2 Timotiya 2 - BIBELE Mahungu Lamanene

Nhenha leyinene ya Yesu Kriste

¹ Hikokwalaho n'wananga, tiya entintswalweni leti nge ka Kriste Yesu.

² Kutani leswi u swi tweke eka mina emahlweni ka timbhoni leto tala, swi hundzisele eka vanhu lavo tshembeka, lava na vona va nga ta kota ku dyondzisa van'wana.

³ Na wena, amukela ku xaniseka ku fana ni nhenha leyinene ya Kriste Yesu.

⁴ Loko nyimpi ya ha lwiwa, ku hava nhenha leyi pfaka yi ya tirha swa le kaya, hikuva ku navela ka yona lokukulu i ku tsakisa loyi a yi rhambeke ku ya lwa nyimpi ya kona.

⁵ Mutlangi wa mintlangu a nga tlhomiwi risiva, loko a nga landzi milawu ya kona.

⁶ Mutirhi loyi a tirheke hi matimba emasin'wini, hi yena loyi a fanelaka ku rhanga a kuma mihandzu ya kona.

⁷ Ehleketa leswi ndzi swi vulaka, hikuva Hosi yi ta ku nyika ku twisisa etimhakeni hinkwato.

⁸ Tsundzuka Yesu Kriste, wa rixaka ra Davhida, loyi a pfuxiweke eku feni, hilaha Evhangeli leyi ndzi yi twarisaka yi vulaka hakona.

⁹ Evhangeli ya kona yi ndzi vangele maxangu, ndzi ko ndzi bohiwa hi tinketani kukota xigevenga, kambe Rito ra Xikwembu rona a ri bohiwanga,

¹⁰ kutani, etimhakeni hinkwato, ndzi tiyisela hikwalaho ka vahlawuriwa va Xikwembu, leswaku na vona va ta kuma ku ponisiwa loku humaka eka Kriste Yesu, va kuma ni ku kwetsima loku nga heriki.

¹¹ Rito leri ri tiyile, leri nge: “Loko hi file na yena, nakona hi ta hanya na yena;

¹² loko hi tiyisela, nakona hi ta fuma na yena; loko hi n'wi landzula, na yena ú ta hi landzula;

¹³ loko hi nga tshembeki, yena wa tshembeka masiku hinkwawo, hikuva a nga ka a nga tilandzuli.”

Mutirhi la nkhensekaka

¹⁴ Tsundzuxa vakriste timhaka leti, u va byela swinene emahlweni ka Xikwembu leswaku va nga phikisani hi marito, yi nga mhaka leyi nga pfuniki nchumu, loko ku nga ri ntsena ku lovisa lava swi yingisaka.

¹⁵ Endla hi matimba ku vonaka u ri la nkhensekaka emahlweni ka Xikwembu, u nga ri na tingana hi ntirho wa wena, u dyondzisa Rito ra ntiyiso hi ndlela leyinene.

¹⁶ Chava ku vulavula swa hava leswi nga riki na vukhongeri, hikuva lava endlaka sweswo va tshamela ku sandza Xikwembu,

¹⁷ kutani ku vulavula ka vona, ku ta fana ni xilondza lexi pfundzelaka xi borisa miri. Exikarhi ka vona ku na va Himenayo na Fileto,

¹⁸ lava tshikeke ntiyiso, hi ku vula leswaku swa ku pfuka eku feni swi hundzile khale, kutani va khunguvanyisa van'wana eku pfumeleni.

¹⁹ Hambiswiritano, masungulo layo tiya lama vekiweke hi Xikwembu a ma tsekatseki; ma tiyisiwa hi rito leri nge: “Hosi yi tiva lava nga va yona.” Naswona: “Un'wana ni un'wana loyi a vulaka vito ra Hosi, a a tshike leswo homboloka.”

²⁰ Endlwini leyikulu, a ku na swibya swa nsuku ni swa silivhere ntsena, kambe ni swo vatliwa hi mintsandza ni swa vumba swi kona, kutani swin'wana swi ni ntirho lowukulu, swin'wana lowutsongo.

²¹ Hikokwalaho, loko munhu a tibasisa eka swilo leswitsongo, ú ta va xibya xo tirha leswikulu, lexi hlawulekeke ni ku pfuna n'wini wa yindlu, xi yimela ku tirha ntirho wihi na wihi lowunene.

²² Chava ku hluriwa hi ku navela loku telaka lavantshwa, u kongoma ku lulama, ni ku pfumela, ni rirhandzu, ni ku rhula, swin'we ni lava khongelaka Hosi hi timbilu leti tengeke.

²³ U nga vi ni mhaka ni ku kanetana ka vuphukuphuku loku nga pfuniki nchumu; wa swi tiva leswaku swi tswala timholovo.

²⁴ Nandza wa Hosi a nga faneli ku va munhu wa timholovo, kambe a a ve ni musa eka munhu un'wana ni un'wana, a va mudyondzisi loyi a swi kotaka, a lehisa mbilu,

²⁵ a laya vakaneti va yena hi vukhwatsi; hikuva kumbexana Xikwembu xi nga endla leswaku va tisola va hundzuka, va fika laha va nga tivaka leswi nga ntiyiso.

²⁶ Kutani va nga kota ku pona entlhan'wini wa Diyavulosi, loyi a va khomeke ku va endlisa ku rhandza ka yena.