1 Vakorinto 15 - BIBELE Mahungu Lamanene

Ta ku pfuka ka Kriste eku feni

¹ Sweswi vamakwerhu, ndzi lava ku mi tsundzuxa Mahungu Lamanene lawa ndzi mi dyondziseke wona. Mi ma amukerile; ma tiyisela eka wona;

² ma karhi ma ponisiwa ha wona, loko kunene mi hlayisa vumbhoni bya mina eka wona, ni loko ku pfumela ka n'wina eka wona ku nga vanga ka hava.

³ Ndzi mi hundzisele leswi na mina ndzi swi amukeleke, swi nga leswikulu eka hinkwaswo: Hileswaku Yesu ú fele swidyoho swa hina, hilaha Matsalwa ma vulaka hakona;

⁴ ni leswaku ú lahliwile esirheni a vuya a pfuxiwa eku feni hi siku ra vunharhu, hilaha Matsalwa ma vulaka hakona;

⁵ ni leswaku ú humelele eka Petro, endzhaku a humelela eka lava khume na vambirhi.

⁶ Ú tlhele a humelela hi nkarhi wun'we eka vamakwavo lava tlulaka 500; lavo tala va vona va ha ri kona nisweswi, kambe van'wana va file.

⁷ Endzhaku ka sweswo, ú humelele eka Yakobo, a tlhela a humelela eka vaapostola hinkwavo.

⁸ Eku heteleleni ka leswi hinkwaswo, ú humelele ni ka mina, mina ndzi fanaka ni n'wana wo velekiwa nkarhi wu nga si fika.

⁹ Ndzi lontsongo eka vaapostola, a swi ndzi fanelanga ku vuriwa muapostola, hikuva ndzi xanisile kereke ya Xikwembu.

¹⁰ Kambe ndzi leswi ndzi nga swona hi tintswalo ta Xikwembu, kutani tintswalo ta kona, leti Xikwembu xi ndzi kombeke tona, a ti welanga ehansi. Ntiyiso wa kona hileswaku ndzi tirhile ngopfu ku va tlula hinkwavo; hambiswiritano, a ku tirhanga mina, kambe ku tirhile tintswalo ta Xikwembu leti ndzi nga kombiwa tona.

¹¹ Hikokwalaho, hambi mi dyondzisiwa hi mina, hambi mi dyondzisiwa hi vona, mahungu ya hina hi wo walawo, kutani hi wona lawa mi ma pfumeleke.

Ta ku pfuka ka vafi

¹² Loko ku dyondzisiwa leswaku Kriste ú pfuxiwile eku feni, swi endlisa ku yini leswaku van'wana exikarhi ka n'wina va ku, ku hava ku pfuka ka vafi, xana?

¹³ Loko ku ri hava ku pfuka ka vafi, Kriste hi xiviri, na yena a nga pfuxiwanga.

¹⁴ Kutani loko Kriste a nga pfuxiwanga eku feni, ku dyondzisa ka hina a ku vuli nchumu, ni ku pfumela ka n'wina a ku vuli nchumu.

¹⁵ Ku hundzisa sweswo: Hi nga kumiwa hi ri lava nyikeke vumbhoni bya vunwa hi ta Xikwembu, hikuva hi vurile hi tiyisa leswaku i Xikwembu lexi pfuxeke Kriste eku feni, kasi a xi n'wi pfuxanga, loko hakunene vafi va nga pfuxiwi eku feni.

¹⁶ Hikuva loko vafi va nga pfuxiwi, Kriste na yena a nga pfuxiwanga.

¹⁷ Kutani loko Kriste a nga pfuxiwanga, ku pfumela ka n'wina i ka hava, kutani ma ha ri eswidyohweni swa n'wina.

¹⁸ Kutani ke, na vona lava nga fa va ri va ka Kriste, va lovele makumu.

¹⁹ Loko eka Kriste, hi nga languteli swin'wana kambe ho langutela swa vutomi lebyi ntsena, hi vanhu lava nga ni khombo leri tlulaka ra vanhu hinkwavo.

²⁰ Kambe lexi tiyeke hileswaku Kriste ú pfuxiwile exikarhi ka vafi. Hi swona leswi tshembisaka leswaku lava feke na vona va ta pfuxiwa.

