2 SAMIELE 12 - BIBELE Mahungu Lamanene

Ta ku tisola ka Davhida, loko a tshinyiwa hi Natani

¹ Kutani HOSI Xikwembu xi rhumela Natani eka Davhida, a fika a ku ka hosi: “Mhaka hi leyi: Emutini wun'wana a ku ri ni vavanuna vambirhi; un'wana a a fumile, un'wana a a ri xisiwana.

² Lowa xifumi a a ri ni tihomu ni tinyimpfu leto tala ngopfu.

³ Kasi lowa xisiwana yena a a nga ri na nchumu, handle ka xinyimpfana xin'we ntsena, lexi a a tixavele xona. A a xi hlayisa, xi kulela ekaya ka yena swin'we ni vana va yena, a xi phamela swakudyanyana swa yena, a xi nwisa ni mati hi ndzheko wa yena, a xi vukarha exifuveni xa yena. Xinyimpfana lexi a a xi languta ku fana ni n'wana wa yena wa xisati.

⁴ Siku rin'wana, lowa xifumi a fikeriwa hi n'wendzi, kutani a nga lavi ku ya pambula nyimpfu kumbe homu eka swifuwo swa yena, leswaku a ta tlhavela n'wendzi wa yena; kambe a ya a ya teka xinyimpfana xa lowa xisiwana, a tlhavela n'wendzi loyi!”

⁵ Kavaloko Davhida a hlundzuka swinene hikwalaho ka munhu wa kona, a ku ka Natani: “Munhu la endleke mhaka yo tano, ú faneriwa hi ku fa!

⁶ Naswona ú ta humesa swinyimpfana swa mune ku siva lexiya, hikuva ú endlile hi tihanyi, a nga kombi tintswalo.”

⁷ Kutani Natani a ku ka Davhida: “Munhu wa kona, hi wena! Sweswi ke, HOSI Xikwembu xa Israele xi vurisa sweswo xi ri: ‘Hi mina ndzi ku vekeke ku va hosi ya Israele; naswona hi mina ndzi ku poniseke emavokweni ya Sawulo.

⁸ Ndzi ku nyikile muti wa n'wini wa wena, ndzi lata vasati va yena exifuveni xa wena; ndzi ku endlile hosi ya Israele na Yuda. Loko sweswo a swi nga ringananga, a ndzi ta engeta ndzi ku nyika swin'wana swo tala.

⁹ Xana u solela yini rito ra mina HOSI, u endla leswo biha emahlweni ka mina, xana? U dlayisile Uriya lowa Muhiti hi fumu ra Vaamoni enyimpini, leswaku u ta teka nsati wa yena a va nsati wa wena.

¹⁰ Hikokwalaho, va ndyangu wa wena va ta dlayiwa hi fumu minkarhi hinkwayo, hikuva u ndzi sorile hi ku teka nsati wa Uriya lowa Muhiti, u n'wi endla nsati wa wena.’

¹¹ HOSI Xikwembu xi engeta xi vurisa sweswo xi ri: ‘Yingisa! Ndzi ta ku vangela leswo biha, leswi u nga ta endleriwa hi va ndyangu wa wena. Ndzi ta teka vasati va wena u ri karhi u langutile, ndzi va nyika munhu un'wana, la nga ta etlela na vona erivaleni, dyambu xi lo hósì!

¹² U endlile xidyoho lexi exihundleni, kambe mina, mhaka leyi ndzi yi vulaka, ndzi ta yi endla erivaleni, emahlweni ka Vaisraele hinkwavo!’ ”

¹³ Kavaloko Davhida a ku ka Natani: “Ndzi dyohele HOSI Xikwembu.” Natani a ku ka Davhida: “HOSI Xikwembu xona xa ku rivalela; u nga ka u nga fi.

¹⁴ Hambiswiritano, leswi mintirho ya wena yi sandziseke HOSI Xikwembu, n'wana wa wena wa mufana loyi a ha ku velekiwaka, ú ta fa hakunene!”

¹⁵ Loko Natani a mukile, HOSI Xikwembu xi ba n'wana loyi Batixeba nkata Uriya a n'wi velekeke na Davhida, kutani n'wana loyi a tlhaveka a vabya swinene.

¹⁶ Kutani Davhida a khongela hi matimba eka HOSI Xikwembu leswaku xi tsetselela n'wana; a titsona swakudya, a ya nghena endlwini, a etlela ehansi vusiku hinkwabyo.

¹⁷ Vakulukumba va le ntsindza va ya eka yena, va n'wi khongotela leswaku a pfuka, kambe yena a nga pfumeli, a ala ni ku dya na vona swakudya.

