Amosi 3 - BIBELE Mahungu Lamanene

Vahlawuriwa va ta biwa

¹ Rhiyani ndleve n'wina vanhu va Israele, n'wina rixaka hinkwaro leri HOSI Xikwembu xi ri humeseke etikweni ra Egipta, mi twa leswi HOSI yi mi tshinyaka ha swona. Yi ri:

² “Exikarhi ka tinxaka hinkwato ta misava, ndzi hlawurile n'wina ntsena ndzi mi hlayisa. Leswi a nga n'wina mi tlhelaka mi ndzi dyohela hi ndlela leyi, ndza boheka ku mi ba.”

Amosi ú rhumiwile hi Xikwembu

³ Xana vanhu vambirhi va nga khomisana ndlela, loko va nga rhanganga va boha swin'we makungu ya riendzo rero xana?

⁴ Xana nghala yi nga bonga exihlahleni, yi nga kumanga lexi yi nga xi khomaka ke? Hambi n'wana wa nghala, xana wa vomba ebakweni, loko a nga vuyanga na nchumu xana?

⁵ Xana xinyanyana xi nga ya phatsama entlhan'wini, ku nga ri na ndzhoho ke? Xana ntlhamu wu ngo na swi pfuketana wo wachuka, wu nga wachutiwanga ke?

⁶ Xana loko ku biwa nyandayeyo emutini, vanhu va nga tshika ku tsemeka nhlana xana? Khombo rona, xana ri nga wela muti, loko ri nga rhumeriwanga hi HOSI ke?

⁷ Tivani leswaku HOSI N'wini wa hinkwaswo, a nga endli nchumu a nga rhanganga hi ku kombisa makungu ya yena eka vaprofeta malandza ya yena.

⁸ I mani a nga rhurhumeliki, loko nghala yi bonga xana? Xana i mani la nga alaka ku va muprofeta, loko HOSI N'wini wa hinkwaswo a vulavurile, xana?

Ku wa ka Samariya

⁹ Huwelelani lava nga tindlwini ta vuhosi ta le Axidodo, ni lava nga tindlwini ta vuhosi ta le Egipta, mi ku: “Hlengeletanani eswitsungeni swa Samariya, mi vona mpfilumpfilu lowukulu emutini lowu, ni ku xanisiwa ka vanhu exikarhi ka vona!”

¹⁰ HOSI yi vula sweswo yi ri: “Vanhu va Samariya a va swi tivi ku endla leswo lulama, va tata tindlu ta vona ta vuhosi hi swilo leswi va swi kumeke hi tihanyi ni vuxisi.”

¹¹ Hikokwalaho HOSI N'wini wa hinkwaswo ú vurisa sweswo ú ri: “Nala ú ta rhendzela tiko, a mi tekela vutumbelo bya n'wina, a phangha ni leswi nga tindlwini ta n'wina ta vuhosi.”

¹² HOSI yi vurisa sweswo yi ri: “Exikarhi ka Vaisraele lava akeke eSamariya, lava tiphinaka eswitshan'wini leswo vempfama, va etlela emasangwini lamanene, ku ta pona vanhu va nga ri vangani ntsena. Swi ta fana ni loko murisi a kota ntsena ku ponisa milenge mimbirhi ya nyimpfu kumbe xichupu xa ndleve enon'wini wa nghala!”

¹³ HOSI N'wini wa hinkwaswo, Xikwembu xa matimba hinkwawo, ú vula sweswo, ú ri: “Yingisani, mi tshinya rixaka ra Yakobo: Siku ndzi nga ta ba Vaisraele hikwalaho ka swidyoho swa vona,

¹⁴ ndzi ta ba ni tialitari ta Betele. Timhondzo ta alitari yin'wana ni yin'wana ti ta tshoviwa, ti wela hansi.

¹⁵ Ndzi ta mbindzimuxa tindlu ta vuxika, ndzi mbindzimuxa ni ta ximumu. Tindlu to sasekisiwa hi meno ya tindlopfu ti ta lovisiwa, ni tindlu letikulu ti ta hela ti ku bi!” HOSI yi vula sweswo.