homboloka leyi xanisaka vanhu:

² Va ala ku lwela vapfumari ehubyeni, va tekela swisiwana swa tiko ra mina leswi nga swa swona; hi ndlela leyi, va phangha swa tinoni, ni swa lava pfumalaka vatswari.

³ Xana mi ta endla yini siku mi nga ta biwa, loko xihuhuri xo huma kule xi mi tela xana? Xana mi ta tsutsumela kwihi, rifuwo ra n'wina mi ta ri siya na mani ke?

⁴ Ku to sala ntsena ku bvutama-bvutama exikarhi ka lava khomiweke, kumbe ku dlayiwa ni van'wana. Hambiswiritano, vukari bya HOSI Xikwembu a byi nga tlheli, xa ha ta tlakusa voko ra xona, xi mi ba.

⁵ HOSI Xikwembu xi ri: “Vaasiriya i nhonga leyi ndzi yi tirhisaka loko ndzi karihile, loko ndzi hlundzukile, hi wona nkhavi wa mina!

⁶ Ndzi va rhumile ku ya ba vanhu lava nga riki na mhaka na mina, ndzi va lerisa ku ya lwa ni lava va ndzi hlundzukiseke, va va hlasela, va phangha swa vona, va va kandziyela kukota ndzhope emagondzweni.”

⁷ Kambe hosi ya Asiriya a yi lavi swona ntsena, makungu ya yona ma tlula leswi: Yi ni makungu ya ku hlasela ni ku herisa vanhu va matiko layo tala.

⁸ Yi tidzunisa, yi ku: “Vafambisi hinkwavo va mavuthu ya mina i tihosi!

⁹ Ndzi hlurile muti wa Kalino ni wa Karkemixi, ndzi hlula ni wa Hamata ni wa Aripadi, hambi yi ri miti ya Samariya na Damaska na yona ndzi yi hlurile.

¹⁰ Ndzi humile ndzi ya hlasela matiko lama nga ni swikwembu leswi swifaniso swa swona swi tlulaka swa le Yerusalema na Samariya.

¹¹ Leswi ndzi swi endleke ehenhla ka muti wa Samariya ni swifaniso swa wona swa swikwembu, xana ndzi nga tsandza ha yini ku swi endla muti wa Yerusalema ni swikwembu swa wona ke?”

Hosi ya Asiriya yi ta biwa

¹² Loko N'wini wa hinkwaswo a heta hinkwaswo leswi a swi endlaka entshaveni ya Siyoni ni le mutini wa Yerusalema, ú ta ba hosi ya Asiriya, hikuva yi titshemba ngopfu ni ku tikurisa ku tlula mpimo.

¹³ Yi tidzunisa yi ku: “Matimba ya mina, hi wona ma tirheke swilo leswi, ndzi swi endlile hi vutlhari bya mina, hikuva ndzi kota ku twisisa; mindzilekana ya matiko ndzi yi herisile, kutani ndzi phangha xuma xa wona; ndzi nghenile ku fana ni nkuzi, ndzi susa tihosi eswiluvelweni swa tona.

¹⁴ Rifuwo ra matiko, ndzi ri kumile ku fana ni loko munhu a thumbha xisaka xa xinyanyana; ndzi teketerile matiko hinkwawo, wonge mo va matandza lama siyiweke hi xinyanyana; a ku ri hava xo tlakusa rimpapa, kumbe ku pfula nomo; ni xo cema a xi nga ri kona.”

¹⁵ Xana xihloka xi nga kulela loyi a tsemaka ha xona, kumbe saha yi tivona yi ri ni matimba ku tlula loyi a tirhaka ha yona, xana? Leswi swi nga fana ni loko nkhavi wu ndzuluta loyi a wu khomeke, kumbe nhonga yi tlakula n'wini wa yona, loyi a nga riki mhandze!

¹⁶ Hikokwalaho HOSI ya matimba hinkwawo, N'wini wa hinkwaswo ú ta rhumela ntungu lowu nga ta ondzisa tinhenha ta Asiriya leto nyuhela, swirho swa tona swi ta hisa ngopfu ku fana ni ndzilo lowu pfurhaka.

