Eklesiasta 8 - BIBELE Mahungu Lamanene

¹ Xana i mani la fanaka ni ntlhari, i mani la tivaka ku hlamusela timhaka ke? Munhu la tlhariheke, wa n'wayitela, nghohe ya yena a yi na minkonya.

Ta ku yingisa vuhosi

² Mina ndzi ri, amukela swileriso swa hosi, hikuva u hlambanyele sweswo emahlweni ka Xikwembu.

³ U nga hatli u suka entsindza, kambe loko timhaka ti bihile, u nga ti ngheni, hikuva hosi yi tiendlela hinkwaswo hi ku rhandza.

⁴ Rito ra hosi a ri kanetiwi, ku hava loyi a nga yi vutisaka, a ku: “U endla yini xana?”

⁵ Munhu la yingisaka swileriso, a nga ngheni etimhakeni leti biheke; la tlhariheke, ú tiva minkarhi ni maendlele.

⁶ Hakunene mhaka yin'wana ni yin'wana yi ni minkarhi ya yona ni maendlele ya yona. Leswi makhombo layo tala ma rhendzelaka munhu,

⁷ a nge tivi leswi nga ta humelela mundzuku; naswona, i mani la nga n'wi tivisaka matele ya swona xana?

⁸ Ku hava munhu la nga ni matimba ya ku tihlayisela moya wa yena, kumbe la kotaka ku yimisa siku ra ku fa ka yena. Lava yeke enyimpini, a va ntshunxiwi yi nga si hela, na vona lava tinyiketeke eka leswo biha, va nge ntshunxiwi eka swona.

⁹ Laha misaveni, ndzi xiyaxiyile swilo leswi vanhu va swi endlaka, kutani ndzi kumile leswaku lava nga ni matimba, va ma tirhisa ku xanisa vanhu van'wana.

Vutlhari ni ku lulama a swa ha pfuni nchumu

¹⁰ Ndzi vonile lavo homboloka loko va lahliwa hi xichavo; kambe lava endleke leswo lulama, lava a va nghena ni ku huma eTempeleni, va rivariwile emutini. Na swona sweswo, a swi pfuni nchumu.

¹¹ Leswi mintirho ya lavo homboloka yi nga avanyisiwangiki hi ku hatlisa, vanhu van'wana va tsutsumela ku endla leswi biheke.

¹² Munhu wo homboloka a nga ha hanya malembe layo tala, hambileswi a dyoheke ka dzana; kambe mina ndza swi tiva leswaku lava chavaka Xikwembu, va ta kateka hikwalaho ka vukhongeri bya vona.

¹³ Lowo homboloka yena a nge kateki; masiku ya ku hanya ka yena ma ta hundza kukota papanyana, hikuva a nga chavanga Xikwembu.

¹⁴ Laha misaveni, ka ha ri ni swin'wana leswi nga pfuniki nchumu: Ku ni vanhu vo lulama lava welaka hi makhombo ya lavo homboloka; kambe ku ni lavo homboloka lava kumaka minkateko ya lavo lulama. Na swona sweswo, ndza ha vula leswaku a swi pfuni nchumu.

¹⁵ Hikokwalaho mina ndzi ri, swi sasekile loko vanhu va kuma ku tsaka va ha hanya emisaveni; va nge nyikiwi nkateko wo tlula wa ku dya ni ku nwa va tiphina, hikuva hi swona leswi swi nga ta va wisisa eku tikarhateni ka vona, emasikwini ya ku hanya ka vona laha misaveni, lawa Xikwembu xi va nyikeke wona.

¹⁶ Ndzi ringetile hi matimba ku twisisa vutlhari, ni mintirho leyi vanhu va yi endlaka emisaveni, ndzi vona ni hilaha va hetaka vusiku ni nhlekanhi hakona va nga etleli.

¹⁷ Naswona ndzi vonile ntirho hinkwawo lowu Xikwembu xi wu endlaka laha misaveni, lowu vanhu va tsandzekaka ku wu twisisa; hambiloko munhu a tikarhatela ku wu lavisisa, a nge wu kumi, na yona ntlhari leyi vulaka leswaku ya wu tiva, yi nge wu kumi.