2 SAMIELE 5 - BIBELE Mahungu Lamanene

Davhida a vekiwa ku va hosi ya Israele

¹ Vanhu va tinyimba hinkwato ta Israele va ya eka Davhida eHebroni, va fika va ku ka yena: “Vona, hina na wena hi nyama yin'we ni ngati yin'we.

² Khale loko Sawulo a ha ri hosi ya hina, hi wena u fambiseke mavuthu ya Israele enyimpini; naswona HOSI Xikwembu xi ku tshembisile xi ku: ‘Hi wena loyi u nga ta va murisi ni mufambisi wa tiko ra mina ra Israele.’ ”

³ Kutani vakulukumba hinkwavo va Israele va hlengeletana entsindza eHebroni, kutani hosi Davhida a endla ntwanano na vona kwale Hebroni, emahlweni ka HOSI Xikwembu. Kavaloko va n'wi veka ku va hosi ya Israele hi ku n'wi chela mafurha enhlokweni.

⁴ Davhida a a ri ni malembe ya 30 loko a sungula ku fuma, kutani a fuma malembe ya 40.

⁵ A fuma Yuda malembe ya 7 ni tin'hweti ta 6, a ri eHebroni, kutani a fuma Yuda na Israele malembe ya 33, a ri eYerusalema.

Ta Davhida loko a teka muti wa Yerusalema

⁶ Kutani hosi Davhida ni masocha ya yena va hloma matlhari va ya eYerusalema ku ya hlasela Vayebusi, vaaki va muti wa Yerusalema. Vayebusi va ku ka Davhida: “Laha kona, u nga ka u nga ngheni, hikuva hambi va ri lavo-fe-mahlo ni lava swilema va ta ku sivela!” Vanhu lava a va ehleketa leswaku Davhida a nge ngheni emutini wa vona ni siku ni rin'we.

⁷ Hambiswiritano, Davhida ú swi kotile ku teka khokholo ra Siyoni, kutani sweswi ri vuriwa “Muti-wa-Davhida”.

⁸ Hi siku rero, Davhida a byela masocha ya yena a ku: “Loyi a lavaka ku hlasela Vayebusi, a a nghene laha ku nga boxiwa ndlela ya mati, a ya lwa ni vanhu lavaya va ‘swilema ni lavo-fe-mahlo’, lava va ndzi vengaka ngopfu, mina Davhida!” (Hikokwalaho ku sunguriwile xivuriso lexi nge: “Lavo-fe-mahlo ni lava swilema va nga ka va nga ngheni endlwini ya HOSI Xikwembu.”)

⁹ Kutani Davhida a tshama ekhokholweni, a ri thya vito ra “Muti-wa-Davhida”. Kutani a aka muti matlhelo hinkwawo hi le ndzeni, ku sukela laha va nge hi le “Milo”.

¹⁰ Matimba ya Davhida a ma ya ma engeteleka, hikuva HOSI Xikwembu xa matimba hinkwawo a xi ri na yena.

Hiramu a seketela Davhida

¹¹ Hiramu hosi ya le Tiri a rhumela vayimeri va yena eka Davhida, a n'wi rhumela ni timhandze ta murhi wa kedari, ni vatirhi lava tivaka ku vatla timhandze ni maribye, va ya akela Davhida eyindlu ha swona.

¹² Kutani Davhida a swi vona leswaku hakunene HOSI Xikwembu xi tiyisile vuhosi bya yena ehenhla ka Vaisraele, ni leswaku xi kurisile mfumo wa yena, hikwalaho ka vona Vaisraele vanhu va xona.

Vana va Davhida lava velekiweke eYerusalema

¹³ Loko Davhida a rhurhile eHebroni, a fika a teka vasati van'wana, lavakulu ni lavatsongo, le Yerusalema, kutani a veleka vana van'wana va xinuna ni va xisati.

¹⁴ Vana va Davhida lava velekiweke eYerusalema hi lava: Xamuwa, na Xobabu, na Natani, na Solomoni,

¹⁵ na Yibehari, na Elixuwa, na Nefege, na Yafiya,

¹⁶ na Elixama, na Eliyada, na Elifale.

Ta Davhida loko a hlula Vafilista

¹⁷ Loko Vafilista va twa leswaku Davhida ú cheriwile mafurha enhlokweni leswaku a va hosi ya Israele, va huma nyimpi hinkwavo, va famba va n'wi hlota. Kambe Davhida a twa mhaka leyi, kutani a rhelela a ya tumbela ekhokholweni.

¹⁸ Vafilista a va fikile, va tata nkova wa Refayimi.

¹⁹ Kutani Davhida a vutisa timhaka eka HOSI Xikwembu, a ku: “Loko ndzo huma ndzi ya lwa ni Vafilista, xana u ta va nyiketa emavokweni ya mina xana?” HOSI Xikwembu xi hlamula xi ku: “Yana, hikuva ndzi ta va nyiketa emavokweni ya wena.”

²⁰ Hiloko Davhida a huma a ya lwa na vona eBaala-Perasimi, a va hlulela kona, kutani a ku: “HOSI Xikwembu xi fayile valala emahlweni ka mina, xi va hangalasa tanihi ndhambi ya mati!” Hikokwalaho, ndhawu yeleyo yi thyiwe vito ra Baala-Perasimi (hileswaku: “N'wini-wa-ku-faya”).

²¹ Vafilista va tsutsuma va siya swikwembu swa vona leswi vatliweke kwale Baala-Perasimi, kutani Davhida ni masocha ya yena va swi teka va famba na swona.

²² Vafilista va tlhela va vuya, va tata nkova wa Refayimi.

²³ Hiloko Davhida a engeta a vutisa timhaka eka HOSI Xikwembu, kambe xi hlamula xi ku: “U nga va kongomi kunene, keketlela u ya ta hi le ndzhaku ka vona, ku langutana ni mirhi leyi vuriwaka ya ‘mabaka’.

²⁴ Kutani loko u twa mpfumawulo wo fana ni swigingi swa vanhu ehenhla ka mirhi ya ‘mabaka’, tilulamise, hikuva mina HOSI ndzi ta va ndzi ku rhangele emahlweni ku ya hlasela mavuthu ya Vafilista.”

²⁵ Davhida a endla hilaha HOSI Xikwembu xi n'wi leriseke hakona, kutani a hlula Vafilista ku sukela eGeba ku ya fika eGezere.