Eksoda 40 - BIBELE Mahungu Lamanene

Ta ku yimisiwa ni ku hlawulekisiwa ka Ntsonga

¹ HOSI Xikwembu xi ku ka Muxe:

² “Hi siku ro sungula ra n'hweti yo sungula, mi ta yimisa Ntsonga lowo Hlawuleka wa mina HOSI.

³ Endzeni ka wona, mi ta veka Areka ya Ntwanano, mi siva Areka leyi hi xisirhelelo.

⁴ Mi ta nghenisa ni tafula, mi xaxameta swilo swa rona hi ndlela ya kona; mi nghenisa ni xitlhoma-timboni, mi tlhoma timboni eka xona.

⁵ Mi ta veka alitari ya nsuku ya mirhi ya risuna emahlweni ka Areka ya Ntwanano, mi hayeka ni xisirhelelo xo pfala nyangwa ya Ntsonga lowo Hlawuleka.

⁶ Alitari ya magandzelo lama hisiwaka yona mi ta yi veka emahlweni ka nyangwa ya Ntsonga lowo Hlawuleka wa HOSI.

⁷ Kutani exikarhi ka Ntsonga ni alitari leyi mi veka sambelo, mi chela mati eka rona.

⁸ Kutani mi ta biyela Ntsonga hi xivava, mi hayeka ni xisirhelelo xo pfala nyangwa ya xivava.

⁹ Mi ta teka mafurha yo tola, mi tota Ntsonga ni nhundzu ya wona hinkwayo; hi ndlela leyi, mi ta va mi hlawulekisa Ntsonga ni swingolongondzwana swa wona hinkwaswo, kutani wu ta va lowu hlawulekeke.

¹⁰ Mi ta tota ni alitari ya magandzelo lama hisiwaka, ni swingolongondzwana swa yona hinkwaswo; hikokwalaho yi ta va leyi hlawulekeke swinene.

¹¹ Mi ta tota ni sambelo ni xikhatelo xa rona, mi ri hlawulekisa.

¹² “Kutani u ta ta na Aroni ni vana va yena va xinuna enyangweni ya Ntsonga lowo Hlawuleka, u fika u va hlambisa hi mati;

¹³ kutani u ambexa Aroni swiambalo leswo hlawuleka, u n'wi hlawulekisa hi ku n'wi chela mafurha leswaku a va muprista, a ndzi tirhela.

¹⁴ Vana va yena na vona u ta ta na vona, u fika u va ambexa tihembe,

¹⁵ kutani u va chela mafurha ku fana ni tata wa vona, va va vaprista, va ndzi tirhela. Ku cheriwa ka vona mafurha, ku ta endla leswaku ntirho wa vuprista wu va wa vona ni vatukulu va vona hilaha ku nga heriki.”

¹⁶ Kutani Muxe a endla hinkwaswo hilaha HOSI Xikwembu xi n'wi leriseke hakona, a nga siyi nchumu.

¹⁷ Ntsonga wu yimisiwa hi siku ro sungula ra n'hweti yo sungula, hi lembe ra vumbirhi ra ku huma ka Vaisraele etikweni ra Egipta.

¹⁸ Loko Muxe a yimisa Ntsonga, va vekile minkotloto ya wona, va tlhoma mapulangi ya wona, va hingakanya timhandze ta wona, va tlhoma ni tiphuphu ta wona to seketela;

¹⁹ kutani va tlharamula swisirhelelo swa ntsonga wa vumbirhi, va khubumeta Ntsonga lowo Hlawuleka, va kapeka ni xifunengeto, hilaha HOSI Xikwembu xi leriseke Muxe hakona.

²⁰ Kutani va teka maribye ya Ntwanano, va ma veka endzeni ka Areka, va tlhoma ni swikhomo swa yona, va tlhandleka ni xitshamu xa ndzivalelo ehenhla ka yona;

²¹ va rhwala Areka va yi nghenisa eka Ntsonga, va hayeka xisirhelelo, va siva Areka leyi ya Ntwanano, hilaha HOSI Xikwembu xi leriseke Muxe hakona.

²² Kutani va tisa tafula eka Ntsonga lowo Hlawuleka va ri veka hi tlhelo ra n'walungu ra Ntsonga, ehandle ka xisirhelelo,

²³ kutani va xaxameta swinkwa etafuleni hi ndlela ya kona, emahlweni ka HOSI Xikwembu, hilaha xi leriseke Muxe hakona.

²⁴ Va nghenisa xitlhoma-timboni eka Ntsonga lowo Hlawuleka, va xi veka hi tlhelo ra dzonga ra Ntsonga, xi langutana ni tafula,

²⁵ kutani va tlhoma timboni eka xona emahlweni ka HOSI Xikwembu, hilaha xi leriseke Muxe hakona.

²⁶ Va nghenisa alitari ya nsuku eka Ntsonga lowo Hlawuleka, va yi veka emahlweni ka xisirhelelo,

²⁷ kutani va hisa swinun'hweriso ehenhla ka yona, hilaha HOSI Xikwembu xi leriseke Muxe hakona.

²⁸ Va hayeka xisirhelelo xo pfala nyangwa ya Ntsonga,

²⁹ va veka alitari ya magandzelo lama hisiwaka kusuhi ni nyangwa leyi ya Ntsonga lowo Hlawuleka wa HOSI, kutani va hisa magandzelo ya nyama ni ya mapa ehenhla ka alitari, hilaha HOSI Xikwembu xi leriseke Muxe hakona.

³⁰ Va veka sambelo exikarhi ka Ntsonga lowo Hlawuleka ni alitari, va chela mati yo hlamba eka rona.

³¹ (Muxe na Aroni ni vana va yena a va hlamba mavoko ni milenge hi mati lawa,

³² loko va nghena eka Ntsonga lowo Hlawuleka, ni loko va ya kusuhi ni alitari, hilaha HOSI Xikwembu xi leriseke Muxe hakona.)

³³ Kutani va biyela Ntsonga ni alitari hi xivava, va hayeka ni xisirhelelo xo pfala nyangwa ya xivava. Hi ndlela leyi, Muxe a va a hetile ntirho wa kona.

Ta papa leri khubumetaka Ntsonga

³⁴ Kutani papa ri khubumeta Ntsonga lowo Hlawuleka, ku kwetsima ka HOSI Xikwembu ku tata Ntsonga.

³⁵ Muxe a a nga ha koti ku nghena eka Ntsonga lowo Hlawuleka, hikuva papa a ri wu khubumetile, naswona ku kwetsima ka HOSI Xikwembu a ku tatile Ntsonga.

³⁶ Eriendzweni ra vona hinkwaro, loko papa ri suka ehenhla ka Ntsonga, Vaisraele a va hundzela emahlweni.

³⁷ Kambe loko papa ri nga suki, a va nga yi emahlweni ni riendzo ra vona, ku fikela siku papa ri sukaka.

³⁸ Papa ra HOSI Xikwembu a ri khubumeta Ntsonga ninhlekanhi; nivusiku a ku pfurha ndzilo epapeni, Vaisraele va ri karhi va swi vona, masiku hinkwawo ya riendzo ra vona.