Eklesiasta 10 - BIBELE Mahungu Lamanene

¹ Tinhongana to fela emafurheni layo nun'hwela ti nga ma onha, ma vila; vuphuntanyana bya munhu wa ndzhuti byi hatla byi tiveka ku tlula vutlhari bya yena.

² Miehleketo ya lowo tlhariha yi n'wi tisela nkateko, kasi ya xiphunta yi xi vangela makhombo.

³ Phuphula hambi ri nga famba endleleni a ri tivi mafambele, ri tikomba eka hinkwavo leswaku a ri tlharihanga.

La tlhariheke ú chava mpfilumpfilu etikweni

⁴ Loko hosi ya tiko yi ku hlundzukela u nga hatli u lan'wa; la tikhomaka, ú humesiwa emilandzwini yo tala.

⁵ Laha misaveni, ndzi vonile mhaka yo biha, swi nga swihoxo leswi endliwaka hi tihosi:

⁶ Maphuphula ma tlakusiwa, kasi lavakulu ni swifumi, va tsongahatiwa.

⁷ Ndzi vonile mahlonga ma gadile tihanci, tinganakana ti ri karhi ti famba hi milenge kukota mahlonga.

Ku tiva matirhele a swi siveli makhombo

⁸ La celaka khele, ú ta hojomela eka rona, nyoka yi ta luma la boxaka khumbi.

⁹ Maribye ma vuya hi mufayi wa wona, mupandzeri wa tihunyi a nga tivangela khombo.

¹⁰ Loko xihloka xa wena xi bvinyekile hileswi u rivaleke ku xi lota, xi ta ku tikisela ntirho! Vutlhari byi pfuna ku lota miehleketo.

¹¹ Loko nyoka yi ku luma hi ku ka yi nga si tirhiwa hi mungoma, ku vitana mungoma wa kona swa ha pfuna yini ke?

Ntlhari yi tiva mavulavulele

¹² Vanhu va tsakela marito ya ntlhari, kasi nomo wa phuphula wa ri dlayisa;

¹³ loko ri sungula ku vulavula, ku huma swa vuphunta ntsena; ni loko ri heta, u ta va u twile ta rihuhe ro chavisa.

¹⁴ Xiphunta xi vulavula ngopfu, hambileswi munhu a nga tiviki leswi nga ta humelela mundzuku, hambileswi a nga twisisiki leswi nga ta va kona loko a hundzile.

¹⁵ Xiphunta xi tihlakata hi ku phyaphyarha, xi ko xi rivala ni ndlela yo muka.

Vuhosi lebyinene ni lebyo biha

¹⁶ Tiko ro fumiwa hi mufana, leri tindhuna ta rona ti nwaka ka ha ri mpundzu, ri le khombyeni!

¹⁷ Kambe ku katekile leri fumiwaka hi munhu wa ndzhuti, leri tindhuna ta rona ti dyaka ti pima, ti ri tinghwazi, ku nga ri swidakwa.

¹⁸ Munhu wo loloha ú boleriwa hi lwangu, ra n'wi pfutela a ha khondle mavoko.

¹⁹ Swakudya swa nandziha, ni vhinyo yi tsakisa mbilu, kambe hinkwaswo swi kumiwa hi mali!

²⁰ U nga soli hosi hambi emiehleketweni ya wena, ni loko u etlele u ri wexe, u nga soli xifumi, hikuva tinyanyana ti nga rhwala mahungu ya kona, ti haha ti ma hangalasa.