2 Vakorinto 12 - BIBELE Mahungu Lamanene

Swivono ni tinhlavutelo

¹ Ndzi fanele ku tidzunisa. Hambileswi xi nga xihoxo, ndzi ta vulavula hi mhaka ya swivono ni tinhlavutelo to huma eka Hosi.

² Ndzi tiva munhu wa ka Kriste loyi a tlakuriweke a yisiwa etilweni ra le henhla-henhla, ku hundze malembe ya 14 sweswi (kumbe a a ri emirini wa yena, kumbe a a nga ri eka wona, a ndzi swi tivi, swo tiva hi Xikwembu).

³ Ndzi tiva leswaku munhu wa kona (kumbe a a ri emirini wa yena, kumbe a a nga ri eka wona, a ndzi swi tivi, swo tiva hi Xikwembu),

⁴ ú tlakuriwile a yisiwa eParadeyisini, a twa marito lama nga vulekiki, lawa munhu a nga pfumeleriwiki ku ma vula.

⁵ Ndzi ta tidzunisa hi munhu lowo tano; kambe ndzi nga ka ndzi nga tidzunisi ha ndzexe, loko ku nga ri ntsena hi ta ku tsana ka mina.

⁶ Loko a ndzi lavile ku tidzunisa, a byi nga ta va vuphukuphuku, hikuva a ndzi ta va ndzi vula ntiyiso; kambe leswi a ndzi nga swi endli, hikuva munhu un'wana a nga tshuka a anakanya leswo tlakuka ngopfu hi mina, ku tlula leswi a swi vonaka, kumbe a swi twaka eka mina.

⁷ Kutani ku endlela leswaku ndzi nga tikurisi ngopfu hikwalaho ka ku saseka lokukulu ka leswi Xikwembu xi nga swi hlavutela eka mina, ndzi nghenisiwile riphantsu enyameni, yi nga ntsumi ya Sathana, leswaku yi ndzi himetela.

⁸ Ndzi khongerile Hosi kanharhu hi mhaka ya xilo xexo, leswaku xi suka ka mina.

⁹ Kambe Hosi yi te ka mina: “Tintswalo ta mina eka wena ti ringene; hikuva matimba ya mina ma hetiseka laha ku nga ni ku tsana kona.” Hikokwalaho ndzi ta tsaka ngopfu ku tidzunisa hi ta ku tsana ka mina, leswaku matimba ya Kriste ma ta aka eka mina.

¹⁰ Hikokwalaho ndzi amukela hi ku tsaka ku tsana, ni maxangu, ni ku karhateka, ni ku xanisiwa, ni mahlomulo, hikwalaho ka Kriste; hikuva loko ndzi tsanile, hi kona ndzi nga ni matimba.

Pawulo a hisekela Vakorinto

¹¹ Ndzi ve xiphukuphuku! Hi n'wina mi ndzi sindziseke, kasi a mi ta va mi fanele ku ndzi dzunisa, hikuva hambiloko ndzi nga ri nchumu, a va ndzi tlulanga ha nchumu, vo lava va nge i “vaapostola lavakulu”.

¹² Ndzi mi nyikile vumbhoni bya leswaku ndzi muapostola wa xiviri, hi ku mi lehisela mbilu swinene, ni ku endla mahlori, ni swihlamariso, ni mintirho ya matimba exikarhi ka n'wina.

¹³ Xana mi tshama mi tluriwa hi tikereke tin'wana? Hi yini ke, loko ku nga ri ntsena hi leswi ndzi nga mi rhwexangiki ndzhwalo wo ndzi hlayisa? Ndzi khomeleni eka xihoxo xexo!

¹⁴ Ndzi tilunghisele ku ta ra vunharhu le ka n'wina; a ndzi nga mi tikiseli, hikuva a ndzi lavi swilo swa n'wina, kambe ndzi lava n'wina vinyi; hikuva vana a hi vona lava fanelaka ku hlayisela vatswari exuma, kambe i vatswari lava fanelaka ku hlayisela vana.

¹⁵ Loko ndzi ri mina, ndzi ta nyiketa swa mina hi ku tsaka, naswona ndzi ta tinyiketa hi xiviri xa mina ku mi pfuna; leswi ndzi mi rhandzaka ku tlula mpimo, xana mina ndzi fanele ku rhandziwanyana ntsena ke?

¹⁶ Swa twala, a ndzi mi tikiselanga; kambe, hi ku vula ka n'wina, mi ri ndzi munhu wa mano, kutani ndzi mi kanganyisile!

¹⁷ Xana ndzi mi dyelerile hi un'wana wa lava ndzi va rhumeke ka n'wina xana?

¹⁸ Ndzi khongoterile Tito ku ta le ka n'wina; kutani ndzi rhumile makwerhu un'wana leswaku a n'wi heleketa. Xana Tito ú mi dyelerile xana? Xana yena na mina a hi fambanga hi moya wun'we, ni le mitileni yin'we ke?

¹⁹ Nkarhi hinkwawo lowu, mi anakanya leswaku hi ringeta ku tisasekisa emahlweni ka n'wina. A hi swona! Hi vulavula emahlweni ka Xikwembu, hi ri va ka Kriste. Hinkwaswo leswi, varhandziwa, i swa ku mi aka.

²⁰ Ndzi chava leswaku, loko ndzi ta, ndzi ta mi kuma mi nga ha fani na leswi ndzi swi lavisaka swona, ni leswaku na mina, mi ta ndzi kuma ndzi nga ha fani na leswi mi swi lavisaka swona. Ndzi chava leswaku loko ndzi ta, ndzi ta kuma timholovo, ni mavondzo, ni vuntswaka, ni ku tirhandza, ni ku rhuketelana, ni mahlevo, ni ku tikukumuxa, ni madzolonga.

²¹ Ndzi chava leswaku loko ndzi ta le ka n'wina, Xikwembu xa mina xi nga tlhela xi ndzi tsongahata emahlweni ka n'wina, kutani ndza rila hikwalaho ka lavo tala lava dyoheke khale, lava nga hundzukangiki etimhakeni ta vona leto ka ti nga tenganga, ni ta vuoswi, ni ta manyala, leti va nga ti endla.