1 Yohane 4 - BIBELE Mahungu Lamanene

Ta Moya wa ntiyiso ni moya wa mavunwa

¹ Varhandziwa, mi nga pfumeleni moya wihi na wihi, kambe kambisisani mimoya ku vona loko hakunene yi ri ya Xikwembu; hikuva vaprofeta va mavunwa va hangalakile ni misava.

² Mi ta tiva Moya wa Xikwembu hi ndlela leyi: Moya wihi na wihi lowu vulaka leswaku Yesu Kriste ú tile emisaveni a va munhu, i wa Xikwembu.

³ Kutani moya wihi na wihi lowu nga vuriki sweswo hi tlhelo ra Yesu, a hi wa Xikwembu. Lowu hi wo moya wa Nala wa Kriste, lowu mi tweke ta wona leswaku wa ta; kutani nisweswi wu kona la misaveni.

⁴ Kambe n'wina vana vanga, mi va Xikwembu, kutani mi hlurile va mavunwa, hikuva Moya lowu nga eka n'wina wu tlula hi vukulu moya lowu wu nga eka vanhu va misava.

⁵ Vona i va misava, hikokwalaho leswi va swi vulaka i swa misava, kutani va misava va va yingisa.

⁶ Hina hi va Xikwembu. Un'wana ni un'wana la tivaka Xikwembu, wa hi yingisa, kasi loyi a nga riki wa Xikwembu, a nga hi yingisi. Hikwalaho ka leswi, hi tiva ku hambana exikarhi ka Moya wa ntiyiso ni moya wa mavunwa.

Xikwembu i rirhandzu

⁷ Varhandziwa! A hi rhandzaneni, hikuva rirhandzu i ra Xikwembu, kutani un'wana ni un'wana loyi a nga ni rirhandzu ú tswariwile hi Xikwembu, naswona ú tiva Xikwembu.

⁸ Loyi a nga riki na rirhandzu, a nga tivi Xikwembu, hikuva Xikwembu i rirhandzu.

⁹ Rirhandzu ra Xikwembu ri tikombile eka hina hi ndlela leyi: Hileswaku Xikwembu xi rhumile N'wana la nga un'we wa xona ku ta laha misaveni, leswaku hi ta kota ku hanya hikwalaho ka yena.

¹⁰ Rirhandzu ra kona i rikulu, hikuva a hi hina hi rhandzeke Xikwembu, kambe hi xona xi hi rhandzeke, kutani xi rhumele N'wana wa xona ku va mhamba ya swidyoho swa hina.

¹¹ Varhandziwa, leswi Xikwembu xi hi rhandzeke hi mukhuva wolowo, na hina hi fanele ku rhandzana.

¹² Ku hava munhu na un'we la tshamaka a vona Xikwembu; loko hi rhandzana, Xikwembu xi tshame ka hina, kutani rirhandzu ra xona ri hetisekile eka hina.

¹³ Leswi swi hi khorwisaka leswaku hi tshame ka xona, na xona eka hina, hileswaku xi hi nyikile swa Moya wa xona.

¹⁴ Na hina hi swi vonile, hi vuya hi tiyisa, leswaku Tatana ú rhumele N'wana ku va Muponisi wa misava.

¹⁵ Un'wana ni un'wana loyi a vulaka leswaku Yesu i N'wana wa Xikwembu, Xikwembu xi tshame ka yena, na yena eka Xikwembu.

¹⁶ Hikokwalaho, ha tiva ni ku tshemba rirhandzu leri Xikwembu xi nga na rona eka hina. Xikwembu i rirhandzu, kutani loyi a tshamaka erirhandzwini, ú tshame eka Xikwembu, na Xikwembu xi tshama eka yena.

¹⁷ Kutani loko rirhandzu ri hetiseka eka hina, hi ta tiya nhlana esikwini ra ku avanyisa, hikuva leswi Kriste a nga swona, na hina hi swo leswi hi nga swona laha misaveni.

¹⁸ Ku hava ku chava erirhandzwini, hikuva rirhandzu leri hetisekeke ri susa ku chava. Ku chava ku fambelana ni ku biwa, kutani loyi a chavaka a nga hetisekanga erirhandzwini.

¹⁹ Hina hi ni rirhandzu hikuva ku rhangile Xikwembu xi hi rhandza.

²⁰ Loko un'wana a ku: “Ndzi rhandza Xikwembu”, kambe a venga makwavo, i muhembi; hikuva la nga rhandziki makwavo loyi a n'wi vonaka hi mahlo, a nge koti ku rhandza Xikwembu lexi a nga xi voniki.

²¹ Kutani nawu lowu xi hi nyikaka wona, hileswaku loyi a rhandzaka Xikwembu, ú fanele naswona ku rhandza makwavo.