2 SAMIELE 21 - BIBELE Mahungu Lamanene

Ta ku rihiseta ka vaaki va Gibiyoni

¹ Enkarhini wa ku fuma ka Davhida, ku vile ni ndlala malembe mankarhu hi ku landzelelana. Davhida a ya vutisa xivangelo eka HOSI Xikwembu, kutani xi hlamula xi ku: “I nandzu wa Sawulo ni ndyangu wa yena, hikuva ú halatile ngati hi ku dlaya vaaki va le Gibiyoni.”

² Hiloko Davhida a vitana va le Gibiyoni, a vulavula na vona. (Va le Gibiyoni lava a va nga ri va rixaka ra Israele, kambe a va ri masalela ya Vaamori; Vaisraele a va tibohile hi ku hlambanya leswaku va ta va tsetselela, kambe Sawulo a a ringetile ku va herisa, hikuva a a hisekela vanhu va Israele na Yuda.)

³ Kutani Davhida a vutisa va le Gibiyoni, a ku: “Xana ndzi nga mi endlela yini xana? Xana ndzi nga mi rihela ha yini, leswaku mi hi navelela minkateko, hina hi nga ndzhaka ya HOSI Xikwembu, xana?”

⁴ Va le Gibiyoni va n'wi hlamula va ku: “Mhaka ya hina na Sawulo ni ndyangu wa yena yi nga ka yi nga rihiwi hi mali ya silivhere ni ya nsuku; naswona a hi na matimba ya ku dlaya munhu ni un'we etikweni ra Israele.” Kutani Davhida a ku: “Ndzi byeleni, xana ndzi nga mi endlela yini xana?”

⁵ Va hlamula va ku: “Hi vilela hi Sawulo loyi a endleke makungu ya ku hi herisa ni ku hi lovisa, ku nga sali munhu na un'we wa ka hina ematlhelweni hinkwawo ya tiko ra Israele.

⁶ Hi kombela ku nyiketiwa vana va yena va xinuna va 7, hi ta va hayeka emahlweni ka HOSI Xikwembu le Gibeya, emutini wa Sawulo muhlawuriwa wa HOSI Xikwembu.” Kutani hosi Davhida a hlamula a ku: “Hiswona, ndzi ta mi nyiketa vona.”

⁷ Leswi Davhida a a tibohile eka Yonatani n'wana Sawulo hi ku hlambanya emahlweni ka HOSI Xikwembu, a nga nyiketanga n'wana Yonatani Mefiboxete ntukulu wa Sawulo.

⁸ Kambe hosi Davhida a khoma Arimoni na Mefiboxete lon'wana, vana lava Sawulo a va kumeke na nsati wa yena lontsongo, Risipa N'wa-Aya. A khoma ni ntlhanu wa vana va xinuna va Meraba N'wa-Sawulo. (Nuna wa Meraba a a ri Adriele n'wana Barizilayi wa le Mehola.)

⁹ Davhida a nyiketa vanhu lava emavokweni ya vaaki va Gibiyoni; vona va va hayeka entshaveni emahlweni ka HOSI Xikwembu, kutani va lova swin'we va ri 7. Vanhu lava va dlayiwile hi nkarhi wa ntshovelo, loko ku tshoveriwa maxalana layo sungula.

¹⁰ Risipa N'wa-Aya a teka nkumba wo khwaxa, a ya tiandlalela wona eribyeni, a rindza mintsumbu ya lava 7, ku sukela loko ku sunguriwa ntshovelo, ku fikela loko timpfula ti sewula; ninhlekanhi a a rindza tinyanyana, nivusiku a hlongola swivandzana.

¹¹ Loko Davhida a twa leswi Risipa nsati lontsongo wa Sawulo a swi endleke,

¹² a ya eka vaaki va muti wa Yabexe-Giliyadi, a ya teka marhambu ya Sawulo ni ya n'wana wa yena Yonatani. (Hi siku leri Vafilista va dlayeke Sawulo le Gilibowa ha rona, a va hayekile ntsumbu wa yena ni wa n'wana wa yena erivaleni ra muti wa Beta-Xani; kutani vanhu va le Yabexe-Giliyadi a va yile va ya hawula mintsumbu leyi, va vuya na yona.)

¹³ Davhida a vuyisa marhambu ya Sawulo ni ya Yonatani n'wana wa yena hi le Yabexe-Giliyadi, a hlengeleta ni marhambu ya lava 7 lava a va vambiwile.

¹⁴ Kutani va ya ma lahla swin'we ni marhambu ya Sawulo ni ya n'wana wa yena Yonatani, endhawini leyi vuriwaka Sela etikweni ra Benjamini, emasirheni ya Kixi tata wa Sawulo. Va endla hinkwaswo leswi lerisiweke hi Davhida, kutani endzhaku ka sweswo, Xikwembu xi amukela mikhongelo ya vona ya ku khongelela tiko.

Ta Vaisraele loko va lwa ni swihontlovila swa Vafilista

¹⁵ Nyimpi exikarhi ka Vafilista ni Vaisraele yi tlhela yi pfuka. Kutani Davhida a rhelela a ya enyimpini ni malandza ya yena; loko va ri karhi va lwa ni Vafilista, Davhida a karhala swinene.

¹⁶ Yixibi-Benodo, munhu un'wana wa rixaka ra swihontlovila, a a ri ni tlhari ra koporo leri a ri tika ku tlula 3 kg; naswona a ri ni fumu lerintshwa, kutani a vulavula hi ku dlaya Davhida.

¹⁷ Kambe Abixayi n'wana Seruya a lamulela Davhida, a juma Mufilista, a n'wi dlaya. Kutani masocha ma khongotela Davhida hi matimba, ma ku: “U nga ha humi nyimpi na hina, hikuva hi chava leswaku u nga tshuka u timeka, wena rivoni ra Israele.”

¹⁸ Endzhaku ka sweswo, ku tlhela ku va ni nyimpi ni Vafilista emutini wa Gobo; kutani Sibekayi wa le Huxa a dlaya Safu, un'wana wa rixaka ra swihontlovila.

¹⁹ Nakambe, nyimpi yi tlhela yi va kona ni Vafilista eGobo; kutani Elihanani n'wana Yaari wa le Betlehema a dlaya Goliyadi wa le Gati; mphiselo wa tlhari ra Goliyadi a wu ringana ni musi hi ku bumbula ka rona.

²⁰ Enyimpini yin'wana leyi yi nga tlhela yi va kona eGati, a ku ri ni xihontlovila xin'wana xo hlamarisa, wanuna wa tintiho ta 6 evokweni rin'wana ni rin'wana, ni wa swikun'wana swa 6 enengeni wun'wana ni wun'wana; tintiho ta kona ni swikun'wana swa kona a swi endla 24. Na yena a a ri wa rixaka ra swihontlovila.

²¹ Loko wanuna loyi a pfuka Vaisraele a va sandza, Yonatani n'wana Ximeya makwavo wa Davhida a n'wi dlaya.

²² Vanhu lava va mune a va huma erixakeni ra swihontlovila swa le Gati; va dlayiwile hi Davhida ni malandza ya yena.