2 TIHOSI 22 - BIBELE Mahungu Lamanene

Ta ku fuma ka Yosiyasi eYuda

¹ Yosiyasi a a ri ni malembe ya 8 loko a sungula ku fuma, kutani a fuma malembe ya 31 a ri eYerusalema. Mana wa yena a a ri Yedida, N'wa-Adaya wa le Bosikata.

² A endla leswi lulameke emahlweni ka HOSI Xikwembu, a famba etindleleni hinkwato ta Davhida kokwa wa yena, a nga hambuki eka tona nikutsongo.

Ta ku pfuxiwa ka Tempele

³ Hi lembe ra vu-18 ra ku fuma ka yena, hosi Yosiyasi a rhuma matsalani Xafani n'wana Asaliya ntukulu wa Mexulama ku ya endlwini ya HOSI Xikwembu; a n'wi lerisa a ku:

⁴ “Tlhandlukela eka Hilkiya muprista lonkulu, u ya n'wi byela leswaku a hlaya ntsengo wa mali leyi tisiweke endlwini ya HOSI Xikwembu, leyi vaprista lava rindzaka tinyangwa va yi hlengeleteke yi huma eka vanhu.

⁵ Mali leyi, yi fanele ku tamerisiwa vafambisi va ntirho lava vonaka swa ku pfuxa yindlu ya HOSI Xikwembu; kutani vona va ta hakela ha yona vatirhi lava pfalaka timfa eTempeleni,

⁶ va nga vavatli, ni vaaki, ni lava akaka hi maribye; kutani ha yona va ta xava timhandze ni maribye lama vatliweke, va pfuxa Tempele.

⁷ Kambe mi nga va vutisi nchumu hi mali leyi mi va tameriseke yona, hikuva va tirha hi ku tshembeka.”

Ta ku thumbhiwa ka Buku ya Nawu

⁸ Kavaloko Hilkiya muprista lonkulu a byela matsalani Xafani, a ku: “Ndzi thumbhile Buku ya Nawu endlwini ya HOSI Xikwembu.” Hilkiya a nyika Xafani buku ya kona kutani Xafani a yi hlaya.

⁹ Hiloko matsalani Xafani a tlhela, a ya tivisa hosi, a ku: “Malandza ya wena ma hlayile mali hinkwayo leyi a yi hlengeletiwile eTempeleni, kutani va yi tamerisile vafambisi va ntirho lava vonaka swa ku pfuxa yindlu ya HOSI Xikwembu.”

¹⁰ Matsalani Xafani a engeta a ku ka hosi: “Muprista Hilkiya ú ndzi tamerisile buku.” Kutani Xafani a yi hlayela hosi.

¹¹ Loko hosi yi twa marito ya Buku ya Nawu, yi handzulela swiambalo swa yona.

¹² Kutani yi vitana muprista Hilkiya, na Ahikama n'wana Xafani, na Akibora n'wana Mikaya, na matsalani Xafani hi byakwe, na Asaya nandza wa yona, yi va lerisa yi ku:

¹³ “Yanani mi ya ndzi vutisela eka HOSI Xikwembu, mi vutisela ni vanhu hinkwavo ni tiko hinkwaro ra Yuda, hi ta marito ya buku leyi yi nga thumbhiwa leyi; hikuva vukari bya HOSI Xikwembu i byikulu ehenhla ka hina, hikwalaho ka vakokwa wa hina lava nga yingisangiki marito ya buku leyi, lava nga landzangiki na xin'we xa leswi tsariweke eka yona.”

¹⁴ Kutani muprista Hilkiya, na Ahikama, na Akibora, na Xafani, na Asaya, va ya eka muprofeta wa xisati Hulida, nkata Xalumi n'wana Tikivha ntukulu wa Harihasi, muhlayisi wa swiambalo swa vaprista (enkarhini wolowo, Hulida a a tshama exivandleni xa Yerusalema lexi a xa ha ku akiwa), va fika va vulavula na yena.

¹⁵ Kutani Hulida a va byela ku tlhelela eka loyi a va rhumeke, va ya n'wi tivisa marito ya HOSI Xikwembu xa Israele, lama nge:

¹⁶ “Yingisani! Ndzi vurisa sweswo mina HOSI ndzi ri, ndzi ta vanga khombo endhawini leyi ni le henhla ka vaaki va yona, hi ku landza marito hinkwawo ya buku leyi yi hlayiweke hi hosi ya Yuda.

¹⁷ Va ndzi fularhele, va hisile mirhi ya risuna va hisela swikwembu swimbe; va ndzi hlundzukisile ngopfu hi mintirho ya vona hinkwayo. Hikokwalaho, vukari bya mina byi ta pfurhela ndhawu leyi, byi nga ka byi nga timeki.”

¹⁸ Hulida a engeta a ku: “Hosi ya Yuda yi mi rhumile ku ta twa leswaku xana HOSI Xikwembu xi ri yini. Yi byeleni leswaku xona Xikwembu xa Israele xi vurisa sweswo xi ri: ‘We Yosiyasi, u ma twile marito lawa,

¹⁹ kutani u tisorile hi mbilu. U titsongahatile emahlweni ka mina endzhaku ka loko u twile hilaha ndzi vulavuleke hakona ehenhla ka ndhawu leyi ni le henhla ka vaaki va yona, loko ndzi te: Laha, ku ta hundzuka marhumbi ni xivandla lexi rhukaniweke; kutani u handzulerile swiambalo swa wena, u rila mihloti emahlweni ka mina. Hikokwalaho, na mina HOSI ndzi ku twile.

²⁰ Vona, ndzi ta pfumela leswaku u tietlelela ku fana ni vakokwa wa wena, u latiwa hi ku rhula esirheni ra wena; u nga ka u nga voni makhombo hinkwawo lawa ndzi nga ta ma vangela ndhawu leyi.’ ” Hiloko va tlhelela eka hosi Yosiyasi ni mahungu wolawo.