Eklesiasta 4 - BIBELE Mahungu Lamanene

Vafumi va xanisa vapfumari

¹ Kutani ndzi engeta ndzi vona hilaha vanhu va xanisanaka hakona emisaveni: Langutani mihloti ya vaxaniseki, ku hava loyi a va miyetaka; a va tweriwi vusiwana, hikuva vaxanisi va ni matimba.

² Kutani ndzi ku, lava feke khale va katekile ku tlula lava va ha hanyaka.

³ Kambe loyi a katekeke ku va tlula, hi loyi a nga si tshamaka a velekiwa, loyi a nga vonangiki leswo biha leswi endliwaka laha misaveni.

⁴ Ndzi vonile ni leswi: Hinkwavo lava tikarhataka ni ku humelela emintirhweni ya vona, va susumetiwa hi ku vondzoka varikwavo. Na swona sweswo, a swi pfuni nchumu, i ku hlongorisa moya ntsena.

⁵ Xiphunta xi khondla mavoko, kambe xi le ku tisungeni!

⁶ Xandla xin'we xa munhu wo rhula, xi tlula swimbirhi swa mugingiriki, la hlongorisaka moya.

Khombo ra loyi a nga yexe

⁷ Laha misaveni, ndzi vonile na swin'wana leswi nga pfuniki nchumu:

⁸ Munhu la tshamaka a ri yexe, la pfumalaka n'wana kumbe makwavo, a nga tshiki ku tirha a dzuka nyuku, hikuva a nga kolwi hi rifuwo ra yena. Ú rivala ku tivutisa, a ku: “Xana ndzi tikarhatela mani, ndzi titsonela yini leswo nandziha, xana?” Na swona sweswo, a swi pfuni nchumu, i ku tikarhatela mahala ntsena.

⁹ Ku va vambirhi, swi tlula ku va un'we ntsena, hikuva va vuyeriwa ku antswa entirhweni wa vona.

¹⁰ Nakambe, loko va khuguka va wa, un'wana ú ta pfuxa loyi un'wana. Kasi la nga yexe, ú le khombyeni, loko a wela hansi, ú pfumala wo n'wi pfuxa.

¹¹ Naswona, loko vambirhi va funengela nkumba wun'we, va kufumetana, kasi la nga yexe, ú ta kufumerisa ku yini ke?

¹² Xigevenga xi nga hlula la nga yexe, kambe loko va ri vambirhi, va ta xi tsutsumisa. Ntambhu ya miluko minharhu, a yi nga hatli ku tsemeka.

Vuhosi bya hela

¹³ Jaha ro tlhariha, hambi ri ri xisiwana, ri tlula hosi ya xiphunta leyi dyuhaleke, leyi alaka ni ku tsundzuxiwa.

¹⁴ Loko ka ha fuma hosi leyi, jaha ri humesiwa ekhotsweni, ri vekiwa ku va murhangeri, hambileswi ri velekiweke evusiwaneni.

¹⁵ Kutani ndzi vona vanhu hinkwavo lava hanyaka emisaveni, va tshirimukela eka lowa jaha la nga sala a teka vuhosi.

¹⁶ Ntshungu wa kona a wu ri ntsandza-vahlayi, loko wu ya tiveka ehansi ka lowa jaha. Hambiswiritano, emalembeni lama taka, vanhu a va nga ha tsakeli hosi leyintshwa leyi. Hakunene, na swona sweswo a swi pfuni nchumu, i ku hlongorisa moya ntsena.