2 Vatesalonika 3 - BIBELE Mahungu Lamanene

Hi khongeleleni!

¹ Eku heteleleni vamakwerhu, hi kongeleleni, leswaku Mahungu ya Hosi ma hangalaka hi ku hatlisa, ma tsakeriwa, kukotisa leswi ma endliseke swona le ka n'wina.

² Khongelani leswaku hi lamuleriwa eka vanhu lavo biha, lavo ka va nga lulamanga; hikuva a hi hinkwavo lava nga ni ku pfumela.

³ Kambe Hosi ya tshembeka: Yi ta mi tiyisa ni ku mi sirhelela eka Lowo biha.

⁴ Kutani Hosi yi hi nyika ku tshemba hi tlhelo ra n'wina, leswaku swilo leswi hi mi lerisaka swona, mi karhi ma swi endla, ni leswaku ma ha to swi endla.

⁵ Ingi Hosi Xikwembu xi nga susumeta timbilu ta n'wina, leswaku mi xi rhandza, ni leswaku mi chivirikela Kriste.

Chavani vulolo!

⁶ Ha mi lerisa vamakwerhu, hi vito ra Hosi Yesu Kriste, leswaku mi hambana ni makwenu wihi ni wihi loyi a nga laviki ku tirha, la nga fambiki hi tidyondzo leti hi mi nyikeke tona.

⁷ Hikuva n'wina hi n'wexe ma swi tiva swinene leswaku mi fanele ku tekelela mahanyelo ya hina; a hi tshamanga hi mavoko, loko hi ri exikarhi ka n'wina;

⁸ naswona, a hi dyanga swakudya swa munhu mahala, kambe hi tirhile vusiku ni nhlekanhi, hi dzuka nyuku ni ku tikarhata, leswaku hi nga tikiseli munhu ni un'we exikarhi ka n'wina.

⁹ A swi vuli leswaku a hi pfumala matimba ya ku mi kombela ku hi pfuna, kambe a ku ri ku mi komba ntila lowu mi faneleke ku famba ha wona.

¹⁰ Hikuva loko ha ha ri na n'wina, hi mi nyikile xileriso lexi nge: “Un'wana ni un'wana loyi a nga laviki ku tirha, ni ku dya a nga dyi!”

¹¹ Hi vula leswi hikuva hi twile leswaku ku ni van'wana exikarhi ka n'wina lava hanyaka hi vulolo, va nga laviki ku tirha, kambe va nghenelela timhaka ta van'wana.

¹² Kutani vanhu lavo tano ha va lerisa ni ku va tsundzuxa hi vito ra Hosi Yesu Kriste, leswaku va tirha ntirho wa vona hi ku rhula, va ta kota ku dya swakudya leswi nga swa vona.

¹³ Kambe n'wina vamakwerhu, loko mi ri karhi mi endla leswinene, mi nga karhaleni.

¹⁴ Loko ku ri ni un'wana loyi a alaka ku yingisa marito lawa hi mi rhumelaka wona hi papila leri, n'wi xiyaxiyeni, kutani mi nga vi na mhaka na yena, leswaku a ta khomiwa hi tingana.

¹⁵ Hambiswiritano, mi nga n'wi languti tanihi nala, kambe n'wi layeni tanihi makwenu.

Marito ya ku hetelela

¹⁶ Sweswi ke, Hosi ya ku rhula, hi xiviri xa yona, a yi mi nyike ku rhula minkarhi hinkwayo ne matlhelweni hinkwawo. Hosi a yi ve na n'wina hinkwenu!

¹⁷ Hi xandla xa mina ndzi tsala leswi ndzi ri: “Ndza mi rungula. Hi mina Pawulo.” Hi wona mfungho wa mina epapileni rin'wana ni rin'wana ra mina; hi swona leswi ndzi tsarisaka swona.

¹⁸ Tintswalo ta Hosi ya hina Yesu Kriste, a ti ve na n'wina hinkwenu!