Eksoda 39 - BIBELE Mahungu Lamanene

Ta ku endliwa ka swiambalo swa vaprista

¹ Kutani va rhunga swiambalo leswo saseka swa ntirho wa le xivandleni lexo hlawuleka, hi voya bya muhlovo wa rihlaza ra tilo, ni wa xivunguvungu, ni lowo tshwuka; va rhunga swiambalo leswi swo hlawuleka swa Aroni, hilaha HOSI Xikwembu xi leriseke Muxe hakona.

² Va rhunga efodi hi tingoti ta nsuku, ni voya bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani wo saseka lowu lukiweke.

³ Nsuku va lo wu fula wu va xiphepherhele, kutani va wu pandzelela wu huma tingoti, va rhungelela swifaniso hi tona va ti phasanisa ni voya bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani lowo saseka lowu lukiweke.

⁴ Kutani va endlela efodi etingoti ta le makatleni, va ti rhungelela etinhleni ta yona letimbirhi.

⁵ Vamba ro tiyisa ni ku boha efodi va ri rhunga ku fana na yona, hi voya bya muhlovo wa nsuku, ni wa rihlaza ra tilo, ni wa xivunguvungu, ni lowo tshwuka, ni ntsembyani wo saseka lowu lukiweke; va ri endla hilaha HOSI Xikwembu xi leriseke Muxe hakona.

⁶ Kutani va lunghisa maribye ya “onikisi” ya nkoka, va ma vekela eka swiangarhelo swa nsuku; maribye lawa a ma tsariwile mavito ya vana va Yakobo, ma kevetliwile wonge hi loko ku kevetliwa mimfungho.

⁷ Va bohelela maribye lawa etingotini ta efodi ta le makatleni, leswaku ma ta va xikombiso xa tinyimba ta Israele, hilaha HOSI Xikwembu xi leriseke Muxe hakona.

Ta ku endliwa ka xincekana xa le xifuveni

⁸ Kutani va endla xincekana xa le xifuveni, va xi rhungelela swifaniso, va xi endla ku fana ni efodi, hi voya bya muhlovo wa nsuku, ni wa rihlaza ra tilo, ni wa xivunguvungu, ni lowo tshwuka, ni ntsembyani wo saseka lowu lukiweke.

⁹ Xincekana lexi a xi ringanana, xi ri 25 cm ku leha ni 25 cm ku anama, loko xi petsiwile.

¹⁰ Kutani exincekaneni lexi va vekela maribye ya nkoka hi tinxaxa ta mune; rixaxa ro sungula a ri ri ni maribye ya nkoka lawa: “Sardiyo”, na “topazi”, na “garnete”;

¹¹ rixaxa ra vumbirhi a ri ri ni maribye lawa: “emeralda”, na “safiri”, na “dayimani”;

¹² rixaxa ra vunharhu a ri ri ni lawa: “yakinta” na “agata”, na “ametisita”;

¹³ rixaxa ra vumune a ri ri ni lawa: “berila”, na “onikisi”, na “yaspere”. Maribye lawa a ma vekeriwile eka swiangarhelo swa nsuku.

¹⁴ A ku ri ni maribye ya 12 lawa a ma ri ni mavito ya vana va Yakobo eka wona. Ribye rin'wana ni rin'wana a ri yimela yin'wana ya tinyimba ta 12 ta Israele, ri kevetliwile ku fana ni mfungho.

¹⁵ Kutani va endlela xincekana xa le xifuveni swinketanana leswi swuriweke ku fana ni tingoti, hi nsuku lowo tenga;

¹⁶ va endla ni swikhomiso swa xona swimbirhi swa nsuku, ni swingwavila swimbirhi swa nsuku; kutani va vekela swingwavila leswimbirhi etinhleni ta xona letimbirhi.

¹⁷ Va nghenisa swinketanana leswi swimbirhi swa nsuku eswingwavileni leswimbirhi leswi nga etinhleni ta xincekana.

¹⁸ Va bohelela makumu ya swinketanana leswimbirhi eswikhomisweni leswimbirhi swa nsuku, kutani va swi khomisa etingotini ta efodi ta le makatleni, hi tlhelo ra le mahlweni.

¹⁹ Kutani va endla swingwavila swimbirhi hi nsuku, va vekela eka makumu mambirhi ya xincekana xa le xifuveni, enson'weni wa xona wa le ndzeni, kusuhi ni efodi.

²⁰ Va endla swingwavila swin'wana swimbirhi hi nsuku; swona va swi vekela hi le mahlweni, hansi ka tingoti ta efodi ta le makatleni, laha tingoti leti ti hlanganaka kona, ehenhla ka vamba ra efodi.

²¹ Kutani va khomisa xincekana xa le xifuveni eswingwavileni swa efodi hi swingwavila leswi, va swi bohelela hi ngoti ya rihlaza ra tilo, leswaku xincekana xi tshama ehenhla ka vamba ra efodi, xi ta kala xi nga suki eka yona, hilaha HOSI Xikwembu xi leriseke Muxe hakona.

