1 Vatesalonika 4 - BIBELE Mahungu Lamanene

Hanyelo leri tsakisaka Xikwembu

¹ Kutani ke, vamakwerhu, mi dyondzile eka hina hilaha mi fanelaka ku hanya hakona leswaku mi tsakisa Xikwembu, kutani mi hanyile hi mukhuva wolowo. Hikokwalaho, ha mi kombela hi matimba ni ku mi khongotela hi vito ra Hosi Yesu, leswaku mi ya mi kula, mi ri karhi mi hanyisa sweswo.

² Hikuva mi tiva leswi hi nga mi lerisa swona hi matimba ya Hosi Yesu;

³ naswona ku rhandza ka Xikwembu hi loku: Hileswaku mi endliwa lava tengeke, hi ku fularhela vuoswi hinkwabyo.

⁴ Un'wana ni un'wana wa n'wina a a tive ku hlayisa miri wa yena hi ndlela leyo tenga ni leyo lulama,

⁵ ku nga ri hi ku navela loku hisaka, ku fana ni vamatiko lava nga tiviki Xikwembu.

⁶ Emhakeni leyi, ku nga vi na loyi a dyohelaka makwavo, kumbe ku n'wi dyelela, hikuva Hosi i murihiseli eswilweni leswi hinkwaswo, hilaha hi nga mi byela khale ni ku mi tsundzuxa swinene hakona.

⁷ Hikuva Xikwembu a xi hi vitanelanga ku hanya ethyakeni, kambe eku tengeni.

⁸ Hikokwalaho, loyi a alaka xitsundzuxo lexi, a nga soli munhu, kambe ú sola Xikwembu lexi xi mi nyikaka Moya wa xona lowo Kwetsima.

⁹ Loko ti ri ta ku rhandzana ni vamakwenu eHosini, a mi faneli ku tsaleriwa nchumu hi tona; hikuva i Xikwembu lexi xi mi dyondziseke ku rhandzana;

¹⁰ kutani hi swona leswi mi swi endlaka eka vamakwerhu hinkwavo lava nge tikweni hinkwaro ra Makedoniya. Hambiswiritano, ha mi khongotela vamakwerhu, leswaku mi ya emahlweni, mi kula erirhandzwini rero.

¹¹ Ku navela ka n'wina lokukulu a ku ve ku hanya hi ku rhula, mi tikarhatela swa n'wina, mi tirha hi mavoko ya n'wina, hilaha hi nga rhanga hi mi tsundzuxa hakona.

¹² Hi mukhuva lowu, mi ta kombiwa xichavo hi va le handle, mi nga ha tikiseli munhu ni un'we.

Ta ku vuya ka Hosi

¹³ Vamakwerhu, ndzi lava leswaku mi tiva ntiyiso hi tlhelo ra lava va tietleleleke, mi ta ka mi nga vaviseki kukota van'wana lava nga riki na ku langutela.

¹⁴ Hikuva leswi hi pfumelaka leswaku Yesu ú file, a tlhela a pfuka eku feni, hi mukhuva wolowo, hi pfumela leswaku lava tietleleleke, Xikwembu xi ta va pfuxa na Yesu eku feni, xi va vuyisa swin'we na yena.

¹⁵ Lexi hi mi byelaka xona hi vito ra Hosi, hi lexi: Hina hi nga ta va ha ha hanya loko Hosi yi vuya, hi nga ka hi nga rhangeli lava tietleleleke;

¹⁶ hikuva Hosi hi xiviri xa yona yi ta xika hi le tilweni, hi mpfumawulo wa rito ra ku lerisa, hi ku huwelela ka ndhuna ya tintsumi, ni ku ba ka mhalamhala ya Xikwembu, kutani lava feleke ka Kriste, va ta rhanga va pfuka eku feni;

¹⁷ kutani hina lava hi nga ta va ha ha hanya, hi ta tlakuriwa hi ya ehenhla emapapeni swin'we na vona, hi ya hlangana na Hosi empfhukeni. Kutani hi mukhuva wolowo, hi ta va na Hosi hilaha ku nga heriki.

¹⁸ Hikokwalaho mi fanele ku tiyisana hi marito wolawo.