¹⁷ Loyi a nga ku vonakala ka Vaisraele ú ta hundzuka ndzilo, Muhlawuleki wa vona ú ta va langavi leri nga ta hisa mitwa ni swigatlu swa Vaasiriya, swi hela hi siku rin'we.

¹⁸ Masimu layo nona ni swihlahla leswi Vaasiriya va tidzunisaka ha swona, HOSI Xikwembu xi ta swi herisela makumu, swi fana ni munhu loyi a hetaka hi vuvabyi.

¹⁹ Exikarhi ka mirhi ya vona, ku ta sala yi nga ri yingani ntsena, hambi a ri n'wana ú ta kota ku yi hlaya.

Masalela ya Vaisraele

²⁰ Enkarhini wolowo, masalela ya Vaisraele, va nga lava poneke va yindlu ya ka Yakobo, a va nga ha namarheli lava va va beke, kambe va ta namarhela HOSI Xikwembu, xona Muhlawuleki wa xiviri wa Israele.

²¹ Lava poneke, ma nga masalela ya va ka Yakobo, va ta tlhelela eka Xikwembu xa matimba.

²² Hambileswi vanhu va wena Israele va nga ta tala kukota sava ra lwandle, ku ta vuya ntsena va nga ri vangani. Mhaka ya ku biwa ka vona yi tsemiwile, leswi va avanyisisiweke xiswona, swi lulamile ngopfu.

²³ HOSI ya matimba hinkwawo, N'wini wa hinkwaswo, ú ta va herisa hilaha a boheke hakona, matiko hinkwawo ma ri karhi ma swi vona.

²⁴ HOSI ya matimba hinkwawo, N'wini wa hinkwaswo, ú ri: “N'we vanhu va mina, n'wina mi akeke eSiyoni, Vaasiriya mi nga va chavi loko va mi ba hi nkhavi kumbe hi nhonga, kukota leswi Vaegipta va mi endleke swona.

²⁵ Ndzi le kusuhi swinene ni ku tshika ku mi hlundzukela, kutani ndzi ta hlundzukela Vaasiriya, ndzi va herisela makumu.

²⁶ Mina HOSI ya matimba hinwawo, ndzi ta va ba hi ximoko, ku fana ni leswi ndzi biseke xiswona Vamidiyani le ribyeni ra Orebe; nhonga ya mina yi ta va ehenhla ka vona, ndzi ta yi tlakusa ku fana ni leswi ndzi swi endleke le Egipta.

²⁷ Enkarhini wolowo, ndzhwalo lowu Vaasiriya va mi rhwexeke wona emakatleni ni joko leri va mi tlhandlekeke rona enhan'wini, swi ta suka. Joko ri ta tshoveka, hikuva mi ta va mi nyuherile.”

Valala va hlasela tiko

²⁸ Valala va fikile emutini wa Ayata, va tsemakanyile hi le Migirono, va fike va rhula mindzhwalo eMikamaxa;

²⁹ va tsemakanyile hi le xiphandzeni, va fika va xwa vusiku eGeba; vaaki va muti wa Rhama va rhurhumela, va le Gibeya wa Sawulo, va suka va tsutsuma.

³⁰ N'we vanhu va Galimi, tlhavani mukhosi! Rhiyani ndleve, n'we va le Layixa! N'wina va le Anatoto, hlamulani!

³¹ Va le Madimena va baleka, vaaki va Gebimi va lava ko tumbela kona.

³² Namuntlha valala va yimile eNobo, va konge swibakela va kombetela ntshava ya Siyoni, emutini wa Yerusalema.

³³ Vonani, HOSI ya matimba hinkwawo, N'wini wa hinkwaswo, ú ta phatlulela marhavi hi ntamu lowukulu, a tsema mirhi leyo leha ngopfu, a yi wisela hansi.

³⁴ Ú ta tshetsha xihlahla lexo tlhuma hi xihloka, ntshava ya Lebanoni yi ta wa swin'we ni mirhi ya yona leyo hlamarisa.