2 Timotiya 4 - BIBELE Mahungu Lamanene

¹ Emahlweni ka Xikwembu ni ka Kriste Yesu loyi a nga ta avanyisa lava hanyaka ni lava feke, ni hikwalaho ka ku humelela ka Yesu ni Mfumo wa yena, ndza ku khongotela swinene ndzi ri:

² Twarisa Rito, u hiseka hi nkarhi wa kona hambi ku nga ri hi nkarhi wa kona; khorwisa, u laya ni ku khongotela; u nga tsandzeki hi tlhelo ra ku lehisa mbilu ni le ku dyondziseni.

³ Hikuva nkarhi wa ta, lowu vanhu va nga ta ka va nga amukeli dyondzo leyi nga yona ya xiviri; kambe leswi tindleve ta vona ti hlohlonyaka, va ta tihlengeletela vadyondzisi lava nga ta va dyondzisa leswi va swi tsakelaka.

⁴ Kutani va ta fularhela ntiyiso, va nga ha wu yingisi, va pepetsekela emintsheketweni ya hava.

⁵ Kambe loko a ri wena, tiya minkarhi hinkwayo, byarha maxangu, tirha ntirho wa muvuri wa Rito, hetisa tifanelo ta ntirho wa wena.

⁶ Loko a ri mina, ndzi le kusuhi ni ku nyiketa vutomi bya mina egandzelweni; nkarhi wa ku rhurha ka mina wu fikile.

⁷ Ndzi lwile nyimpi leyinene, ndzi hetile mpfhuka wa mina wa ku tsutsuma, ndzi hlayisile ku pfumela.

⁸ Leswi saleke, hileswaku harhi ya vahluri yi ndzi yimerile, ku nga ku lulama loku Hosi, muavanyisi lowo lulama, yi nga ta ndzi nyika hi siku lerikulu; kutani a yi nga nyiki mina ntsena, kambe yi ta nyika ni hinkwavo lava tsakeleke ku humelela ka yona.

Switsundzuxo eka Timotiya

⁹ Endla hi matimba leswaku u ta haleno ka mina ku nga ri khale.

¹⁰ Hikuva Demasi, hi ku rhandza ngopfu swa misava leyi, ú ndzi balekerile a ya eTesalonika. Kreskene ú yile eGalatiya, na Tito ú yile eDalamatiya.

¹¹ I Luka ntsena la saleke na mina. Tana na Marka haleno, hikuva ú swi kota ngopfu ku ndzi tirhela.

¹² Tixiko ndzi n'wi rhumele le Efesa.

¹³ Loko u ta, tana ni jasi leri ndzi nga ri siya na Karpo le Trowasi, ni tibuku, ngopfu-ngopfu leto songa ta madzovo.

¹⁴ Aleksandro mufuri wa swa koporo ú ndzi onherile ngopfu; Hosi yi ta n'wi tlherisela hi leswi a ndzi endleke swona.

¹⁵ Na wena u tivonela eka yena, hikuva ú lwile ngopfu ni dyondzo ya hina.

¹⁶ Eku sunguleni ka ku tihlamulela ka mina ehubyeni, ku pfumalekile ni un'we wo yima na mina; hinkwavo va ndzi balekerile. Ingi va nga vekiwi nandzu eka swona.

¹⁷ Kambe Hosi yi yimile na mina yi ndzi tiyisa, leswaku ndzi kota ku vula Rito ndzi heta, ni leswaku vamatiko hinkwavo va ta kota ku ri twa. Naswona ndzi vutliwile enon'weni wa nghala;

¹⁸ Hosi yi ta ndzi vutla ni le ku biheni hinkwako, yi ndzi ponisa leswaku ndzi ta kuma Mfumo wa yona wa le matilweni. Eka yona a ku ve ku dzuneka hilaha ku nga heriki. Amen.

Marungulo yo hetelela

¹⁹ Rungula Prisila na Akwila ni va ndyangu wa ka Onesiforo.

²⁰ Erasto ú sele eKorinto. Trofimo ndzi n'wi siyile a vabya le Mileta.

²¹ Endla hi matimba leswaku u ta haleno vuxika byi nga si fika. Yubulo wa ku rungula; swi tano na Pude na Lino na Klawudiya, ni vamakwerhu hinkwavo.

²² Hosi a yi ve ni moya wa wena. Tintswalo a ti ve na wena.