1 TIKRONIKA 20 - BIBELE Mahungu Lamanene

Ta Davhida loko a teka muti wa Rhaba

¹ Hi nguva ya ximun'wana, wu nga nkarhi lowu tihosi ti toloveleke ku huma nyimpi ha wona, Yowabu a rhangela mavuthu, va ya hlasela tiko ra Vaamoni, va rhendzela Rhaba ntsindza wa vona. Davhida yena a a sele eYerusalema. Kutani Yowabu a lwa ni va le Rhaba a va hlula.

² Kutani Davhida a susa harhi ya nsuku leyi a yi ri enhlokweni ya Milikomo, xikwembu xa Vaamoni xo vatliwa; harhi ya kona a yi tika ku tlulanyana 40 kg, yi ri ni ribye ra nkoka; kutani Davhida a teka ribye leri, a ri vekela eharhini ya yena, a phangha ni swilo swo tala emutini wa kona, a ya na swona ekaya.

³ Tlhandlakambirhi, Davhida a khoma vaaki va muti wolowo, a va sindzisa ku tirha hi tisahu ni swikomu ni swihloka; a endlisa sweswo ni ka miti hinkwayo ya Vaamoni. Kutani Davhida ni vanhu va yena hinkwavo va tlhelela eYerusalema.

Ta Vaisraele loko va lwa ni swihontlovila swa Vafilista

⁴ Endzhaku ka sweswo, ku va ni nyimpi yin'wana ni Vafilista emutini wa Bezere, kutani Sibekayi wa le Huxa a dlaya Sipayi, un'wana wa rixaka ra swihontlovila; kutani Vafilista va hlurisiwa xisweswo.

⁵ Ku tlhela ku va ni nyimpi ni Vafilista, kutani Elihanani n'wana Yayiro a dlaya Lahimi makwavo wa Goliyadi wa le Gati; mphiselo wa tlhari ra Lahimi a wu ringana ni musi hi ku bumbula.

⁶ Enyimpini yin'wana leyi yi nga lwiwa le Gati, a ku ri ni xihontlovila xin'wana xo hlamarisa, wanuna wa tintiho ta 6 evokweni rin'wana ni rin'wana, ni wa swikunwana swa 6 enengeni wun'wana ni wun'wana; tintiho ta kona ni swikunwana swa kona a swi endla 24; wanuna loyi na yena a a ri wa rixaka ra swihontlovila;

⁷ loko a pfuka Vaisraele a va sandza, Yonatani n'wana Ximeya makwavo wa Davhida, a n'wi dlaya.

⁸ Vanhu hinkwavo lava dlayiweke hi Davhida ni malandza ya yena a va huma erixakeni ra swihontlovila swa le Gati.