2 SAMIELE 24 - BIBELE Mahungu Lamanene

Ta Davhida loko a hlaya vanhu va Israele ni va le Yuda

¹ Hosi Xikwembu xi tlhela xi hlundzukela Vaisraele, kutani xi kucetela Davhida ku endla leswi nga ta va khunguvanyisa, xi ku ka yena: “Famba u hlaya vanhu va Israele ni va le Yuda.”

² Kutani hosi Davhida a lerisa Yowabu ni tindhuna ta mavuthu leti a ti ri na yena, a ku: “Rhendzelekani ni tinyimba ta Israele, ku sukela eDani ku ya fika eBerexeba, mi famba mi hlaya vanhu leswaku ndzi ta tiva ntsengo wa vona.”

³ Yowabu a hlamula a ku: “Ingi HOSI Xikwembu xa wena xi nga andzisa kadzana ntsengo wa vanhu va Israele, u ri karhi u swi vona hi wexe, wena hosi n'wini wanga! Kambe hikwalaho ka yini u tsakela ku tiva ntsengo wa vona ke, wena hosi n'wini wanga?”

⁴ Kambe hosi Davhida a hlula Yowabu ni tindhuna ta mavuthu hi marito ya yena; kutani Yowabu ni tindhuna ta mavuthu va suka eka hosi Davhida, va famba va hlaya vanhu va Israele.

⁵ Va pela nambu wa Yordani, va ya sungula eArowere ni le mutini lowu nga nkoveni, kutani va kongoma eGadi ni le Yazere.

⁶ Kutani va ya fika eGiliyadi ni le Kadexe, etikweni ra Vahiti. Va suka kona, va ya fika eDani-Yaani, kutani va ya rhendzeleka ni le matlhelweni ya Sidoni;

⁷ va fika ni le khokholweni ra le Tiri, ni le mitini ya Vahivhi ni ya Vakanana, kutani va kongoma edzongeni ra Yuda, emutini wa Berexeba.

⁸ Loko va rhendzelekile ni tiko hinkwaro, va tlhelela eYerusalema, endzhaku ka tin'hweti ta 9 ni masiku ya 20.

⁹ Kutani Yowabu a vikela hosi Davhida entsengo wa vanhu lava hlayiweke: Etikweni ra Israele, vavanuna lava a va ri ni matimba yo lwa nyimpi a va ri 800 000, kasi va le Yuda a va ri 500 000.

¹⁰ Endzhaku ka loko Davhida a hlayile vanhu, a biwa hi ripfalo, kutani a ku ka HOSI Xikwembu: “Ndzi dyohe ngopfu eka leswi ndzi swi endleke, kambe sweswi, we HOSI Xikwembu, ndzi kombela leswaku u susa nandzu wa mina nandza wa wena; hikuva leswi ndzi swi endleke i vuphukuphuku lebyikulu!”

¹¹ Loko Davhida a pfuka nimpundzu, rito ra HOSI Xikwembu ri fika eka muprofeta Gadi, mavonakule wa Davhida, leri nge:

¹² “Yana u ya byela Davhida leswaku mina HOSI ndzi lava ku n'wi vangela swilo swinharhu, kutani a a hlawule xin'we eka swona, lexi ndzi nga ta n'wi ba ha xona.”

¹³ Gadi a fika eka Davhida, a n'wi vikela timhaka, kutani a n'wi vutisa a ku: “U hlawula yini eka leswi xana: Malembe ya 7 ya ndlala etikweni ra wena; kumbe ku hlongorisiwa hi valala va wena, u tsutsuma tin'hweti tinharhu; kumbe ntungu wa masiku manharhu etikweni ra wena, xana? Kambisisa mhaka leyi sweswi, u hlawula nhlamulo leyi ndzi nga ta tlhela na yona eka loyi a ndzi rhumeke.”

¹⁴ Davhida a hlamula Gadi a ku: “Ndzi le khombyeni lerikulu! Swa antswa loko hi wela emavokweni ya HOSI Xikwembu, hikuva tintswalo ta xona i tikulu swinene; ndzi nga tshuki ndzi wela emavokweni ya vanhu!”

¹⁵ Kutani HOSI Xikwembu xi rhumela ntungu etikweni ra Israele. Ku sukela nimpundzu ku ya fikela nkarhi lowu a xi wu vekile, ku fa vavanuna va 70 000, ku sukela eDani ku ya fika eBerexeba.

¹⁶ Loko ntsumi yi kongoma muti wa Yerusalema ku ya wu herisa, HOSI Xikwembu xi yimisa ntungu lowu wo chavisa, kutani xi byela ntsumi leyi a yi ri karhi yi herisa vanhu xi ku: “Swi ringene, yima!” Enkarhini lowu, ntsumi ya HOSI Xikwembu a yi yimile kusuhi ni xivuya xa Arawuna wa Muyebusi.

¹⁷ Loko Davhida a vona ntsumi leyi a yi ri karhi yi dlayetela vanhu, a ku ka HOSI Xikwembu: “Hi mina ndzi dyoheke, nandzu wu na mina. Xana vambuyangwana lava va onhile yini xana? Ndzi kombela leswaku u ba mina, ni va ndyangu wa mina.”

¹⁸ Hi siku rero, muprofeta Gadi a ta eka Davhida, a ku ka yena: “Tlhandluka, u ya akela HOSI Xikwembu alitari exivuyeni xa Arawuna lowa Muyebusi.”

¹⁹ Davhida a tlhandluka hilaha Gadi a n'wi byeleke hakona, hi ku lerisiwa hi HOSI Xikwembu.

²⁰ Loko Arawuna a languta enkoveni, a vona hosi Davhida ni malandza ya yena va ri karhi va tlhandlukela eka yena; hiloko a suka exivuyeni, a ya nkhinsamela hosi Davhida, mombo wa yena wu ko wu khumba ehansi.

²¹ Kutani a ku: “Hosi n'wini wanga! Xana ndzi nga ku pfuna ha yini, mina nandza wa wena, xana?” Davhida a hlamula a ku: “Ndzi tela ku ta xava xivuya xa wena, ndzi ta akela HOSI Xikwembu alitari eka xona, leswaku ntungu wu ta suka etikweni.”

²² Hiloko Arawuna a ku ka Davhida: “We hosi n'wini wanga, xi teke xivuya lexi, u humesela Xikwembu leswi u swi tsakelaka. Vona, tihomu to endla ha tona magandzelo lama hisiwaka, hi leti; swileyi swo hula ha swona ni majoko ya tihavi swi ta endla tihunyi.

²³ Hosi! Hinkwaswo leswi, mina Arawuna ndzi ku nyika swona we hosi!” Kutani Arawuna a engeta a ku ka Davhida: “HOSI Xikwembu xa wena a xi amukele ku gandzela ka wena.”

²⁴ Kambe hosi Davhida a ku ka Arawuna: “E-e! Swilo leswi, ndzi lava ku humesa mali, ndzi swi xava ka wena. A ndzi lavi ku gandzela HOSI Xikwembu xa mina hi swilo leswi ndzi nga lo nyikiwa kunene.” Kutani Davhida a xava xivuya ni tihavi hi mali ya tisilivhere ta 50.

²⁵ Kutani Davhida a akela HOSI Xikwembu alitari kona, a humesa magandzelo yo hisiwa ni ya xinakulobye. HOSI Xikwembu xi amukela mikhongelo leyi ya ku khongelela tiko, kutani ntungu wu suka etikweni ra Israele.