1 TIKRONIKA 29 - BIBELE Mahungu Lamanene

Tinyiko ta Vaisraele to aka Tempele

¹ Kutani Davhida a vulavula na nhlengeletano hinkwayo, a ku: “Solomoni n'wana wa mina, hi yena ntsena loyi a nga hlawuriwa hi Xikwembu, kambe wa ha ri lontshwa, a nga si tiva ntirho wa yena; naswona Tempele leyi nga ta akiwa, yi akeriwa HOSI Xikwembu, ku nga ri munhu wa nyama, kutani ntirho wa kona wu ta tika.

² Hikokwalaho ndzi tikarhatile ndzi hlengeleta swo aka ni ku sasekisa ha swona yindlu ya Xikwembu xanga, swi nga leswi: Nsuku, ni silivhere, ni koporo, ni nsimbhi, ni timhandze; ndzi lavile ni maribye layo tala ya nkoka ya ‘onikisi’, ni ya ntima, ni ya mavalavala, ni lama nga ta vekeriwa eswiambalweni swa vaprista, ni maribye yo rhetela yo nameketa emakhumbini.

³ Ehandle ka swilo hinkwaswo leswi ndzi swi hlengeleteke, swo aka ha swona yindlu leyo hlawuleka, mina n'winyi ndzi humesa nyiko ya mina ya nsuku ni silivhere, ndzi humesela yindlu ya Xikwembu xanga hi ku tsaka.

⁴ Nsuku lowu ndzi wu humesaka hi lowo tenga wa le Ofiri, wo tlulanyana tithani ta 120, ku tika ka wona; na yona silivhere ya kona hi leyo tenga, yo tika ku tlula tithani ta 280. Vatirhi va ta tirhisa nsuku lowu ni silivhere leyi ku sasekisa makhumbi ya Tempele,

⁵ ni ku endla swibya ni swingolongondzwana hinkwaswo leswi nga ta tirhisiwa eTempeleni. Hikokwalaho, na n'wina tinyiketeni mi humesa swilo swa n'wina hi ku tsaka, mi humesela HOSI Xikwembu!”

⁶ Kavaloko varhangeri va mindyangu, ni vafambisi va tinyimba ta Israele, ni tindhuna ta mintlawa ya masocha ya 1 000 ni ya 100, ni valanguteri va mintirho ya le ntsindza, hinkwavo va humesa tinyiko ta vona, va nga sindzisiwanga hi munhu.

⁷ Leswi va swi humeseleke yindlu ya Xikwembu ni mintirho ya yona, hi leswi: Nsuku wo tika ku tlulanyana tithani ta 200, ni mali ya nsuku yo ringana swingwece swa 10 000, ni silivhere yo tika ku tlula tithani ta 400, ni koporo yo lava ku ringana tithani ta 740 hi ku tika, ni nsimbhi yo tika ku tlulanyana tithani ta 4 000.

⁸ Naswona lava a va ri ni maribye ya nkoka, a va ma tisa evuhlayiselweni bya xuma xa HOSI Xikwembu, ma amukeriwa hi Yehiele wa le Gerixoni.

⁹ Kavaloko Vaisraele va tsaka ku vona tinyiko leti vanhu va ti humeseke hi ku titwa, hikuva varhangeri a va humesile hi timbilu ta vona hinkwato, va humesela HOSI Xikwembu va tsakile. Na yena hosi Davhida a tsakisiwa swinene hi manyikele lawa.

Hosi Davhida a tlangela Xikwembu

¹⁰ Kutani Davhida a tlangela HOSI Xikwembu emahlweni ka nhlengeletano hinkwayo, a ku: “We HOSI, Xikwembu xa tata wa hina Yakobo, u fanele ku tlangeriwa minkarhi hinkwayo.

¹¹ Vukulu, ni matimba, ni ku twala, ni ku fuma, ni ku dzuneka, swi le ka wena we HOSI. Hinkwaswo leswi nga tilweni ni laha misaveni i swa wena. Hi wena la fumaka ni ku rhangela swilo hinkwaswo.

¹² Vanhu va nyikiwa vukosi ni vukulukumba hi wena, hi wena la fambisaka swilo hinkwaswo; ntamu ni vunhenha swi le ka wena, vanhu hinkwavo va kurisiwa ni ku tiyisiwa hi wena ntsena.

¹³ Hikokwalaho ha ku tlangela we Xikwembu xa hina, hi twarisa vito ra wena lero saseka!”

¹⁴ Davhida a engeta a ku: “Mina a ndzi nchumu, ni vanhu va mina a hi nchumu! Xana hi nga ku humesela yini xana? Hinkwaswo leswi hi nga na swona swi huma eka wena, kutani ho ku tlherisela leswi nga swa wena!

