1 Vatesalonika 5 - BIBELE Mahungu Lamanene

Ku tilunghisela ku vuya ka Hosi

¹ Loko ti ri ta minkarhi ni ta tinguva ta kona, vamakwerhu, a mi faneli ku tsaleriwa nchumu hi tona.

² Hikuva n'wina hi xiviri, ma swi tiva swinene leswaku Siku ra Hosi ri ta fika kukota khamba leri taka nivusiku.

³ Siku vanhu va nga ta ku: “Ku rhulile, ku hava xo karhata”, hi wona nkarhi lowu ku onhaka ku nga ta va wela henhla hi xitshuketa, tanihi ku lumiwa ka wansati la nga kusuhi ni ku kuma n'wana; va nga ka va nga poni.

⁴ Kambe n'wina vamakwerhu, a mi le munyameni; hikokwalaho, siku ra kona ri nga mi tshuketi ku fana ni khamba.

⁵ Hikuva hinkwenu mi vana va ku vonakala, mi vana va nhlekanhi. A hi va vusiku hina, kumbe va munyama.

⁶ Hikokwalaho hi nga tshuki hi etlela kukota leswi van'wana va endlisaka swona, kambe a hi hitekeni, hi tikhoma.

⁷ Hikuva lava etlelaka, va etlela nivusiku, ni lava pyopyiwaka, va pyopyiwa nivusiku.

⁸ Kambe leswi hina hi nga va nhlekanhi, a hi tikhomeni, hi ambala ku pfumela ni rirhandzu xi va xisirhelelo xa hina exifuveni, kutani enhlokweni hi ambala ku langutela ka ku ponisiwa, xi va xihuku xa hina.

⁹ Xikwembu a xi hi hlawulanga leswaku xi ta hi hlundzukela, kambe ku hi nyika ku ponisiwa hi Hosi ya hina Yesu Kriste.

¹⁰ Kriste ú hi ferile leswaku, hambi ha ha hanya hambi hi tietlelele, hi ta kuma vutomi swin'we na yena.

¹¹ Hikokwalaho, tiyisanani mi akisana, hilaha mi swi endlaka hakona nisweswi.

Ku khongotela ko hetelela ni marungulo

¹² Ha mi kombela hi matimba, vamakwerhu, leswaku mi va ni xichavo eka lava tirhaka exikarhi ka n'wina, lava va mi rhangelaka emahlweni endleleni ya Hosi, ni ku mi tsundzuxa;

¹³ mi va xixima swinene hi rirhandzu, hikwalaho ka ntirho wa vona. Hanyani swin'we hi ku rhula.

¹⁴ Kutani ha mi khongotela vamakwerhu, hi ri: Layani malolo, mi tiyisa lava helaka ntamu; pfunani lava tsaneke, mi lehisela hinkwavo timbilu.

¹⁵ Vonani leswaku ku nga vi na loyi a tlheriselaka swo biha hi leswo biha; kambe hi masiku hinkwawo, ringetani ku endlelana leswinene, mi swi endla ni le ka hinkwavo.

¹⁶ Tshamani mi tsakile masiku hinkwawo.

¹⁷ Mi nga tshiki ku khongela.

¹⁸ Eka hinkwaswo, nkhensani; hikuva hi kona ku rhandza ka Xikwembu ehenhla ka n'wina, ha Kriste Yesu.

¹⁹ Mi nga timi Moya.

²⁰ Mi nga sandzi nyiko yo vula Rito,

²¹ kambe kambisisani hinkwaswo, mi tiya eka leswinene.

²² Hambanani swinene ni hinkwaswo leswo biha swa tinxaka-xaka.

²³ Ingi Xikwembu xa ku rhula xona ha xoxe, xi nga mi endla lava hlawulekeke hi matlhelo hinkwawo. Ingi mimoya ya n'wina, ni timbilu ta n'wina, ni miri wa n'wina, swi nga hlayiseka swi basile, swi nga ri na nandzu siku Hosi ya hina Yesu Kriste a vuyaka.

²⁴ Loyi a mi vitanaka wa tshembeka, kutani ú ta swi endla.

²⁵ Vamakwerhu, hi khongeleleni na hina.

²⁶ Rungulani vamakwerhu hinkwavo hi ku ntswontswana ka vukwavo.

²⁷ Ndza mi kombela swinene, hi matimba ya Hosi, leswaku papila leri ri hlayeriwa vamakwerhu hinkwavo.

²⁸ Tintswalo ta Hosi ya hina Yesu Kriste, a ti ve na n'wina!