2 TIKRONIKA 7 - BIBELE Mahungu Lamanene

Ta Solomoni loko a humesela Xikwembu emagandzelo

¹ Loko Solomoni a heta ku khongela, ndzilo wu ta hi le tilweni, wu herisa nyama ya magandzelo lama hisiwaka, ni ya magandzelo ya xinakulobye, kutani ku vonakala ka HOSI Xikwembu ku tata Tempele hinkwayo.

² Vaprista a va tsandzeka ku nghena eTempeleni, hikuva a yi tele hi ku vonakala ka HOSI Xikwembu.

³ Loko Vaisraele hinkwavo va vona leswaku ndzilo wu xikile hi le tilweni, ni leswaku ku vonakala ka HOSI Xikwembu ku tata Tempele, va nkhinsama mimombo ya vona yi ko yi khumba ehansi, va khongela ni ku tlangela Xikwembu, va ku: “HOSI yi ni vunene, rirhandzu ra yona hi leri nga heriki!”

⁴ Kutani hosi Solomoni ni Vaisraele hinkwavo va humesela HOSI Xikwembu emagandzelo.

⁵ Solomoni a humesela HOSI Xikwembu emagandzelo ya xinakulobye, hi swifuwo leswikulu swa 22 000, ni swifuwo leswitsongo swa 120 000. Kutani hosi Solomoni ni Vaisraele hinkwavo va khangurisa sweswo yindlu ya HOSI Xikwembu.

⁶ Vaprista va sungula ku tirha mintirho ya vona; na vona Valevhi va sungula ku dzunisa HOSI Xikwembu hi swichaya-chayani leswi endliweke hi hosi Davhida, va tlangela HOSI Xikwembu ha swona, va ri karhi va ku: “Rirhandzu ra xona hi leri nga heriki!” Risimu leri, a va lerisiwile rona hi Davhida. Kutani vaprista va yima va langutana ni Valevhi, va ri karhi va chaya tinanga, Vaisraele lavan'wana hinkwavo va yimile kunene.

⁷ Kutani hosi Solomoni a hlawulekisa ndhawu ya le xikarhi exivaveni lexi nga mahlweni ka Tempele, a humesela kona magandzelo lama hisiwaka, ni mafurha ya magandzelo ya xinakulobye, hikuva alitari ya koporo leyi Solomoni a yi endleke, a yi ri yitsongo ngopfu ku humesela eka yona swa magandzelo lawa hinkwawo.

⁸ Enkarhini wolowo, Solomoni a endla ni Nkhuvo wa Mintsonga, wa masiku ya 7, a ri ni vanhu hinkwavo va Israele. A yi ri nhlengeletano leyikulu ya vanhu lava a va huma etikweni hinkwaro, ku sukela exiphandzeni xa Hamata en'walungwini, ku ya fika ni le ndzilekaneni wa Egipta le dzongeni.

⁹ Kutani hi siku ra vu-8, va hlengeletana ro hetelela ku gandzela Xikwembu. Hikokwalaho, ntirho wo khangula alitari wu hetile masiku ya 7, na wona Nkhuvo wa Mintsonga wu hetile masiku ya 7.

¹⁰ Hi siku ra vu-23 ra n'hweti ya vu-7, Solomoni a hangalasa nkhuvo, vanhu va muka va tsakile ngopfu, va tlangela ku saseka ka hinkwaswo leswi HOSI Xikwembu xi swi kombeke Davhida, na Solomoni, ni Vaisraele vanhu va xona.

Xikwembu xi tikomba eka Solomoni ra vumbirhi

¹¹ Solomoni a a hetile ku aka yindlu ya HOSI Xikwembu ni tindlu ta yena ta le ntsindza, hinkwaswo swi humelerile hilaha a ringaniseke hakona.

¹² Kutani HOSI Xikwembu xi tikomba eka yena nivusiku, xi ku: “Ndzi yingisile ku khongela ka wena, kutani ndhawu leyi, ndzi tihlawulerile yona, leswaku yi va yindlu leyi va nga ta ndzi humesela magandzelo eka yona.

¹³ Nkarhi wun'wana ndzi nga pfala matilo, mpfula yi nga ha ni, kumbe ndzi lerisa tinjiya ti onha masimu, kumbe ndzi vanga mintungu exikarhi ka vanhu va mina.

¹⁴ Kambe loko vanhu va mina va hundzuka, va ndzi khongela hi ku titsongahata va ri karhi va lavisisa ku rhandza ka mina, ni loko va tshika tindlela ta vona leto homboloka, mina ndzi ta va yingisa ndzi ri ematilweni, ndzi va rivalela swidyoho swa vona, ndzi horisa tiko ra vona.

¹⁵ Mahlo ya mina ma ta pfuleka ni tindleve ta mina ti ta twa xikhongelo lexi xi nga ta endliwa endhawini leyi.

¹⁶ Kutani sweswi, ndzi hlawula yindlu leyi, ndzi tlhela ndzi yi hlawulekisa leswaku vito ra mina ri twariseriwa eka yona hilaha ku nga heriki; ndzi ta yi hlayisa ni ku yi sirhelela minkarhi hinkwayo.

¹⁷ Kutani loko wena Solomoni u hanya hi tindlela ta mina, tanihi leswi Davhida tata wa wena a hanyiseke xiswona, ni loko u yingisa hinkwaswo leswi ndzi ku leriseke swona, u hlayisa milawu ya mina ni swiletelo swa mina,

¹⁸ ndzi ta tiyisa vuhosi bya wena, hikwalaho ka ntwanano lowu ndzi wu endleke na Davhida tata wa wena, loko ndzi te: ‘A wu nga pfumali munhu ni siku ni rin'we loyi a nga ta fuma Vaisraele.’

¹⁹ “Kambe loko n'wina mi ndzi fularhela, ni loko mi nga hlayisi milawu ya mina ni swileriso leswi ndzi mi nyikeke swona, kambe mi suka mi ya tirhela ni ku khongela swikwembu swimbe,

²⁰ ndzi ta mi susa etikweni leri ndzi mi nyikeke rona. Na yona Tempele leyi ndzi yi hlawuleke ku twarisa vito ra mina eka yona, ndzi ta yi cukumeta kule na mina; kutani mi ta hundzuka xihlambanyiso ni xihlekiso exikarhi ka vamatiko hinkwavo.

²¹ Tempele leyi yo saseka swonghasi, vahundzi va ndlela va ta yi hlamala, va ku: ‘Xana HOSI Xikwembu xi cukumetele yini tiko leri ni Tempele leyi xana?’

²² Kutani va ta nyikiwa nhlamulo leyi nge: ‘Hi leswi va tshikeke HOSI Xikwembu xa vatata wa vona, lexi xi va humeseke etikweni ra Egipta, kutani va ya namarhela swikwembu swimbe, va swi nkhinsamela ni ku swi tirhela. Hi swona leswi endleke leswaku Xikwembu xa vona xi va vangela makhombo lawa hinkwawo.’ ”