Ta ku endliwa ka swiambalo swin'wana swa vaprista

²² Kutani va endla nguvu leyo leha leyi ambariwaka ni efodi, va yi luka hi voya bya muhlovo wa rihlaza ra tilo ntsena.

²³ Mbhovo leyi a yi ri engubyini leyi, a yi fana ni ya swiambalo swa madzovo, yi somiwile leswaku yi ta ka yi nga handzuki.

²⁴ Emakumu ka nguvu leyi ehansi, va rhungelela swifaniso swa swihenge hi voya bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani wo saseka lowu lukiweke.

²⁵ Va endla ni swingelengele swa nsuku, va swi vekela exikarhi ka swifaniso swa swihenge leswi a swi ri emakumu ka nguvu hi le hansi, ku rhendzeleka na yona.

²⁶ Loko va vekela xingelengele xa nsuku, a va landzisa hi xifaniso xa xihenge, sweswo-sweswo ku rhendzeleka ni nguvu leyi ya ntirho wa vuprista, hilaha HOSI Xikwembu xi leriseke Muxe hakona.

²⁷ Va rhunga ni tihembe leti lukiweke hi ntsembyani wo saseka, va rhungela Aroni ni vana va yena;

²⁸ va rhunga xihuku lexikulu ni swihuku leswitsongo hi ntsembyani lowo saseka, ni swiburukwana hi ntsembyani wo saseka lowu lukiweke;

²⁹ va rhunga ni vamba hi ntsembyani wo saseka lowu lukiweke, ni voya bya muhlovo wa rihlaza ra tilo, ni wa xivunguvungu, ni lowo tshwuka, va ri rhungelela mavalavala, hilaha HOSI Xikwembu xi leriseke Muxe hakona.

³⁰ Kutani va fula nsuku lowo tenga wo vekela eharhini leyo hlawuleka wu va xiphepherhele, va tsala eka wona marito lama nge: “La hlawuleriweke HOSI”, ku fana ni loko ku kevetliwa mfungho.

³¹ Va bohelela ngoti ya rihlaza ra tilo eka nsuku lowu wa xiphepherhele, leswaku va ta wu khomisa ha yona exihukwini, hilaha HOSI Xikwembu xi leriseke Muxe hakona.

Vaisraele va tisela Muxe enhundzu ya Ntsonga

³² Kutani ntirho hinkwawo wa Ntsonga lowo Hlawuleka wa HOSI wu fika emakumu. Vaisraele va endlile hinkwaswo hilaha HOSI Xikwembu xi leriseke Muxe hakona.

³³ Kutani va tisa Ntsonga lowo Hlawuleka eka Muxe, hi leswaku swisirhelelo swa wona, ni swingolongondzwana hinkwaswo swa wona, ni swikhweketo swa wona, ni mapulangi ya wona, ni timhandze ta wona to hingakanya ha tona, ni tiphuphu ta wona, ni minkotloto ya wona;

³⁴ va tisa ni xo funengeta Ntsonga ha xona, xa madzovo ya tinyimpfu lama tlhuvutsiweke, ni ya timbuti, ni xisirhelelo xo siva Areka;

³⁵ va tisa Areka ya Ntwanano, ni timhandze ta yona, ni xitshamu xa ndzivalelo;

³⁶ tafula ni swibya swa rona hinkwaswo, ni xinkwa lexo hlawuleka xa magandzelo;

³⁷ xitlhoma-timboni xa nsuku lowo tenga ni timboni ta xona leti xaxametiweke, ni swingolongondzwana hinkwaswo swa xitlhoma-timboni, ni mafurha yo voninga;

³⁸ alitari ya nsuku, ni mafurha yo tola, ni mirhi ya risuna leyi hisiwaka engandzelweni, ni xisirhelelo xo pfala nyangwa ya Ntsonga;

³⁹ alitari ya koporo, ni ritavala ra yona ra koporo, ni timhandze ta yona, ni swingolongondzwana swa yona hinkwaswo, ni sambelo ni xikhatelo xa rona:

⁴⁰ swisirhelelo swa xivava, ni tiphuphu ta xona ni minkotloto ya kona, ni xisirhelelo xo pfala nyangwa ya xivava, ni tingoti ta kona, ni swikhomiso swa xivava, ni swingolongondzwana hinkwaswo swa ntirho wa Ntsonga lowo Hlawuleka wa HOSI;

⁴¹ swiambalo leswi sasekisiweke swa lava tirhaka exivandleni lexo hlawuleka, swi nga swiambalo leswo hlawuleka swa muprista Aroni, ni swiambalo swa vana va yena leswi va nga ta ambala loko va tirha ntirho wa vuprista.

⁴² Vaisraele va endlile ntirho hinkwawo hilaha HOSI Xikwembu xi leriseke Muxe hakona, va nga siyi nchumu.

⁴³ Loko Muxe a xiyaxiya ntirho, a vona leswaku va wu endlile hi ku landza hinkwaswo leswi HOSI Xikwembu xi leriseke swona, va nga siyanga nchumu. Kutani Muxe a va katekisa.