2 TIKRONIKA 3 - BIBELE Mahungu Lamanene

Solomoni a aka yindlu ya Xikwembu

¹ Kutani Solomoni a sungula ku aka Tempele ya HOSI Xikwembu eYerusalema, endhawini leyi vuriwaka “Ntshava-ya-Moriya”, laha khale a ku ri ni xivuya xa muti wa Orinani lowa Muyebusi. Davhida tata wa Solomoni a a hlawurile ndhawu yoleyo, hikuva hi kona laha HOSI Xikwembu a xi tikombile eka yena.

² Solomoni a sungula ku aka Tempele hi n'hweti ya vumbirhi ya lembe ra vumune ra ku fuma ka yena.

³ Yindlu ya Tempele leyi Solomoni a yi akeleke HOSI Xikwembu a yi ri ni mimpimo leyi: A yi lehile 30 m, yi anamile 10 m.

⁴ Rikupakupa emahlweni ka nyangwa ya Tempele a ri lehile 10 m, ri ringana ni Tempele hi ku anama; naswona a ri lehile 10 m ku ya ehenhla; Solomoni a lerisa leswaku khumbi ra rona ra le ndzeni ri namekiwa nsuku lowo tenga.

⁵ Kutani a pfala makhumbi ya le ndzeni ka xivandla lexo hlawuleka ngopfu hi mapulangi ya murhi wa kipresi, mapulangi lawa a tlhela a ma nameka nsuku, a ma khavisa hi swifaniso swa mirhi ya mincindzu ni swa tinketani letitsongo.

⁶ Naswona Solomoni a sasekisa Tempele hi maribye ya nkoka. Nsuku lowu a wu tirhiseke a wu huma eParavhiyami.

⁷ Tempele hinkwayo, a yi nameka nsuku wolowo hi le ndzeni, hileswaku timhandze ta lwangu ra yona, ni swihukuva, ni makhumbi, ni timbanti, a engeta a khavisa makhumbi hi swifaniso leswi kovotliweke swa tikerubu.

⁸ Solomoni a endla ni xivandla lexo hlawuleka ngopfu; a xi anamile 10 m ku fana ni yindlu ya Tempele, xi lehile 10 m ku ya endzeni. Nsuku lowu a nga wu nameka ekhumbini ra xona a wu tika ku tlula tithani ta 24.

⁹ Swipikiri leswi a va tirhisa swona a swi namekiwile nsuku, xin'we xi tika 600 g; na wona makhumbi ya makamari ya swithezi a va ma namekile nsuku.

¹⁰ Solomoni a n'okisa nsimbhi, a endla swifaniso swimbirhi swa tikerubu, a ti nameka nsuku, a ti veka exivandleni lexo hlawuleka ngopfu.

^11-13 Tikerubu leti a ti yimile ti langutana ni nyangwa hi tlhelo ra vuxa. Kerubu yin'wana ni yin'wana a yi ri ni timpapa timbirhi leti pfulekeke, kutani tikerubu ta kona a ti khumbana hi ripapa rin'we exikarhi ka xivandla; hi ripapa lerin'wana a ti khumbana ni khumbi ra xivandla hala ni hala. Ripapa rin'we a ri lehile 2,50 m, kutani timpapa hinkwato loko ti pfulekile a ti endla 10 m.

¹⁴ Solomoni a endla ni xisirhelelo hi voya bya muhlovo wa rihlaza ra tilo, ni muhlovo wa xivunguvungu, ni muhlovo lowo tshwuka, swi lukiwile hi tingoti ta ntsembyani lowo saseka; kutani a sasekisa xisirhelelo lexi hi swifaniso swa tikerubu.

Ta tiphuphu timbirhi ta koporo

¹⁵ Emahlweni ka Tempele, Solomoni a yimisa tiphuphu timbirhi leti leheke 17,50 m ku ya henhla, phuphu yin'wana ni yin'wana yi tlhandlekiwile xidlodlo lexikulu lexi leheke 2,50 m ku ya henhla.

¹⁶ Solomoni a endla ni tinketani letitsongo leti fanaka ni vuhlalu, ti sasekisa swidlodlo etinhlokweni ta tiphuphu; a fula ni swikhaviso swa 100 swo fana ni swihenge, a swi khomanisa ni tinketani.

¹⁷ Solomoni a yimisa tiphuphu leti timbirhi enyangweni ya Tempele, yin'wana hi tlhelo ra le dzongeni, yin'wana hi tlhelo ra le n'walungwini; leya le dzongeni, a yi thya vito ra “Yakini” (hileswaku “HOSI-ya-tiyisa”), leya le n'walungwini a yi thya vito ra “Bowazi” (hileswaku “Ntamu-wu-le-ka-yona”).