2 TIKRONIKA 21 - BIBELE Mahungu Lamanene

¹ Yoxafati a tietlelela, a lahliwa emasirheni ya vakokwa wa yena, emutini wa kokwa wa yena Davhida, kutani Yehoramu n'wana Yoxafati a sala a fuma.

Ta Yehoramu hosi ya Yuda

² Yoxafati hosi ya Yuda a a ri ni vana va 7; mavito ya vona hi ku tlhandlamana ka vona hi lawa: Yehoramu, na Azariya, na Yehiele, na Zakariya, na Azariyahu, na Mikaele, na Xefatiya.

³ Tata wa vona ú va nyikile tinyiko to saseka ta nsuku ni silivhere, a va nyika ni swilo swin'wana swa nkoka, ni miti ya makhokholo etikweni ra Yuda. Kambe vuhosi byona ú byi nyikile Yehoramu, hikuva a a ri yena mativula.

⁴ Loko Yehoramu a vekiwile ku va hosi ni loko a tiyisile mfumo wa yena, a dlaya vamakwavo hinkwavo, a dlaya ni tindhuna tin'wana ta ka Yuda.

⁵ Loko Yehoramu a sungula ku fuma, a a ri ni malembe ya 32, kutani a fuma malembe ya 8 a ri eYerusalema.

⁶ Yehoramu a hanya hi tindlela ta tihosi ta Israele, ku fana ni va ndyangu wa Akabu, hikuva nsati wa yena a a ri N'wa-Akabu. Kutani Yehoramu a endla leswo biha emahlweni ka HOSI Xikwembu.

⁷ Hambiswiritano, hikwalaho ka Davhida nandza wa xona, HOSI Xikwembu a xi lavanga ku herisa tiko ra Yuda; a xi tshembisile leswaku rixaka ra Davhida ri nga ka ri nga tekeriwi vuhosi ni siku ni rin'we.

⁸ Enkarhini wa Yehoramu, vanhu va tiko ra Edomu va hundzukela mfumo wa tiko ra Yuda, va tihlawulela hosi ya vona.

⁹ Kutani Yehoramu ni tindhuna ta yena ni vafambisi va makalichi ya yena hinkwawo va ya hlasela tiko ra Edomu, kambe Vaedomu va va rhendzela, kutani Yehoramu a pfuka nivusiku, a va dlaya, a dlaya ni vafambisi va makalichi.

¹⁰ Ku sukela siku rero, Vaedomu a va ha fumiwanga hi tiko ra Yuda, ku fikela ninamuntlha. Enkarhini wolowo, muti wa Libina na wona wu hundzukela tiko ra Yuda, hikuva Yehoramu a a tshikile tindlela ta HOSI, Xikwembu xa vatata wa yena.

¹¹ Yehoramu ú pfuxile mintirho ya le switsungeni leswo hlawuleka emagangeni ya Yuda, a dyohisa vanhu va tiko ra Yuda ni lava akeke eYerusalema.

¹² Kutani muprofeta Eliya a tsalela Yehoramu papila leri nge: “HOSI Xikwembu xa Davhida kokwa wa wena xi vula sweswo xi ri: ‘U tshikile tindlela ta Yoxafati tata wa wena ni ta Asa hosi ya Yuda;

¹³ u dyohisile vanhu va Yuda ni vaaki va Yerusalema hi ku landzelela mikhuva ya tihosi ta Israele, ku fana na Akabu loyi a dyohiseke Vaisraele. Naswona wena Yehoramu, u dlayile vamakwenu lava a va ku tlula hi vumunhu.

¹⁴ Hikokwalaho, mina HOSI ndzi ta vanga ntungu lowukulu wu ba tiko ra wena, ni vana va wena, ni vasati va wena, ni swifuwo swa wena hinkwaswo.

¹⁵ Na wena, u ta khomiwa hi vuvabyi bya le ndzeni, u chuluka masiku hinkwawo ku kondza ku huma ni marhumbu.’ ”

¹⁶ Kutani HOSI Xikwembu xi hlohlotela Vafilista, ni Maarabu lama tshamaka kusuhi ni va le Etiyopiya, leswaku va pfukela Yehoramu,

¹⁷ kutani va ta va ta hlasela tiko ra Yuda, va phangha ni rifuwo ra hosi, va khoma vasati va yena, ni vana va yena; exikarhi ka vana va yena, va siya ntsena Ahaziya lowa rikotsa.

¹⁸ Eku heteleleni, HOSI Xikwembu xi ba Yehoramu hi vuvabyi bya le ndzeni bya ntsandza-vatshunguri,

¹⁹ a heta malembe mambirhi a ri karhi a chuluka, ku kondza marhumbu ya yena ma humela handle, a fa a ri karhi a twa ku vava lokukulu. Vanhu va yena a va ha tshivelanga ndzilo loko a fa, tani hileswi a va swi endlele vatata wa yena.

²⁰ Yehoramu a a ri ni malembe ya 32 loko a sungula ku fuma, kutani a fuma malembe ya 8 a ri eYerusalema. Loko a lova, vanhu a va n'wi rilanga. Va n'wi lahlile emutini wa Davhida, kambe ku nga ri emasirheni ya tihosi.