Eksoda 25 - BIBELE Mahungu Lamanene

Ta ku hlenga tinhundzu ta Ntsonga lowo Hlawuleka

¹ Kutani HOSI Xikwembu xi ku ka Muxe:

² “Vulavula ni Vaisraele leswaku va ndzi humesela nhlengo; mi ta wu hlengeleta wu huma eka vanhu hinkwavo lava tinyiketaka ku ndzi humesela wona hi mbilu yo basa.

³ Mihlengo leyi mi nga ta yi amukela eka vona hi leyi; Nsuku, ni silivhere, ni koporo;

⁴ ni voya bya tinyimpfu bya muhlovo wa rihlaza ra tilo, ni wa xivunguvungu, ni lowo tshwuka, ni ntsembyani lowo saseka, ni voya bya timbuti;

⁵ ni madzovo ya tinyimpfu lama tlhuvutsiweke, ni madzovo ya timbuti, ni mapulangi ya murhi wa munga;

⁶ ni mafurha yo voninga, ni mirhi yo nun'hwerisa mafurha yo tola, ni swinun'hweriso swa mirhi leyi hisiwaka egandzelweni;

⁷ ni maribye ya nkoka ya ‘onikisi’, ni lama nga ta vekeriwa engubyeni ya vaprista ya ‘efodi’ ni le xincekaneni xa vona xa le xifuveni.

⁸ Kutani va ta ndzi endlela xivandla lexo hlawuleka leswaku ndzi ta tshama exikarhi ka vona.

⁹ Mi ta endla Ntsonga ni swingolongondzwana swa wona hinkwaswo hi swivumbeko leswi ndzi nga ta mi komba swona.”

Ta Areka ya Ntwanano

¹⁰ “Areka yi ta endliwa hi mapulangi ya murhi wa munga, yi ri ni mimpimo leyi; 124 cm ku leha, ni 75 cm ku anama, ni 75 cm ku ya ehenhla.

¹¹ Endzeni ni le handle ka Areka, mi fanele ku nameka nsuku lowu tengeke; kasi lomu matlhelo ku rhendzeleka na yona, mi ta vumba nkonye wa nsuku.

¹² Mi yi endlela mune wa swingwavila hi nsuku lowu n'okisiweke, mi swi vekela emilengeni leya mune ya yona, swimbirhi swi va emilengeni ya tlhelo rin'we, swimbirhi emilengeni ya tlhelo lerin'wana.

¹³ Mi vatla timhandze ta murhi wa munga, mi ti nameka nsuku.

¹⁴ Timhandze leti, mi ta ti nghenisa eswingwavileni leswi nga ematlhelo ya Areka; ti ta va swikhomo swo rhwala Areka ha swona.

¹⁵ Timhandze ta kona ti fanele ku tshama eswingwavileni swa Areka, ti nga tshuki ti hlomuriwa.

¹⁶ Endzeni ka Areka, mi ta nghenisa xitsundzuxo xa Ntwanano lexi ndzi nga ta mi nyika xona.

¹⁷ Mi ta endla xitshamu xa ndzivalelo hi nsuku lowu tengeke, xi ri ni mimpimo leyi: 125 cm ku leha ni 75 cm ku anama.

¹⁸ Mi ta endla tikerubu timbirhi, leti mi nga ta ti fula hi nsuku, emakumu ka xitshamu xa ndzivalelo.

¹⁹ Kerubu yin'we, mi ta yi vekela etlhelweni rin'wana ra xitshamu xa ndzivalelo, leyin'wana etlhelweni lerin'wana; tikerubu leti, mi ta ti endla ti khomana ni xitshamu xa ndzivalelo hi le makumu ya xona;

²⁰ ti ta tlharamulela timpapa ta tona ehenhla, ti sirhelela xitshamu xa ndzivalelo, ti langutanile, xitshamu xa ndzivalelo xi ri exikarhi.

²¹ Xitshamu xa ndzivalelo, mi ta xi tlhandleka ehenhla ka Areka, mi nghenisa endzeni ka yona xitsundzuxo xa Ntwanano lexi ndzi nga ta mi nyika xona.