¹⁸ Loko ku hundzile masiku ya 7, n'wana a fa. Malandza ya Davhida ma chava ku ya n'wi tivisa leswaku n'wana ú lovile, hikuva a va ku: “Leswi hi ringeteke ku vulavula na yena n'wana a ha hanya, kambe a nga hi yingisi, sweswi xana hi nga n'wi tivisisa ku yini leswaku n'wana ú lovile, xana? Kumbe hi to na n'wi byela, o tiendla swin'wana swo vavisa!”

¹⁹ Kuteloko Davhida a vona malandza ya yena ma ri karhi ma hleva-hleva, a swi vona leswaku n'wana a nga va a lovile; kutani a va vutisa a ku: “Xana n'wana ú lo timeka xana?” Vona va hlamula va ku: “Ina, ú timekile.”

²⁰ Hiloko Davhida a suka a yima, a ya hlamba, a tola ni mafurha, a ambala swin'wana, kutani a ya nghena endlwini ya HOSI Xikwembu, a nkhinsama a khongela. Loko a tlhelela entsindza, a kombela swakudya; va n'wi phamela, a dya.

²¹ Kutani malandza ya yena ma n'wi vutisa, ma ku: “Mhaka leyi u yi endlaka, a hi yi twisisi, hikuva loko n'wana a ha hanya, a wu nga dyi, a wu rila, hikwalaho ka ku vabya ka yena. Kambe sweswi, leswi n'wana a loveke, wa pfuka, u dya swakudya!”

²² Davhida a hlamula a ku: “Loko n'wana a ha hanya, a ndzi titsona swakudya, ndzi rila, hikuva a ndzi ku: ‘Kumbexana, HOSI Xikwembu xi nga ndzi twela vusiwana, leswaku n'wana a hanya.’

²³ Kambe sweswi, ú lovile! Ndzi nga ha titsonela yini swakudya ke? Xana ndzi nga ha kota ku tlhela ndzi n'wi vuyisa xana? Hi mina ndzi faneleke ku ya laha a nga kona, yena a nga ka a nga ha vuyi.”

Ta ku velekiwa ka Solomoni

²⁴ Davhida a chavelela nsati wa yena Batixeba; kutani a ya nghena endlwini ya yena, a etlela na yena. Batixeba a veleka n'wana wa mufana, kutani Davhida a n'wi thya vito ra Solomoni. N'wana loyi a a rhandziwa swinene hi HOSI Xikwembu,

²⁵ kutani xi tivisa Davhida mhaka leyi hi nomo wa muprofeta Natani. Kutani Davhida a thya n'wana evito ra vumbirhi, a ku i Yedidiya (hileswaku: “Murhandziwa-wa-HOSI”), hikuva HOSI Xikwembu a xi rhandza n'wana loyi.

Ta Davhida loko a teka muti wa Rhaba

²⁶ Enkarhini wolowo, Yowabu a hlasela muti wa Rhaba, ntsinda wa Vaamoni, a teka muganga wa le vuhosini.

²⁷ Hiloko a rhumela vanhu eka Davhida ni rito leri nge: “Ndzi hlaserile muti wa Rhaba, ndzi teka ni muganga wa le kusuhi ni mati;

²⁸ kutani sweswi, hlengeleta mavuthu lama saleke, u ta, u ta gova kusuhi ni muti lowu, leswaku u ta wu teka hi wexe. Loko swi nga ri tano, ndzi ta wu teka mina, ndzi wu thya vito ra mina.”

²⁹ Kutani Davhida a hlengeleta mavuthu hinkwawo, a kongoma emutini wa Rhaba, a ya wu hlasela, a wu teka.

³⁰ Davhida a teka ni harhi ya nsuku enhlokweni ya Milikomo, xikwembu xa Vaamoni xo vatliwa; harhi leyi a yi tika ku tlulanyana 40 kg; a yi ri ni ribye ra nkoka, leri Davhida a ri tekeke, a ri vekela eharhini ya yena. Davhida a phangha ni swilo swo tala emutini wa kona, a ya na swona ekaya.

³¹ Tlhandlakambirhi, Davhida a khoma vaaki va muti wolowo, a va sindzisa ku tirha hi tisahu, ni swikomu, ni swihloka; a tlhela a va rhuma va ya tirha laha switina swi hiseriwaka kona. Davhida a endla swo fana ni sweswo emitini hinkwayo ya Vaamoni. Endzhaku ka swona, Davhida ni masocha hinkwawo va tlhelela eYerusalema.