²¹ Hikuva leswi rifu ri nga vangiwa hi munhu un'we, ku pfuka ka vafi na kona ku tisiwile hi munhu un'we.

²² Kukotisa leswi hinkwavo va faka hikwalaho ka Adamu, hi mukhuva wolowo, hinkwavo va ta tlhela va pfuxiwa hikwalaho ka Kriste.

²³ Kambe un'wana ni un'wana ú ta pfuxiwa hi nkarhi wa yena: Wo rhanga i Kriste xi nga xo xitshembiso; kutani loko Kriste a ta, lava nga va yena va ta landza.

²⁴ Endzhaku, ku ta fika makumu, siku a nyiketaka Mfumo eka Xikwembu Tatana, loko a ta va a herisile vuhosi hinkwabyo, ni ku fuma hinkwako, ni matimba hinkwawo.

²⁵ Hikuva Kriste ú fanele ku fuma, Xikwembu xi kondza xi veka valala hinkwavo ehansi ka minkondzo ya yena.

²⁶ Kutani nala lowo hetelela la nga ta herisiwa i rifu;

²⁷ hikuva hi ku vula ka Matsalwa: “Xikwembu xi vekile hinkwaswo ehansi ka minkondzo ya yena.” Kutani loko Matsalwa ma vula leswaku: “Hinkwaswo swi vekiwile ehansi ka yena”, swa twala leswaku a ku katsiwi Xikwembu, hikuva hi xona xi vekeke swilo hinkwaswo ehansi ka Kriste.

²⁸ Loko hinkwaswo swi vekiwile ehansi ka yena N'wana, na yena hi xiviri ú ta vekiwa ehansi ka Xikwembu lexi xi vekeke hinkwaswo ehansi ka yena, leswaku Xikwembu xi va lexi fumaka ehenhla ka hinkwaswo-kwaso.

²⁹ Xana vanhu va lava yini, loko va khuvuriwa ematshan'wini ya lava feke xana? Loko vafi va nga pfuki nikutsongo, swi pfuna yini ku khuvuleriwa vona ke?

³⁰ Na mina, xana swi ndzi pfuna yini ku tiyisela emakhombyeni minkarhi hinkwayo xana?

³¹ Hakunene, masiku hinkwawo ndzi langutene ni rifu! Ndzi vula ndzi tiyisile vamakwerhu, hikuva ndzi tidzunisa hi n'wina hikwalaho ka Kriste Yesu Hosi ya hina.

³² Loko onge ndzi lwile ni swivandzana le Efesa ndzi ri munhu ntsena la faka, a swi ta va swi ndzi pfunile yini xana? Loko vafi va nga pfuxiwi, “a hi dyeni hi nwa, hikuva mundzuku ha fa!” hi ku vula ka Matsalwa.

³³ Mi nga pfumeli ku xisiwa: “Vanghana lavo biha, va borisa mikhuva leyinene.”

³⁴ Xalamukani swinene, mi tshika ku dyoha. Van'wana va n'wina a va tivi Xikwembu; ndzi vula leswi hi ku mi khomisa tingana.

Ta miri wa lava pfukeke eku feni

³⁵ Kumbe un'wana ú ta ku: “Vafi va pfuxiwa hi mukhuva wihi ke? Va ta va ni miri lowo yini ke?”

³⁶ I ku vutisa ka phuphula sweswo! Lexi wena u xi byalaka, xi fanele ku rhanga xi fa, loko xi lava ku tlhela xi hanya.

³⁷ Lexi u xi byalaka, a xi si va miri wa ximilana lexi nga ta huma, kambe i ndzhoho ntsena leyi khumudzeriweke; kumbe i ya mavele, kumbe i ya timbewu tin'wana.

³⁸ Xikwembu xi nyika ndzhoho leyi emiri hilaha xi rhandzaka hakona; xi nyika mbewu yin'wana ni yin'wana miri lowu nga wa yona.

³⁹ Nyama hinkwayo a yi fanani; nyama ya vanhu i ya rixaka rin'wana; ya swiharhi hi yin'wana, ni ya tinyanyana hi yin'wana, ni ya tinhlampfi hi yin'wana.

