Eklesiasta 11 - BIBELE Mahungu Lamanene

Matirhele ya Xikwembu a ma tiveki

¹ Haxa rifuwo ra wena elwandle, hikuva endzhaku ka nkarhi wo leha, u nga tlhela u ri kuma;

² ri hlayise etindhawini ta 7 kumbe 8, hikuva a wu tivi makhombo lama nga humelelaka laha misaveni.

³ Loko mapapa ma rhwele mpfula, ma ta yi chululela emisaveni; na wona murhi, hambi wu wela edzongeni kumbe en'walungwini, wu ta etlela laha wu weleke kona.

⁴ La tshamelaka ku xiya timheho, a nge rimi, la kambaka mapapa ku tlula mpimo, a nge tshoveli.

⁵ Tanihi leswi u nga tiviki mahungele ya timheho, ni ndlela leyi n'wana a kulaka ha yona ekhwirini ra mana wa yena, na yona mintirho ya Xikwembu Muendli wa hinkwaswo, u nge yi twisisi.

⁶ Haxa mbewu ka ha ra nimixo, ni loko ri rhengile u nga tshami hi mavoko, hikuva a wu tivi leyi nga ta mila. Ku nga mila leyi kumbe liya, kumbe yi mila hinkwayo.

Vuntshwa bya tsakisa ...

⁷ Hakunene ku vonakala ku rhulisa moya, mahlo ma tsakela ku tlhava ka dyambu.

⁸ Loko munhu a hanya malembe layo tala, a a ma tsakele hinkwawo, kambe a nga tshuki a rivala leswaku masiku ya khombo na wona ma ta andza! Eka hinkwaswo leswi humelelaka, ku hava lexi pfunaka.

⁹ Wena lontshwa, tsakela vuntshwa bya wena, u tiphina emasikwini wolawo. Famba hi tindlela leti u ti rhandzaka, leti kokaka mahlo ya wena, kambe tiva leswaku Xikwembu xi ta ku avanyisa ehenhla ka leswi hinkwaswo.

¹⁰ Susa ku vilela embilwini ya wena, u hambana ni leswi nga vavisaka miri wa wena; vuntshwa ni ku tiya emirini na swona a swi pfuni nchumu.