1 Vakorinto 5 - BIBELE Mahungu Lamanene

Vuoswi a byi pfumeleriwi

¹ Mhaka leyi hi yi twaka, hileswaku ku ni vuoswi exikarhi ka n'wina, lebyi ni le xikarhi ka vamatiko byi nga riki kona, lebyi fikaka laha un'wana a hanyaka ni nsati wa tata wa yena.

² Kutani ma ha ri ni ku tikurisa! Ematshan'wini ya swona, hikwalaho ka yini mi nga rilanga, leswaku la endleke swilo leswi a susiwa exikarhi ka n'wina, xana?

³ Loko a ri mina, hambiloko hi miri ndzi ri kule na n'wina, hi moya ndzi kona; kutani ndzi ve ndzi n'wi avanyisa munhu loyi a endleke mhaka leyo chavisa leyi, wonge hi loko ndzi ri kona.

⁴ A hi hlanganeni hi vito ra Hosi ya hina Yesu, mina na n'wina, mina ndzi va kona hi moya; kutani, hi matimba ya Hosi ya hina Yesu, ndzi ri:

⁵ Munhu wo tano a a nyiketiwe eka Sathana, leswaku miri wa yena wu herisiwa, ni leswaku moya wa yena wu ponisiwa hi siku ra Hosi.

⁶ Ku tidzunisa ka n'wina a ku lulamanga! Xana a mi tivi leswaku comelanyana lexitsongo xi kukumuxa mbila hinkwayo ke?

⁷ Cukumetani comela xa khale, leswaku mi ta va mbila leyintshwa. Mhaka ya kona hileswaku a ma ha ri na comela, hikuva Kriste, la nga xinyimpfana xa hina xa Paseka, ú tlhaviwile.

⁸ Hikokwalaho, a hi endleni nkhuvo ku nga ri hi comela xa khale, ku nga ri hi comela xa vudyoho ni ku homboloka, kambe ku ri hi xinkwa xo-ke-comela, xo tenga ni xa ntiyiso.

⁹ Ndzi mi tsalerile epapileni ra mina leswaku mi nga tolovelani ni vaoswi;

¹⁰ a ndzi nga vuli nikutsongo ku hambana ni vanhu va misava leyi lava nga vaoswi, kumbe lava nga ni makwanga, kumbe vaxisi, kumbe lava gandzelaka swikwembu swa hava; e-e, hikuva loko mi endla sweswo, a swi ta vula leswaku mi rhurha emisaveni leyi.

¹¹ Leswi a ndzi mi tsalela swona hileswaku mi nga tolovelani ni loyi a vuriwaka “makwerhu” kasi i muoswi, kumbe i munhu wa makwanga, kumbe i mugandzeri wa swikwembu swa hava, kumbe i murhukani, kumbe i xidakwa, kumbe i muxisi; munhu lowo tano, hambi ku ri ku dya mi nga dyi na yena.

¹² Hikuva xana i ntirho wa mina ku avanyisa va le handle xana? Va ta avanyisiwa hi Xikwembu.

¹³ N'wina hi n'wexe mi avanyisa lava nga ndzeni ka kereke; a mi endlisi sweswo xana? Hlongolani lowo biha exikarhi ka n'wina.