Amosi 2 - BIBELE Mahungu Lamanene

Rito eka va le Mowabu

¹ HOSI yi vurisa sweswo yi ri: “Ndzi nga ka ndzi nga tshiki ku ba vanhu va le Mowabu, hikuva va dyoha va vuyelela-vuyelela: Va hisile marhambu ya hosi ya Edomu, ku sala nkuma ntsena.

² Hikokwalaho ndzi ta rhumela ndzilo etikweni ra Mowabu, wu ta herisa ni tindlu ta vuhosi ta le Keriyoto; Vamowabu va ta fa exikarhi ka mpfilumpfilu wa nyimpi, emukhosini ni ku biweni ka mhalamhala.

³ Ndzi ta susa mufambisi wa vona exikarhi ka vona, ndzi n'wi dlaya, yena ni tindhuna ta yena.” HOSI yi vula sweswo.

Rito eka va le Yuda

⁴ HOSI yi vurisa sweswo, yi ri: “Ndzi nga ka ndzi tshiki ku ba vanhu va le Yuda, hikuva va dyoha va vuyelela-vuyelela: Va tshikile nawu wa mina HOSI, ni swileriso swa mina a va swi hlayisanga; va hambukile va ya tirhela swikwembu swa hava, leswi vatata wa vona va swi tirheleke.

⁵ Hikokwalaho ndzi ta rhumela ndzilo etikweni ra Yuda, wu ta herisa ni tindlu ta vuhosi ta le Yerusalema.”

Rito eka va le Israele

⁶ HOSI yi vurisa sweswo yi ri: “Ndzi nga ka ndzi nga tshiki ku ba vanhu va le Israele, hikuva va dyoha va vuyelela-vuyelela: Va kumile mali hi ku xavisa vanhu lava lulameke, va xavisile ni swisiwana hi nxavonyana wa tintanghu.

⁷ Va tsakela ngopfu ku kandziyela swisiwana ehansi, va gombonyokisa timhaka ta vapfumari; tatana ni jaha ra yena va yela nhwanyana un'we, va endlela ku nyamisa vito ra mina lero hlawuleka.

⁸ Hinkwako laha va gandzelaka kona, va etlela eminkumbeni leyi va nga yi tekela lava nga ni milandzu; ni le ndlwini ya mina Xikwembu xa vona, va nwa vhinyo leyi humesiweke ku riha milandzu.

⁹ Kasi hi mina ndzi va heriseleke Vaamori, vanhu lava ringanaka ni mirhi ya kedari hi ku leha, lava tiyeke ku fana ni mirhi ya minkuhlu; ndzi mbumburhuxile mihandzu ya kona, ndzi tsema ni timitsu ta kona.

¹⁰ “Ka ha ri mina loyi a mi humeseke etikweni ra Egipta, ndzi mi fambisa malembe ya 40 emananga, leswaku ndzi ta mi nyika tiko ra Vaamori ri va ra n'wina.

¹¹ Van'wana va vana va n'wina, ndzi va vekile ku va vaprofeta, van'wana va majaha ya n'wina, ndzi va vekile ku va Vanaziri. Xana a hi swona ke, n'wina Vaisraele, ku vutisa mina HOSI?

¹² Kambe n'wina mi nwisile Vanaziri evhinyo, mi byele ni vaprofeta leswaku va nga ha tirhi ntirho wa vona.

¹³ “Vonani, mina ndzi ta mi phyandlasa, ku fana ni golonyi leyi rhwaleke tinyandza, loko yi phyandlasa swilo ehansi.

¹⁴ Lava nga ni rivilo, va nge kumi nkarhi wo tsutsuma, ni lava nga ni matimba, va ta heleriwa ha wona; hambi yi ri nhenha, yi nga ka yi nga tiponisi.

¹⁵ Loyi a lwaka hi vurha, a nge yimi, hambi loyi a nga ni rivilo, a nge phonyoki, ni mugadi wa hanci a nge koti ku tiponisa.

¹⁶ Hi siku ra kona, hambi nhenha leyi nga ni xivindzi ku tlula tinhenha-kulobye, yi ta suka yi tsutsuma yi nga ambalanga nchumu.” HOSI yi vula sweswo.