²² Ndzi ta hlangana na n'wina kwalaho, kutani ndzi ta mi byela swileriso swa mina hinkwaswo eka Vaisraele, ndzi ri ehenhla ka xitshamu xa ndzivalelo, exikarhi ka tikerubu timbirhi leti khubumetaka Areka ya Ntwanano.”

Ta tafula ra Xinkwa lexo Hlawuleka

²³ “Kutani mi ta endla tafula hi mapulangi ya murhi wa munga, ri ri ni mimpimo leyi: 100 cm ku leha, ni 50 cm ku anama, ni 75 cm ku ya ehenhla.

²⁴ Tafula leri mi ta ri nameka nsuku lowo tenga, mi vumba ni nkonye wa nsuku ku rhendzeleka na rona.

²⁵ Mi ta vekela pulangi ro anama 8 cm ri rhendzeleka ni tafula, mi tlhela mi vumba ni nkonye wa nsuku ku rhendzeleka ni pulangi leri.

²⁶ Mi ta endlela tafula mune wa swingwavila hi nsuku lowu n'okisiweke, mi swi vekela etinhleni leta mune ta tafula, emilengeni ya rona.

²⁷ Swingwavila leswi swi fanele ku tshama kusuhi swinene ni pulangi; eka swona, ku ta nghenisiwa timhandze to rhwala tafula.

²⁸ Mi ta vatla timhandze leti hi murhi wa munga, mi ti nameka nsuku; tafula ri ta rhwariwa hi tona.

²⁹ Mi ta endlela tafula tindyelo, ni minkambana ya mirhi ya risuna, mi endla ni swikhuwana ni swimbitana swo chela swa le gandzelweni; swibya leswi mi swi endla hi nsuku lowo tenga.

³⁰ Ehenhla ka tafula, mi fanele ku veka Xinkwa lexo Hlawuleka xa magandzelo, xi tshama xi ri kona emahlweni ka mina minkarhi hinkwayo.”

Ta xitlhoma-timboni

³¹ “Kutani mi ta endla xitlhoma-timboni hi nsuku lowu tengeke; tshaku ra xona ni nsinya wa xona mi swi fula hi nsuku, mi endla ni swimbitana leswi sasekisiweke hi swihluke ni matluka ya swiluva, mi swi khomanisa ni xitlhoma-timboni.

³² Lomu matlhelo ya xitlhoma-timboni, ku fanele ku va ni marhavi ya 6; manharhu ma ta huma etlhelweni rin'we, manharhu etlhelweni lerin'wana.

³³ Rhavi rin'wana ni rin'wana eka marhavi lawa ya 6 lama humeleke ematlhelo, ri fanele ku va ni swimbitana swinharhu leswi fanaka ni swiluva swa ‘alimondi’; xin'wana ni xin'wana xa swimbitana leswi xi fanele ku sasekisiwa hi swihluke ni matluka ya swiluva.

³⁴ Ensinyeni wa kona, ku ta va ni swimbitana swa mune leswi fanaka ni swiluva swa ‘alimondi’, na swona swi ta va swi sasekisiwile hi swihluke ni matluka ya swiluva.

³⁵ Ehansi ka lomu marhavi mambirhi ya xitlhoma-timboni ma hlanganaka kona ni nsinya wa xona, ku ta va ni xilo lexi fanaka ni xihluke, xi khomanile ni nsinya.

³⁶ Swihluke leswi ni marhavi lawa swi ta khomanisiwa ni nsinya wa xitlhoma-timboni; xitlhoma-timboni hinkwaxo xi ta endliwa hi nsuku lowo tenga lowu furiweke.

³⁷ Kutani mi ta xi endlela timboni ta 7; timboni leti ti fanele ku tlhomiwa, ti vekiwa hi ndlela leyi ti nga ta voninga xivandla lexi nga emahlweni ka xitlhoma-timboni.

³⁸ Swikero swa xona ni timbita ta xona swi ta va swa nsuku lowo tenga.

³⁹ Xitlhoma-timboni ni swingolongondzwana swa xona hinkwaswo swi fanele ku endliwa hi nsuku lowo tenga wo tlulanyana 40 kg hi ku tika.

⁴⁰ Mi fanele ku vona leswaku mi endla swilo leswi hi ku ya hi swivumbeko leswi mi kombiweke swona entshaveni.”