¹⁵ Emahlweni ka wena, hi valuveri ntsena, a hi na rito, ho fana ni vatata wa hina. Masiku ya ku hanya ka hina ma hatla ma hundza, ma nyamalala kukotisa papa.

¹⁶ We HOSI, Xikwembu xa hina, hi hlengeletile nhundzu ya ku ku akela yindlu leyo hlawuleka, kambe nhundzu ya kona hinkwayo hi nyikiwile hi wena, hikuva hinkwaswo i swa wena.

¹⁷ Ndza swi tiva leswaku wena Xikwembu xanga, u kambela mbilu ya munhu, u lava leswaku a hanya hi ndlela leyi lulameke. Mina ndzi humesile tinyiko hi mbilu yo basa, kutani vanhu lava yimeke emahlweni ka wena va ndzi tsakisile loko na vona va ku humesela tinyiko va tsakile.

¹⁸ We HOSI, Xikwembu xa vatata wa hina Abrahama na Isaka na Yakobo, minkarhi hinkwayo dyondzisa vanhu va wena ku va ni makungu layo tano etimbilwini ta vona, va anakanya wena ntsena.

¹⁹ We HOSI, ndzi kombela leswaku u nyika Solomoni n'wana wa mina matimba ya ku hlayisa swileriso swa wena, ni switsundzuxo swa wena, ni milawu ya wena, leswaku a ta aka Tempele hi nhundzu leyi ndzi yi hlengeleteke.”

Ta Solomoni loko a vekiwa ku va hosi

²⁰ Kutani Davhida a vulavula ni nhlengeletano hinkwayo, a ku: “Tlangelani HOSI, Xikwembu xa n'wina!” Hiloko nhlengeletano hinkwayo yi tlangela HOSI, Xikwembu xa vatata wa vona, va korhamisa tinhloko va xi khongela, kutani va tiboha ku tirhela hosi ya tiko.

²¹ Hi siku leri tlhandlamaka, va humesela HOSI Xikwembu magandzelo ya ku nkhensa ni magandzelo lama hisiwaka, va tlhava tinkuzi ta 1 000, ni tinyimpfu ta makhuna ta 1 000, ni swinyimpfana swa 1 000, va chela swakunwa swa kona swa magandzelo, va humesa ni man'wana magandzelo layo tala hi vito ra Vaisraele hinkwavo.

²² Kutani va dya va tlhela va nwa, va cina emahlweni ka HOSI Xikwembu va tsakile swinene. Hiloko va engeta va veka Solomoni n'wana Davhida ku va hosi, va n'wi chela mafurha enhlokweni leswaku a fambisa vanhu va Xikwembu, va chela na Sadoki leswaku a va muprista.

²³ Kutani Solomoni a tshama exiluvelweni lexi nga vekiwa hi HOSI Xikwembu, a fuma ematshan'wini ya Davhida tata wa yena. Xikwembu xi n'wi katekisa, ni Vaisraele hinkwavo va n'wi yingisa.

²⁴ Varhangeri hinkwavo va Israele, ni tinhenha hinkwato, ni vana va hosi Davhida hinkwavo va hlambanya ku tirhela Solomoni.

²⁵ HOSI Xikwembu xi nyika Solomoni endzhuti emahlweni ka Vaisraele, xi tiyisa vuhosi bya yena ku tlula bya tihosi tin'wana leti nga tshama ti va kona exikarhi ka Vaisraele.

Ta ku fa ka hosi Davhida

²⁶ Davhida n'wana Yese ú fumile tiko hinkwaro ra Israele

²⁷ malembe yo ringana 40: Ú fumile malembe ya 7 a ri le Hebroni, a fuma malembe ya 33 a ri le Yerusalema.

²⁸ Loko Davhida a fa, a a kurile swinene, a ri ni malembe layo tala, a fuwile swinene, naswona vanhu a va ha n'wi komba xichavo. Kutani Solomoni n'wana wa yena a sala a fuma.

²⁹ Matimu hinkwawo ya hosi Davhida, ku sukela eku sunguleni ku ya fika emakumu, ma tsariwile etibukwini leti vuriwaka “Mintirho ya Samiele mavonakule”, ni “Mintirho ya muprofeta Natani”, ni “Mintirho ya Gadi munhu wa swivono”.

³⁰ Hinkwaswo leswi Davhida a a fumisa xiswona swi tsariwile etibukwini teto, naswona ku tsariwile ni ta vunhenha bya yena, ni ta hinkwaswo leswi humeleleke evutomini bya yena, exikarhi ka Vaisraele ni le matikweni lama vandzakaneke na vona.