Eklesiasta 1 - BIBELE Mahungu Lamanene

Emisaveni, ku hava swintshwa

¹ Lawa i marito ya Mudyondzisi n'wana Davhida, hosi ya le Yerusalema:

² Mudyondzisi ú ri: “A swi pfuni nchumu, ndzi ri, a swi pfuni nchumu, ku hava lexi pfunaka!”

³ Loko ri xile, munhu ú tirha a tshwomoka, kambe ú vuyeriwa ha yini ke?

⁴ Van'wana va lova, van'wana va velekiwa, misava yona yo tshamisa sweswi hilaha ku nga heriki.

⁵ Dyambu ro tixela, ri tlhela ri tipelela, ri vuyela laha ri humeke kona.

⁶ Moya wu ba wu ya dzongeni, wu tlhela wu ba wu ya n'walungwini, wu rhendzeleka na timheho hinkwato, wu tlhela wu ya sungula eku sunguleni.

⁷ Milambu hinkwayo yi khulukela elwandle, kambe a yi ri tati, laha a yi kongoma kona khale, ya ha ya kona ni sweswi!

⁸ Swilo hinkwaswo swa phirha, ku phirha ka kona a ku hlamuseleki; tihlo ra vona, kambe a ri kolwi, ndleve ya twa, kambe a yi xurhi.

⁹ Leswi a swi ri kona, swa ha to tlhela swi va kona; leswi nga tshama swi endliwa, swa ha to endliwa nakambe. La misaveni, a ku na swintshwa!

¹⁰ Xana hi nga komba yini hi ku: “Vonani, xilo lexintshwa hi lexi!” xana? Ku hava! Leswi nga kona, a swi ri kona hi nga si velekiwa.

¹¹ Leswi hundzeke, a swa ha tsundzukiwi hi munhu, ni leswi hi nga ta swi endla, vana va hina va ta swi rivala.

Mudyondzisi ú ri, vutlhari a byi pfuni nchumu

¹² Mina Mudyondzisi ndzi fumile Vaisraele ndzi ri eYerusalema.

¹³ Ndzi tibohile ku tirhisa vutlhari, ndzi lavisisa ni ku kambisisa hinkwaswo leswi endliwaka hi vanhu laha misaveni. Kutani ndzi kumile leswaku mintirho leyi munhu a rhwexiwaka yona hi Xikwembu laha misaveni, ya tika swinene.

¹⁴ Ndzi swi vonile hinkwaswo leswi vanhu va swi endlaka: Ndza mi byela, ku hava lexi pfunaka, vo hlongorisa moya ntsena.

¹⁵ Lexi gombonyokeke, u nge xi ololoxi, u nge hlayi xilo lexi xi nga riki kona.

¹⁶ Kutani ndzi anakanyile ndzi ku: “Ndzi tikumele vutlhari lebyi enteke, byo tlula bya hinkwavo lava nga tshama va fuma eYerusalema. Nhloko ya mina yi pfulekile, ndzi tlharihile, ndzi tiva swo tala!”

¹⁷ Kutani, hi ku tirhisa miehleketo ya mina, ndzi kambisisile ku hambana exikarhi ka vutlhari na rihuhe kumbe vuphunta, ndzi ya kuma leswaku sweswo na swona i ku hlongorisa moya,

¹⁸ hikuva ku andzisa vutlhari i ku andzisa maxangu, la tiengetelelaka vutivi, u tiengetelela mahlomulo.