Eklesiasta 6 - BIBELE Mahungu Lamanene

¹ Ku ni mhaka yin'wana yo tika leyi ndzi yi voneke laha misaveni; mhaka ya kona yi karhata vanhu:

² Xikwembu a xi nyikile munhu un'wana erifuwo lero tala, xi n'wi nyika ni ku chaviseka; munhu loyi ú kumile hinkwaswo leswi a a swi navela. Kambe Xikwembu a xi n'wi pfumelelanga ku tiphina hi swilo leswi, hikuva swi lo dyiwa hi munhu wa tiko rimbe. Swilo sweswo, a swi pfuni nchumu, i khombo leri vavisaka.

³ Munhu a nga kuma dzana ra vana, a hanya malembe layo tala emisaveni, masiku ya yena ma andza swinene. Kambe a nga tshuka a tekeriwa minkateko yoleyo, varikwavo va ala ni ku n'wi lahla esirheni. Mina ndzi ri: Xihlangi xo velekiwa xi file xi katekile ku tlula munhu wo tano,

⁴ hikuva a xi telanga nchumu laha misaveni, kutani xi nyamalalela emunyameni, vito ra xona ri nga si tiva hi munhu.

⁵ Xi lovile xi nga si tiva nchumu, xi rhangela lowa mufumi ku ya wisa.

⁶ Hambiloko mufumi a hanya malembe ya 2 000, a nge tsakisiwi hi nchumu la misaveni, hikuva yena ni xihlangi lexiya, va kongoma endhawini yin'we.

⁷ Ku tikarhata hinkwako ka vanhu ku mitiwa hi sirha, kambe rona a ri xurhi!

⁸ Xana ntlhari yi tlula xiphunta ha yini, swi pfuna yini ku titsongahata, ni ku tiva ku hanyisana ni vanhu, ke?

⁹ Ku vona xilo hi mahlo, swi tlula ku xi navela hi mbilu, kambe na swona sweswo, a swi pfuni nchumu, i ku hlongorisa moya ntsena.

Ku kaneta Xikwembu, a swi pfuni nchumu

¹⁰ Xin'wana ni xin'wana lexi humelelaka, xi vuriwile khale hi vito ra xona; Xikwembu xi tiva leswi munhu a nga ta va swona. A nge kanetani na xona, hikuva xa n'wi tlula hi matimba.

¹¹ Ku phikisana na xona a swi pfuni nchumu; la endlaka sweswo, a nge vuyeriwi hi nchumu.

¹² Xana i mani la tivaka leswi nga tiselaka munhu eminkateko, loko a ri karhi a hetisa masikunyana ya yena yo ka ya nga pfuni nchumu xana? Leswi a hundzaka emisaveni ku fana ni papanyana, xana i mani la nga tivisaka munhu loyi leswi nga ta humelela mundzuku, loko yena a ta va a nga ha ri kona xana?