⁴⁰ Ku ni miri wa le tilweni, ku ni miri wa la misaveni; kambe miri wa le tilweni wu ni ku saseka kun'wana, wa la misaveni wu ni kun'wana.

⁴¹ Dyambu ri ni ku saseka kun'wana, ni n'weti wu ni kun'wana, ni tinyeleti ti ni kun'wana; nyeleti yin'wana yi tlula yin'wanyana hi ku vangama.

⁴² Ku pfuka ka vafi ku tano na kona: Ku fana ni mbewu, miri wu lahliwa wu ri lowu hatlaka ku onhaka, wu pfuxiwa wu ri lowu nga ha onhakiki;

⁴³ wu lahliwa wu ri wo soleka, wu pfuxiwa wu ri lowo saseka; wu lahliwa wu herile ntamu, wu pfuxiwa wu tele matimba;

⁴⁴ wu lahliwa wu ri miri wa ntumbuluko, wu pfuxiwa wu ri miri wa moya. Ku ni miri wa ntumbuluko, kambe wa moya na wona wu kona.

⁴⁵ Hikokwalaho ku tsariwile, va ku: “Munhu lowo rhanga Adamu, ú endliwile xivumbiwa lexi hanyaka.” Kambe Adamu lowo hetelela ú endliwile moya lowu hanyisaka.

⁴⁶ Hambiswiritano, leswi rhangaka a hi swa moya, i swa ntumbuluko, kutani endzhaku ku ta swa moya.

⁴⁷ Munhu lowo rhanga ú humile emisaveni, a ri la endliweke hi ntshuri wa misava; munhu lowa vumbirhi ú huma etilweni.

⁴⁸ Vanhu lava vumbiweke hi ntshuri va fana ni munhu loyi wa ntshuri; ni vanhu va le tilweni va fana ni munhu loyi wa le tilweni.

⁴⁹ Kukotisa leswi hi nga ambala xivumbeko xa munhu wa ntshuri, hi mukhuva wolowo hi ta ambala xivumbeko xa munhu wa le tilweni.

⁵⁰ Leswi ndzi vulaka swona, vamakwerhu, hi leswi: Nyama ni ngati swi nga ka swi nga dyi ndzhaka ya Mfumo wa Xikwembu, naswona leswi hatlaka ku onhaka swi nga ka swi nga dyi ndzhaka ya leswi nga onhakiki.

⁵¹ Yingisani, ndzi mi byela xihundla: A hi nga fi hinkwerhu, kambe hinkwerhu hi ta hundzuriwa,

⁵² hi nkarhinyana, hi ku copeta ka tihlo, eku beni ka mhalamhala ya makumu; mhalamhala yi ta twala, kutani vafi va ta pfuxiwa va hambaniseriwa makumu ni ku onhaka, kutani hina hi ta hundzuriwa.

⁵³ Hikuva leswi onhakaka swi fanele ku funengela leswi nga onhakiki, ni leswi faka swi fanele ku funengela leswi nga fiki.

⁵⁴ Kutani loko leswi onhakaka swi ta va swi funengele leswi nga onhakiki, ni loko leswi faka swi ta va swi funengele leswi nga fiki, hi kona rito leri tsariweke ri nga ta hetiseka, leri nge: “Rifu ri mitiwile, ri hluriwele makumu.”

⁵⁵ “Wena rifu, ku hlula ka wena ku kwihi ke? Wena rifu, ndzhombo wa wena wu kwihi ke?”

⁵⁶ Ndzhombo wa rifu i xidyoho, kutani matimba ya xidyoho i Nawu.

⁵⁷ Kambe a ku nkhensiwe Xikwembu lexi hi nyikaka ku hlula hi Hosi ya hina Yesu Kriste.

⁵⁸ Hikokwalaho, vamakwerhu lava rhandzekaka, tiyani swinene mi nga tsekatsekeni; tiyiselani swinene, mi tirhela Hosi masiku hinkwawo, mi ri karhi mi swi tiva leswaku eHosini mintirho ya n'wina a yi nga weli ehansi.