Eksoda 4 - BIBELE Mahungu Lamanene

Xikwembu xi komba Muxe matimba ya xona

¹ Kutani Muxe a hlamula Xikwembu, a ku: “Ndzi vona wonge Vaisraele a va nga ndzi kholwi, kumbe ku yingisa leswi ndzi nga ta va byela swona, hikuva va ta ku: ‘HOSI Xikwembu a xi tikombanga eka wena.’ ”

² Hiloko HOSI Xikwembu xi ku: “U khome yini kwalaho xana?” Muxe a ku: “I nhonga.”

³ Kutani xi ku ka yena: “Yi hoxe ehansi!” Loko Muxe a yi hoxa ehansi, yi hundzuka nyoka, kutani Muxe a yi chava a tsutsuma.

⁴ Kambe HOSI Xikwembu xi ku ka yena: “Tshambuluta voko ra wena u yi khoma hi ncila.” Kutani Muxe a yi khoma, yi tlhela yi hundzuka nhonga evokweni ra yena.

⁵ Xikwembu xi ku: “Leswi swi ta khorwisa Vaisraele leswaku ndzi tikombile eka wena, mina HOSI Xikwembu xa vatata wa vona, ndzi nga Xikwembu xa Abrahama, na Isaka, na Yakobo.”

⁶ HOSI Xikwembu xi engeta xi ku: “Nghenisa xandla xa wena endzeni ka xiambalo hi le xifuveni xa wena.” Muxe a nghenisa, kutani loko a humesa xandla xa yena, a xi basulukile hi vuvabyi bya nhlokonho.

⁷ Kutani Xikwembu xi ku: “Tlhela u nghenisa xandla endzeni ka xiambalo.” Muxe a endla tano; loko a xi humesa, a vona leswaku xi tlhele xi va lexinene, xi fana ni miri hinkwawo.

⁸ Xikwembu xi ku: “Loko va nga ku kholwi, ni loko va nga amukeli xikombiso lexo sungula, nkarhi wun'wana va nga khorwisiwa hi lexa vumbirhi.

⁹ Kambe loko, ha vumbirhi bya swona, swi nga va khorwisi, ni loko va nga amukeli leswi u nga ta va byela swona, u ta ya u ya ka mati enambyeni, u ma halata laha ku omeke, kutani mati lawa ma ta hundzuka ngati.”

¹⁰ Kambe Muxe a ku ka HOSI Xikwembu: “We N'wini wanga, ku sukela khale mina nandza wa wena a ndzi nyikiwanga hi tlhelo ra ku vulavula; ndza nonoka eku vulavuleni, naswona ndzi ni manghanghamila, kutani hambileswi u vulavuleke na mina, a ku hundzukanga nchumu.”

¹¹ Hiloko HOSI Xikwembu xi ku ka Muxe: “Xana i mani la vumbeke nomo wa munhu xana? Xana a hi mina HOSI Xikwembu ndzi endlaka munhu ku va mbheveve, kumbe ku fa tindleve, kumbe ku kota ku vona, kumbe ku va lowo-fe-mahlo, xana?

¹² Hikokwalaho, famba sweswi! Mina ndzi ta ku pfuna ku vulavula; ndzi ta ku byela ni leswi u nga ta vula swona.”

¹³ Kambe Muxe a ku: “We N'wini wanga, rhuma loyi u tsakelaka ku n'wi rhuma!”

¹⁴ Kavaloko HOSI Xikwembu xi karihela Muxe, xi ku: “Xana makwenu Aroni lowa Mulevhi a nga kona xana? Ndza swi tiva leswaku yena ú nyikiwile hi tlhelo ra ku vulavula. Tiva leswaku Aroni ú le ndleleni ku ta hlangana na wena; kutani loko a ku vona, ú ta tsaka swinene.

¹⁵ Wena u ta vulavula na yena, u n'wi byela leswi a fanelaka ku vula swona. Loko a ri mina, ndzi ta mi pfuna ku vulavula ha vumbirhi bya n'wina; naswona ndzi ta mi komba leswi mi nga ta endla swona.

¹⁶ Aroni ú ta vulavula ematshan'wini ya wena, a va nomo wa wena eka vanhu, kutani wena u ta fana ni Xikwembu eka Aroni.

¹⁷ Naswona nhonga leyi, u ta famba u yi khomile, u ta endla swihlamariso ha yona.”

Ta Muxe loko a tlhelela etikweni ra Egipta

¹⁸ Kutani Muxe a tlhelela eka Yetro mukon'wana wa yena, a fika a ku: “Ndzi kombela ku tlhelela etikweni ra Egipta, ndzi ya pfuxela varikwerhu.” Yetro a hlamula Muxe a ku: “Hiswona, u ta famba hi ku rhula!”

¹⁹ Loko Muxe a ha ri eMidiyani, HOSI Xikwembu xi ku ka yena: “Tlhelela etikweni ra Egipta, hikuva hinkwavo lava a va lava ku ku dlaya, va file.”

²⁰ Hiloko Muxe a teka nsati ni vana va yena, a va gadisa mbhongolo, kutani a tlhelela etikweni ra Egipta, a famba a khomile nhonga ya Xikwembu.

²¹ Kutani HOSI Xikwembu xi ku ka Muxe: “Loko u tlhelerile etikweni ra Egipta, vona leswaku u endla, emahlweni ka Faro, swihlamariso hinkwaswo leswi ndzi ku nyikeke matimba ya ku swi endla; kambe ndzi ta nonon'hwisa mbilu ya yena, leswaku a nga pfumeleli Vaisraele ku famba.

²² U ta ku ka Faro: ‘HOSI Xikwembu xi vurisa sweswo xi ri: Israele i mativula ya mina,

²³ kutani wena Faro, tshika n'wana loyi wa mina wa mativula a famba, a ya ndzi gandzela. Tiva leswaku loko u ala ku n'wi tshika, ndzi ta dlaya n'wana wa wena wa mativula.’ ”

²⁴ Loko va ri endleleni, HOSI Xikwembu xi tela Muxe laha va nga fika va gova kona, xi ringeta ku n'wi dlaya.

²⁵ Kutani Sipora a teka ribye ro kariha, a tsema nsuvu wa n'wana wa yena, a khumba milenge ya Muxe ha wona, a ku: “Hakunene, u nuna wa ngati eka mina.”

²⁶ Kutani HOSI Xikwembu xi tshika Muxe. Loko Sipora a ku: “U nuna wa ngati eka mina”, a a vulavula a kongomisa mhaka ya ku yimba.

²⁷ Kutani HOSI Xikwembu xi ku ka Aroni: “Famba a ya hlangana na Muxe emananga.” Hiloko Aroni a famba a ya hlangana na Muxe entshaveni ya Xikwembu, a fika a n'wi ntswontswa.

²⁸ Kutani Muxe a tivisa Aroni hinkwaswo leswi HOSI Xikwembu xi n'wi rhumeke ku ya swi vula, ni swikombiso hinkwaswo leswi xi n'wi byeleke ku ya swi endla.

²⁹ Kavaloko Muxe na Aroni va ya va ya hlengeleta vakulukumba va Israele hinkwavo.

³⁰ Kutani Aroni a tivisa vanhu hinkwaswo leswi HOSI Xikwembu xi leriseke Muxe swona, a endla ni swikombiso emahlweni ka vona.

³¹ Kavaloko Vaisraele va kholwa: Loko va twisisile leswaku HOSI Xikwembu xi tile eka vona hakunene, ni leswaku xi vonile ku xaniseka ka vona, va korhamela hansi va xi gandzela.